香港人總愛在冰室茶記打躉，朝早歎返杯充滿本土風味的奶茶，往往能讓人精神抖擻一整天，不過有時唔想落街又點算好？屹立灣仔70年的老字號冰室豪華咖啡茶廳近期推出僅於門市有售的自家製茶膽包（$88/十包），十分鐘內便可沖出一杯香氣撲鼻的靚茶底，無論港式奶茶，抑或檸茶都可以輕鬆在家搞掂。
廣告（請繼續閱讀本文）
記者聞訊亦立即買返包嚟實測，據舖頭伙計所述，茶包配方與門市茶底一樣，同以錫蘭紅茶配上其他茶葉混和而成，包保原汁原味。在家沖調時只需要用200mL滾水焗5-7分鐘或用微波爐叮熱（約1分30秒）的常溫水浸泡，再加入預先準備好的花奶，一杯熱辣辣的奶茶就此誕生（檸茶茶底可用600mL水量）。
廣告（請繼續閱讀本文）
焗好茶膽後，一揭開杯蓋便聞到濃郁香氣，但飲落則略嫌茶味較淡，如果想享用濃茶的話，最好多焗幾分鐘或每杯用兩個茶包，至於味道方面，茶膽入口沒有澀味，整體來說值得一試。伙計透露如果惠顧餐廳更可以優惠價$59購買茶膽包，大家如果路過灣仔不妨入手幾份，無論想親手還原港式奶茶的正宗口味，或者送予即將移民的朋友都啱用。
【豪華咖啡茶廳】
地址：灣仔莊士敦道226號（正門向茂蘿街）
營業時間：5am – 7pm
廣告（請繼續閱讀本文）
文｜Layne
圖｜Layne
💛FOLLOW AndThen.hk
📘Facebook: AndThen.hk
📷Instagram: @andthenhk
Ⓜ️MeWe: AndThen.hk