【返學喇】吹，繼續吹！十萬個返學遲到理由系列

各位同學讀咗咁多年書，相信有一個問題永遠都唔會諗得明：究竟點解返學遲到要交代原因？更加令人不解嘅係，如果學生老實答唔記得起身，老師又真係會再問點解唔記得⋯⋯或者就係因為老師呢份鍥而不捨嘅堅持，驅使遲到嘅同學每次都要絞盡腦汁，諗出一個天花龍鳳嘅理由，滿足老師的求知欲。新學期就快開始，同學仔要諗定遲到原因喇，唔係鼓勵你遲到，不過以備不時之需都好嘛！

最有愛心系列

1.　我隻貓貓今朝唔舒服，佢叫我留喺屋企照顧佢，所以遲咗出門口。

2.　我養嘅兩隻倉鼠今朝打架受傷，我要幫佢地急救，所以遲咗出門口。

最霸氣系列

1.　噚晚我祈禱嘅時候，神話我最近太大壓力喇，叫我今日遲啲返學，我唯有順從神的旨意。

2.　通勝話我九點前不宜出門，否則會有血光之災。

最熱心助人系列

1.　過馬路嘅時候，前面個位婆婆跌咗袋橙，我好心幫佢手執，結果令我遲到。

2.　返學嘅時候遇上劫案，我為咗盡市民責任，去咗幫警察叔叔手，一齊將賊人繩之於法，所以我遲到。

最黑仔系列

1.　交通燈壞咗，我為咗遵守交通規則，堅持唔衝紅燈，等到有人維修好先過，所以遲到。

2.　爸爸噚晚唔記得閂水喉，今朝全屋水浸，令我出唔到門口。

最離地系列

1.　爸爸架林寶堅尼壞咗，所以我轉搭地鐵，但預計唔到地鐵行得咁慢，所以遲到。

2.　我返學途中被外星人綁架咗上飛船，所以遲咗到。

最有創意系列

1.　因為Twins首歌話「為什麼他比我遲到卻勝出比賽」，所以我遲到。

2.　春眠不覺曉⋯⋯

不過，咁多位同學與其花心思作故仔，不如較多幾個鬧鐘，夜晚早啲訓，第二日準時起身返學啦！（傳送門：【返學喇】超有才鬧鐘App推介：去廁所打卡先准熄　遙距叫醒同學仔）