有冇人發現屋企嘅雜物愈嚟愈多？每次鼓起勇氣想整理房間，丟棄唔要嘅物品時都好難成功做到，長久之下愈買愈多野，屋企嘅存放空間亦愈嚟愈少。近年唔少人鍾意用斷捨離方法扔掉唔要或者平時好少會用到嘅物品，最具回憶價值嘅物品，例如日記、朋友送嘅禮物如心意卡、公仔，雖然用唔上但又唔捨得丟棄，呢類物品又應唔應該丟棄呢？小編同大家分享三大斷捨離成功法則，比大家可以有勇氣可以捨棄一直唔敢丟棄嘅物品，重回簡約生活！
圖片來源︰unsplash、IKEA、youtube@末羊子 dontkjoanne｜撰文︰Sharon
「斷捨離」意思係斷絕唔需要嘅東西、捨去多餘嘅事物、脫離對物品嘅執着，唔少人都嚮往簡約簡單生活，但要實行斷捨離唔係個個都做到。要決心實行「斷捨離」，就要從屋企分門別類，分類要留同需要捨棄嘅項目。
1. 物品分類
要實踐斷捨離生活，就要捨棄屋企多餘又唔常用嘅物品！我哋可以從衣服、日常用品、化妝品等幾方面入手。首先以使用頻率去分類物品需唔需要斷捨離，呢件物品會「經常使用」、「間中使用」定「從未用過」？如果有一段時間冇用過，就應該要捨棄，一齊睇下整理師建議嘅斷捨離物品清單啦！
斷捨離物品清單
- 手袋
- 一年以上未著過嘅衣服
- 鞋子︰未破損但已經冇再著嘅鞋
- 紀念禮物︰朋友送嘅生日卡、聖誕卡、明信卡同小禮物
- 書︰學生時期嘅教科書、小說
- 化妝品︰過時或過期嘅化妝品
相信好多人最難斷捨離嘅物件一定係衣服，無論係男士定女士衣櫃有一大堆因為未爛而唔捨得丟棄嘅衫，但每次見到有新衫又會忍唔住買，長久以來衣服嘅數量就愈嚟愈多。以前嘅舊衫因為同而家嘅穿衣風格唔同而冇再著，但花咗一筆錢買又唔捨得丟棄，呢個時候就應該放手，就算留低都唔會有機會再著，不如二手賣出或者捐畀更多有需要嘅人。
最具回憶價值嘅物品相信一定係大家童年時收到朋友送嘅禮物、生日卡同聖誕卡，遇到有紀念價值物品時無法做出丟棄呢個決定，好多人都覺得係朋友嘅一番心意，唔應該隨便丟棄，但保留又冇任何價值，仲應唔應該丟棄？
台灣Youtuber末羊子係一位整理師，經常喺Youtube分享極簡同斷捨離生活嘅影片。佢指，「如果你唔記得你送出的所有禮物，就唔需要保留所有你收到嘅禮物。」送禮者會希望收禮嘅人會開心，鍾意呢份心意，所以我哋都會特別珍惜。送禮者若不再是特別熟悉嘅朋友，但又唔想浪費別人嘅心思，可以將卡片正反面影張相，以電子檔嘅形式存放到電腦上，既能完整保存卡片嘅內容，想睇嘅時間只要打開手機或者電腦就可以睇到！呢個都不失為一個好方法！
2. 買一件，丟一件
購物嘅意慾永遠唔會斷，就算丟棄完唔用嘅物件，仍然會不斷買新，所以建議使用「買一件，丟掉一件」方法。大家可以將屋企每類物品設為一定數量，如果超過設定數量就需要丟掉舊嘅物品，然後先可以再買新的。呢個情況通常買得最多必然係衣服、鞋子同手袋，因此當見到新野想買前就要丟掉一件先好入手。
3. 選擇多用途收納箱
一個收納箱可以幫助大家有效率放置更多嘅物品，但收納箱有時都會好佔空間，如果屋企地方唔大，建議可以購買多用途收納盒，除咗可以當收納盒亦可以當櫈坐！
當下定決心整理房間，嘗試斷捨離時，如果有啲物品需要保留，一個收納箱就好重要，可以幫我哋慳下唔少空間，小編搜羅咗幾款唔同嘅收納箱，執屋前睇下有冇心水嘅收納箱啱大家啦！
1. GNABBAS 貯物籃 （售價︰$79.9）（按此購買）
2. NÄBBIG 貯物箱（售價：$99.9）（按此購買）