去旅行周不時會買當地限定或新出零食，打卡之餘又可以帶回港做手信。雖然近期出唔到埠，但都照樣可以留意各地最新美食資訊，待疫症過後去旅行都唔會太outdate。CONY就整理咗近日各地新出嘅零食、冰品資訊，方便大家bookmark，一有機會去旅行就把握機會食到盡！
1. 壓扁了的麥提莎
有冇人同CONY一樣，一食麥提莎就停唔到？雖然麥提莎近年推出新口味，但都係圓碌碌嘅形象，估唔到近日佢「被壓扁」變成餅乾，雖然口感唔同咗，但味道都係經典原味，可惜現時只有韓國便利店有售，唔係應該會成為CONY嘅煲劇良伴。
銷售點：韓國7-11便利店
2. 大師雪糕新口味停不了
日本Häagen-Dazs雪糕每季都會推出限定口味，即使多年來搞過唔少花臣，卻依然能為大家帶來驚喜，好似喺4月14日就新推出「皇家茉莉花茶～茶葉・銀毫～」，以優質茶葉「茉莉銀毫」加入香醇牛奶，味道清爽，充滿春天氣息。不到10日，今天又再發布新品「焦糖狂迷」雪糕──在焦糖味的雪糕中再加入香濃的焦糖醬，帶來雙重滋味。
銷售點：日本超市、便利店及百貨公司
3. 餅乾變朱古力派
「擰一擰，舔一舔，浸一浸」，一聽就知講緊乜？近日歐洲限定的「OREO朱古力派」登陸咗韓國便利店，在OREO外層再裹上一層朱古力脆皮，甜度爆燈，仲有牛奶朱古力和白朱古力兩款口味，唔知仲適唔適合用經典食法享用呢？
銷售點：韓國7-11便利店、歐洲超市
4. 鹹味雪條反應兩極
擁有60多年歷史的台灣雪糕品牌「阿奇儂」近年一洗古老形象，不斷推出創新口味，繼今年1月推出的「黑糖珍奶雪條」大受好評，剛剛又再新出「鹹蛋黃珍珠雪條」。口味聽落有點古怪，不少網友試過後反應兩極，有些人接受不了雪條是鹹的，亦有人指吃起來有種奇怪層次，相當有趣，你又敢唔敢試？
銷售點：台灣全聯超市
5. 香脆麻辣火鍋
介紹咗咁多款外國先買到嘅產品，最後一款，終於係香港獨家發售。卡樂B最近新推出香港限定口味「麻辣火鍋味薯片」，佢嘅辣度比「熱浪」強勁得多，仲會有舌頭痲痹的感覺，嗜辣朋友記得要試。
銷售點：惠康超市、Market Place by Jasons、 3hreesixty、Jasons ▪ Food & Living 及 Jasons ichiba
後記：說好的白色Nutella？
最近網上流傳Nutella推出了白朱古力版本，是品牌自1963年以來首次推出新口味，CONY在好奇心下想搵下邊度有得買，點知發現原來係old news，大約一年多前一間澳州媒體指「白色Nutella」名為Nutella Bianca，只在意大利有售。不過這款傳聞中的產品到現時似乎仍未有售，而且官方從未正式發布過「白色Nutella」的消息，不知道未來會否有機會一嚐白朱古力版Nutella的味道呢。
以上照片不斷被瘋傳，但有不少網民指品牌標label太假了吧。
