自從疫情開始，大家放假留係屋企通常都係煲劇或者訓覺，雖然而家無咩地方好去，不過其實除左追劇，手遊都係一個可以消磨時間嘅好選擇！而家手遊越出越多，當中更加有唔少由人氣動漫改編而成，整個遊戲製作都超有心機，除左有精美細緻嘅遊戲畫面，原版聲優同劇情向玩法都令D回憶返曬黎！一邊玩就好似重溫緊套動漫咁，動漫迷絕對唔可以錯過，想知到底有邊幾部動漫改編手遊好玩，而家即刻跟小編一齊download啦～
圖片來源：網絡圖片｜ 撰文：Candice
動漫改編手遊推介1. 「死神：羈絆之刃」
適逢死神動畫開播滿20週年紀念，早係上年官方就公佈最終章千年血戰篇動畫化決定！雖然之後都無再有最新消息更新，但最近就有一款《死神》嘅RPG卡牌手遊推出左，小編作為原著fans自己都有玩緊～
遊戲玩法簡單，同一般抽卡game嘅玩法大致相同，遊戲入面而家一共有3個卡池，完成任務通關就可以賺取魂玉抽卡，最近仲更新左假面卡池，小編岩岩抽到平子真子，戰鬥力超強！
另外遊戲亦會不定期舉辦限定活動，玩家可以賺取稀有角色碎片再合成角色，例如小烏、京樂春水等戰鬥力較強嘅角色就係係限定活動中拎到，fans們記得唔好錯過！
而遊戲模式方面就比較豐富，玩家除左可以一邊通關一邊重溫主線劇情，另外仲有多個模式可以挑戰，例如係難度較高嘅精英模式、同服玩家互相挑戰等等。
小編自己覺得遊戲最吸引係相對多獎勵附送，玩家可以係每2日就可以挑戰一次嘅「瀞靈廷挑戰」入面拎到好多補給！最近遊戲仲更新左自動掃蕩功能，令唔少遊戲任務都變得更輕鬆～
「死神：羈絆之刃」除左玩法多樣，畫面都同樣精緻唔馬虎，主頁介面嘅角色同背景都可以自行更換，另外仲有動漫入面嘅配樂做bgm，成個game都令小編d回憶翻曬黎！
角色出大技時嘅畫面更係超有心思，技能特效滿分！如果你都係死神嘅fans，趁台服新推唔算太耐，不妨即刻download黎玩下啦～
動漫改編手遊推介2.「一拳超人：最強之男」
呢款遊戲早係遊戲預告推出時就造成不少討論熱潮，玩家除左可以同主角埼玉組隊之外，遊戲亦不斷推出新角色，大家可以聯手同佢哋一齊突破災害同打低惡名昭彰嘅怪人。
遊戲角色分為英雄與怪人兩大陣營，派系又分為武裝、格鬥、科技、超能四種類型，玩家仲可以自由搭配對戰陣容添！
除左有超多角色之外，遊戲亦沿用動畫片配音，玩家係遊戲中可以參與探索、試煉、BOSS、RPG等多樣玩法，贏取豐厚獎勵！另外仲設有進化所、競技場、災害來襲、王者挑戰、天賦試煉、多人同時線上組隊嘅玩法，PVE副本更加入左埼玉老師戰鬥模式，比玩家體驗一拳擊殺嘅快感！
遊戲整體感覺比較偏向PC game嘅style，大家有興趣記住叫埋Friedns一齊down一齊玩！
動漫改編手遊推介3. 「灌籃高手 SLAM DUNK」
打機一向係男人嘅浪漫，如果加上神作動漫更加係錦上添花～ 大家最愛嘅動漫之一《灌籃高手》（男兒當入樽）原來都有推出手遊！知名角色如湘北、陵南、翔陽與海南全部都有，官方仲用原版聲優做配音，加入卡牌同實時競技系統，開放多人遊玩同排位賽模式，還原程度滿分！
除左核心嘅3V3半場模式外，遊戲仲有1V1鬥牛、2V2組隊、3V3全場、單人5V5全場等多種比賽模式。排位賽以3V3半場作為比賽模式，每3分鐘一場。最正係遊戲中仲會還原櫻木花道、流川楓、仙道彰、牧紳一等經典角色嘅經典技能添！
而家疫情雖然唔敢出街做運動，但都可以同幾個朋友約埋係game入面打翻場～遊戲畫面分別以Q版同動漫形式呈現，遊戲玩法簡單，大家有興趣都快D down黎試試啦～
動漫改編手遊推介4. 「我的英雄學院：最強英雄」
我的英雄學院作為今年人氣較高嘅熱血動漫，最近亦推出左一款RPG手遊「我的英雄學院：最強英雄」。遊戲畫面主要以3d形式呈現，每位英雄都擁有自己獨特的超能＂個性＂： 「One For All」、「爆破」、「半凍半燃」、「無重力」等等，可以發動超華麗嘅專屬＂個性＂技能～
另外地圖亦採用3D立體開放式畫面，完整展現城市街景；角色可以利用墻面進行快速移動，遊戲除左有豐富任務支線，仲可以比玩家體驗英雄日常，緊急事件等等！
fans們記得down黎玩玩啦～
動漫改編手遊推介5. 「Naruto x Boruto忍者熱闘」
講到經典動漫又點少得火影，火影一向鍾意出手遊，而家動畫劇情已經去到主角鳴人個仔博人嘅年代，而呢款手遊都唔例外！
遊戲同樣有多種遊玩模式，多人遊玩同排名戰不在話下，最吸引係只要簡單操作就可發動連擊同各種多采多姿的忍術！
動漫改編手遊推介6. 「FAIRY TAIL：無盡冒險」
黎到最後一款動漫改編game，FAIRY TAIL：無盡冒險同樣係抽卡rpg game，遊戲收錄左超過50位人氣角色，除左還原劇情同配音，亦有3D魔法出招畫面，經典魔法——火龍的咆哮、星靈魔法等都會一一再現。
Follow 我地睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/