編曲人Ariel Lai目擊「港鐵MMA」　還原事發經過：件事chok咗我成晚

港鐵最近不時上演車廂罵戰或MMA。近日內地社交平台小紅書瘋傳一段「港鐵東鐵線MMA」影片，車廂內一名阿伯與年輕男爭執，其間不斷挑釁「同你隻揪！打X死你啊同你講」、「我X你老X臭X！」，多名女士擋著阿伯阻止發難，年輕男則反嗆「聞到棺材香啦你都！」，阿伯聞言再想衝前。曾連續兩屆於ViuTV舉辦的「Chill Club 推介榜年度推介」獲得「年度編曲人」獎項的Ariel Lai（黎俊浩）原來當日亦在現場，更以「證人」身分還原事發經過。

Ariel Lai在社交平台寫道：「今朝有朋友send俾我，話見到我上報。放心，我唔係俾人打嗰個，但真係有啲嘢不吐不快，覺得有需要還原返成件事。話說星期二我同 @fattnul7 去大埔練完跑，搭東鐵綫返屋企。當時我哋身處嗰個車廂，有一班人（大約十個）應該啱啱上完大陸玩，佢哋同行之中有個呀伯（事件中打人嗰個）應該係飲咗酒，喺個車廂keep住喺度大聲同佢班friend講嘢（唔係一般大聲，係咆哮嗰種）。跟住有個𡃁仔終於頂唔順，出聲「噓」個呀伯，叫佢唔好咁嘈。呀伯一聽到就發咗癲咁樣衝向個𡃁仔度，跟住一拳一拳鍋落個靚仔塊面度。我一見到，就衝上前，喝個阿叔「唔好打人」。最L顛（癲）係佢隔離（籬）個男性friend：「我地（哋）睇到佢（個𡃁仔）鬧人先啫」 我即刻火都嚟埋，問返佢：「鬧人可以郁手㗎啦咩？」 我心諗：「如果你班人覺得鬧人（係咁十惡不赦，咁抵打）就可以打人，咁你哋喺度扮咩嘢攔住個阿叔啫？？你哋咪由得你個friend打死個𡃁仔囉」。」

「我見到有啲人留言話個靚仔衰口多「你聞到棺材香啦你都」，撩交打所以抵打。我想講呢句係呀叔打完佢好多拳之後，佢先講。而唔係佢講完呢句，個呀叔先打佢。正常無端端俾人打到爆缸，都燥啦。跟住去到九龍塘站，我哋成班人即刻落車，我同港鐵職員指證就係呢個阿叔打人。呢個時候最嬲嘅嘢發生，佢班friend（嗰班女人）竟然夠膽死擘大眼講大話，歪曲事實，話係個𡃁仔打阿伯先。我同嗰班人講：「有人影晒片，係個阿叔出手先，個𡃁仔完全冇還手」@fattnul7 :「 你哋真係夠膽擘大眼講大話。」個阿叔一聽到，又想衝上前打埋@fattnul7 ，好彩有人攔住。」

「我同個𡃁仔講：「你快啲報警，去醫院驗傷，我留低陪你去警署落口供做證人。」但係個𡃁仔竟然話要趕住返工，話唔報警。我心唸（諗）有冇咁鍾意返工啊，俾人打到爆曬缸，都可以算數？我唔知佢真係要返工定係費事煩，總之佢最後就選擇唔報警。港鐵職員聽到就打返個完場：「咁雙方都唔報警，件事就就咁解決啦。」 跟住，各人就各自散去。」

「呢件事chok咗我成晚，個阿叔固然不知所謂，佢班friend直程係CLS，歪曲事實。個𡃁仔更加唔知想點，俾人打到爆缸，竟然都唔行使返自己擁有嘅權利。你又要串個呀叔，我心諗你都應該會玩到底，點知最後又縮沙。我只係覺得返工會重要過自己身體咩？而港鐵職員俾我嘅感覺，就淨係純粹想盡快息事寧人，乜都唔好搞。我成晚都唔知睇咗啲乜L嘢。」