趙善恆去年經歷分手兼喪父　自揭抑鬱爭啲想走「冇死到已經好好彩」

趙善恆（恆仔@ToNick）去年2月宣佈跟拍拖10年的譚杏藍（小花）分手；4月時父親因血癌離世。一年內經歷重重難關，恆仔於今日（2月19日）凌晨在社交平台發長文，疑因身邊不時有「朋友」提起前女友的種種，直言「真係頂唔順喇」。恆仔自揭已經「抑鬱咗一年，爭啲想走，感謝跑步真係救咗我好多。」，更直言「我冇死到，其實已經好好彩」。最後表示已開展一段新感情，希望之後可以好好地生活。

趙善恆在社交平台貼出黑圖，寫道：「有啲嘢好想講，因為我怕我真係會做傻事，我只會講一次 都唔會再回應。話說，啱先有個「朋友」走埋來同我打招呼，咁我客氣咁寒暄咗幾句就算，但同呢位「朋友」對話之後我發現，我真係頂唔順喇。其實我抑鬱咗一年，爭啲想走，感謝跑步真係救咗我好多。上年，我爸爸走咗，亦同一齊好多好多年嘅女朋友分手。分咗手之後，當每一個人關心問我點，佢哋都會不經意咁講一句：原來你乜都唔知㗎？然後我就會聽到一個新嘅人名。我身邊啲同事同埋朋友，之前佢哋唔講比（畀）我聽，係唔想影響我，我仲好似一個小朋友咁樣，鍾意創作，想做好每一件事，又好想做啲好嘢出嚟。」

恆仔直言，冇死到已經好好彩：「作為幕前，又唔想引起不必要嘅風波，費事影響到啲project同客戶，咁就不斷隱瞞自己情緒，扮正常，繼續發放正能量，然後我用咗一年時間處理我嘅心情。我冇死到，其實已經好好彩，但我唔想再扮喇，我覺得夾band好開心、我覺得拍戲好開心，我而家都開始一段新嘅感情，而家係向建立一個好家庭方向出發，我淨係想好好地生活，做好我嘅工作，有一個好好嘅家庭，好好經營我嘅團隊，係咁多。」

恆仔表示只想好好生活：「好少打咁多字，但因為我發現我真係面對唔到呢個情緒，唔想工作唔到、生活唔到，唔想開始唔到一段健康嘅新關係，所以，最重要係唔該咁多位關事嘅「朋友」，唔好再走過來同我打招呼。我唔會公開任何人名，只係想你哋知，我唔再係咩都唔知，而家我只想好好生活。」

曾合作《一秒拳王》的周國賢留言道：「兄弟，我知道你喺呢段日子一定過得非常唔容易，我哋旁人亦冇辦法能夠明白你喺戰場上孤獨作戰嘅真正感受⋯但係你要相信你唔係自己一個，好多好錫你嘅人，都與你一起同行中！我認識嘅你一直都好勇敢、好善良同埋其實內裏非常勇敢，非常強壯！唔好放棄，我會陪你一齊行。Vivian Greene 的一句說話，有時候在我迷路時，會引領我走出情緒迷霧⋯“Life isn't about waiting for the storm to pass, but learning how to dance in the rain.”我隨時也在，一直也會在！如果真係避唔到，咁我哋一齊捱。」

不少圈中好友都紛紛留言或貼上「擁抱」的emoji，當中曾合作《和解在後》的Sica（何洛瑤），以劇中常用的金句留言：「先處理心情，後處理事情！」、商台DJ阮小儀寫道：「好好過自己的生活，別的，別理會，因為理不了，亦不必理。」。