Ray Online｜沈運龍：杜拜王子無騙過香港一毫　與對方「唱K」懂得用普通話唱《茉莉花》

阿聯酋杜拜王子阿里(Sheikh Ali Al Maktoum)喺香港設立家族辦公室延期事件引起社會討論。曾經同阿里接觸嘅香港中東經貿協會創會會長沈運龍話，對方非常誠懇嚟香港，冇呃過香港一毫子。

沈運龍接受電台訪問，話舊年12月喺香港認識阿里，佢介紹協會會員之一、中唐空鐵國際業務部總裁麥懿睿畀阿里認識。協會之後喺今年2月回訪杜拜，知道麥懿睿接受邀請，幫阿里喺香港建立家族辦公室。沈運龍話阿里曾經去中國多個城市了解，有心設立家族辦公室喺香港同內地投資。佢又話阿里好快落戶香港，絕對係協會嘅功勞，強調之前聲明話阿里嚟香港唔係出自佢嘅邀請，講法唔係「割蓆」。

早知阿里「唱得」

有報道引述消息話，阿里曾經喺菲律賓以歌手身分出道，藝名叫Alira。沈運龍話早喺同阿里見面之前，已經喺網上知道佢「唱得」，所以喺見面當晚嘅小型派對同阿里唱卡拉OK交流，更加話對方識得用普通話唱《茉莉花》。

另外，沈運龍話有網上評論連沙特阿拉伯同阿聯酋都未分得清楚，而政府委派出席家族辦公室開幕禮嘅官員又不斷降級。沈運龍話香港既然想吸引中東資金，包括政府官員在內應該多啲了解當地文化，唔係嘅話缺乏當地文化知識會搞出好多笑話。

原文刊登於 AM730

睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)