無綫喺今年6月傳出大裁員，無綫行政總裁李寶安事後證實TVBI有60人被炒，雖然之後陸續有裁員消息傳出，但係李寶安話公司正轉向數碼化，原有傳統電視資源將作出調整，並於年底前再裁員5%，以目前3,900多名員工計，裁員約200人。(新聞連結： https://bit.ly/2IGt7V4 )
其實一直有唔少部門都相繼要交人，好似體育組、配音組、MyTV Super同埋TVB 8等等，有傳下一波受影響嘅，將會係戲劇組，不過最後冇受影響(新聞連結：https://bit.ly/2OAoEc1)。無綫今日再派大信封，除咗TVB周刊lastday，16廠已經解散晒之外，聽講仲有啲幕後嘅人，好似導演等等約150人被裁，之不過聽落人數唔少，但係之前佢哋set 咗要裁一定數目嘅人，計過未係好夠數，裁員行動似乎會繼續！
今日傍晚時份，無綫向傳媒發聲明，證實裁員。聲明如下：
為應對業務環境及營運需要的轉變，電視廣播有限公司(無綫電視)於過去一直進行營運調整，以達致提升效率、及發展新業務。TVB周刊的印刷本會被網上版取代；由於增加實景拍攝導致廠景拍攝減少，將關閉其中一個戲劇錄影廠；非戲劇製作亦精簡其運作。
現決定裁減在TVB周刊、製作統籌部、美術分部及非戲劇製作約共150名員工，由今日生效。受影響的人數佔現時之職員人數約百分之四。
無綫電視發言人表示：「裁減職位是一個困難的決定。但很明顯，我們需要面對業務環境及營運需要的轉變。我們會繼續投資以提升製作及將我們的資源投放於新的及發展中的業務。」《蘋果》亦有向李寶安求證，佢話：「冇嘢補充了！」
無綫上位小生張振朗，對於無綫今日裁員150人表示無奈，佢今日接受傳媒訪問時話:「公司有公司決定，公司回應咗，我自己都唔方便講啲乜嘢，希望佢哋早日搵到新嘅工作。」黃心穎亦話：「我未收到消息有無相熟同事受影響、不過同行業無論識唔識都會覺得可惜。裁員對製作質素的影響我控制唔到、唯有做好自己本份。希望唔好再裁員喇！」