近日在TVB熱播的劇集《荷里活有個大老千》迎來高潮，由吳雲甫（Owen）飾演的「大勇」為救「缽仔糕」而被槍殺及棄屍，點燃了「龍四」與「文雄」之間的導火線。原來，這位「大勇」已入行10年，這次參與拍攝《荷里活有個大老千》是離巢TVB兩年後以自由身形式出演！
撰文：東方新地、Wai｜圖源：ig、劇照、電視截圖
吳雲甫爆離巢待遇更好
日前，《荷里活有個大老千》中的正直忠誠警察「大勇」為救「缽仔糕」而被槍殺及棄屍，睇得不少觀眾對「大勇」的死感到可惜及難過。然而，大眾對飾演「大勇」的吳雲甫感覺生面口，但原來他於演藝路上已是頗有經歷！
現年37歲、曾經是TVB娛樂新聞台主播的Owen於1996年隨家人移民加拿大，並在加國初次接觸模特兒、廣播與演藝等行業。13年後回流香港，Owen參加了2009年的香港先生選舉，本為大熱的他最後名落孫山，而同年8月，Owen正式與TVB簽約成為其旗下男藝人。
在TVB耕耘8年，礙於主播工作，希望參與拍劇的Owen能接拍的大多是跑龍套或戲份不多的角色，希望有所改變的他毅然決定於2017年離巢。
兩年後，以自由身身份回到TVB參與拍攝《荷里活有個大老千》的Owen直言一切都很熟悉，最大的改變是給他的待遇，從以往計騷錢到現在的一筆過片酬，薪酬漲了快約三倍，戲份更是以往最多。
據知Owen以往因多被主播工作時間限制的關係，故若要拍劇只能接到湊合和戲份不多的角色。縱然如此，他卻認為每次演出的機會都是很好的學習經驗。
Owen亦因以往拍劇的角色主要是被打，為此，他反而特登去伍允龍的功夫教室上堂，學習功夫，因而後來拍打戲時已經不用武師，自己可直接上場，故深受導演歡迎。
據了解，Owen擔任主播時有過收入非常可觀的日子，因每逢世界盃他都有大量工作機會，月入數萬供得起車又供得起樓，但他不甘於四、五十歲依然只能當個主播做些訪問，燃起他離巢得決心。
離巢後，Owen在不同平台參與拍攝和製作，如大陸劇集《聊齋》、港劇《火速救兵》、港產電影《追龍》、《拆彈專家》等等都有他的身影。
曾在加拿大從軍、任健身教練和主播的Owen入行十載，原來覺得自己最喜歡還是拍戲，同時亦不介意以邊挨罵邊工作，希望日後會有更多幾會看到Owen的演出！
延伸閱讀：
鄭則仕與太太林燕明相愛27年
現時67歲嘅鄭則仕於演藝圈拍劇多年，現已成為人人口中嘅老戲骨。然而，Kent哥出身自貧困家庭，於天台木屋長大，自小熱愛戲劇，因參加TVB舉辦嘅《聲寶片場》演技比賽，成功奪得總冠軍，而加入TVB踏上演藝路！
入行幾年，Kent哥已兼任演員、導演、監製，1985年自編自導自演嘅《何必有我》，憑飾演弱智少年「肥貓」首奪影帝，期間片約不斷，一度成為香港片酬最高嘅喜劇演員之一，不但住千呎豪宅，仲請2個工人服侍，出入揸平治！
36歲時，Kent哥遇上生命中唯一一位最愛，就是比Kent哥細14年嘅林燕明。拍拖2年後，二人1991年拉埋天窗，大擺69圍請嚟唔少明星好友。婚後嘅林燕明為老公Kent哥生咗一仔一女，自始專心相夫教子。
可惜好景不常，Kent哥因與友人合資開電影公司經營不善欠債高達1700萬，Kent哥最後賣車、賣樓兼搬去幾百呎單位，用自己以往賺落嘅片酬，以求自己還清債項！幸然，喺Kent哥人生低潮時，好老婆一直不離不棄，支持及安撫老公，唔介意一家人慢慢捱。
Kent哥曾指老婆生活慳儉，拒用名牌，仔女11歲前都係喺出口店買平衫著，並慶幸一家人都毫無怨言，齊齊為頭家努力。雖然要計住生活支出，但林燕明依然好愛Kent哥，認為跟住老公一啲都唔辛苦，仲反而好幸福！
1997年，Kent哥事業開始有起色，憑電影《三個受傷的警察》再度拿下影帝。其後為生活，Kent哥返大陸拍劇。據了解，劇接劇嘅Kent哥每日只瞓6個鐘，最終靠自己成功將所有債務還清，把自己所賺的錢交給老婆管理。
原來林燕明投資都有一手，之後幫Kent哥投資4間物業全部合共賺1300多萬！雖然一家人苦盡甘來，但依然保持慳家生活方式，據知每次一家人外出吃飯絕唔超過$200，而自己買餸煮飯更會同檔主講價！
鄭則仕憑4幕演技大爆發
依家67歲嘅鄭則仕多年拍劇無數，曾獲第5及16屆香港電影金像獎最佳男主角，以及第2屆香港電影金紫荊獎最佳男主角，演技被受肯定！
相信唔少人對鄭則仕曾扮演嘅智障人士「肥貓」都有好深刻嘅印象，不過Kent哥並冇因此而被定型，反而多年嚟不斷試唔同嘅戲路，當中有嚴肅嘅正劇、喜劇、鬧劇等，演技不斷提升到更高層次！
近日Kent哥喺《荷》嘅頭兩集已經演技大爆發，完美示範出點樣演飾多個「痛」樣，每個痛樣都足以令觀眾隔住個mon都知有幾痛，同痛又有分幾多種！
完美演釋不同的痛
《荷》第一集，Kent哥因大師兄龐峰（秦沛飾）出賣而被擒，龐峰更為弟弟報仇與Kent哥玩一局定輸贏，決定要千門事千門了！點知輸咗嘅Kent哥仲要俾華探長文雄（湯鎮業飾）用煙灰缸打斷手，睇到咁大個玻璃煙灰缸打落去都唔好話唔驚兼唔痛！
然而，Kent哥喺戲中為咗唔喺咁多人面前知到佢有幾痛，每下被煙灰缸打落去都死忍，唔會痛到嗌出聲，而Kent哥痛苦表情亦相當到位，睇到人心都痛埋一份！
其後，第二集就講Kent哥喺警局被屈打成招嘅過程，雖則呢場戲Kent哥一句對白都冇，但唔少觀眾睇到無辜嘅佢被一班警察隔簿打心口呢個過程都感到好心悒！
雖然Kent哥被警察又用拳打面又用鐵鎚打心口，但依然默不作聲，表情到位，絕對表現出盲目忍痛嘅感受！
而當大師兄龐峰探監時，已經被打至傷痕纍纍嘅Kent哥連一句清晰嘅說話都講唔到！Kent哥仲要憑身體最微弱嘅力氣問與對方之間嘅恩怨係咪可以一筆勾銷，期間當中嘅委屈及Kent哥流出嘅口水都可以話好有戲！
最後，女友百合（張慧儀飾）去到獄中探監提出分手，呢場分手戲Kent哥由重遇女友嘅喜悅表情，到後來聽到被分手嘅心痛，當中欲哭卻無淚，內心嘅悲痛絕非眼淚能表達，令人非常心痛劇中嘅Kent哥！
延伸閱讀：
《荷里活有個大老千》接力《大帥哥》
王晶監製嘅《荷里活有個大老千》噚晚接棒《大帥哥》播出，由鄭則仕、湯鎮業、秦沛等演藝圈前輩坐陣主演，劇集講述六十年代香港人嘅日常衣食住行之外，仲以賭博為劇集主線之一。
簡單同大家講講呢套劇係關於啲咩，故事講以老千技術聞名嘅「千門八將」中嘅龍四（鄭則仕飾）被華探長文雄（湯鎮業飾）與大師兄龐峰（秦沛飾）聯手設局陷害入獄，其後龍四如何報仇。
當然劇集就唔係只得報仇咁悶嘅，當中再會有懷舊、賭博、感情等元素，其中更有五大主要因素增加觀眾收看性嘅同時，亦令大家絕對唔可以錯過呢套新劇！
5大必睇原因
｜老戲骨助陣
呢套劇最有亮點就係演員陣容，劇中搵嚟兩屆金像獎影帝鄭則仕擔正做男主角，而且仲有湯鎮業、秦沛呢兩位演藝圈老戲骨坐陣，三位有幾好戲就唔洗講，淨係聽到有佢哋出演都已經令劇迷好期待佢哋嘅演出！
除咗有以上三位老戲骨，仲有多次獲得香港電影金像獎最佳女配角嘅金燕鈴同張慧儀呢兩位好戲之人出演，成功再令新劇演員陣容再錦上添花！有見及此，相信唔少觀眾都唔想錯過睇佢哋喺劇中大鬥演技嘅時刻！
｜王晶出品話題性強
啱啱就提過，今次呢套TVB賀歲劇由王晶監製，雖然有人會彈王晶有份製作嘅劇集同電影水準每況愈下，不過佢搵到咁多有份量嘅演員出演，都足以令新劇充滿話題性！
｜懷舊題材
劇中以60年代作背景，除咗講賭博外，仲加插講述懷舊味「大片場」，如果係嗰個年代嘅觀眾，應該會有更大共鳴，皆因60年代正係香港電視發展時期，想當年邵氏捧紅幾多位大明星！
另外，劇中一班年輕演員影射當年嘅大明星，例如當時嘅明星點樣上位等，所以即使係較年輕嘅觀眾都會有好大興趣睇！
｜加入新面孔出演
劇集正正因為要影射當年明星上位之路，所以就有一班年輕演員加入拍攝，今次更搵嚟公仔箱少見嘅蔡瀚億（BabyJohn）、陳雅思、「晶女郎」文凱玲等，為煲開電視粥嘅觀眾帶嚟一定嘅新鮮感！
值得一提嘅係，雖然BabyJohn喺劇中佔有一定重嘅戲份，可惜因為佢份屬蕭定一旗下，其公司與TVB有官司糾紛影響，所以喺官方宣傳方面就注定冇佢份！不過BabyJohn都好有演員責任心，皆因佢都落力喺自己IG提醒粉絲劇集已經出街！
｜尹光唱主題曲
今次TVB更特登搵嚟「廟街歌王」尹光唱劇集同名主題曲，眾所周知尹光嘅歌曲風格歌詞一向貼地兼鬼馬，今次難得搵佢唱劇集主題曲，令劇集再添懷舊60年代嘅味道！