【調酒推薦】暖胃又冧豬！5款冬天必備熱調酒

【調酒推薦】前排香港氣溫跌到單位數字，無時無刻都想飲熱嘢暖胃，順便暖埋對手。講到暖胃飲品，其實除咗一碗暖湯、咖啡或者經典嘅樽裝熱維他奶，一杯熱調酒都係唔錯嘅選擇，仲可以促進家人／朋友之間嘅關係，尤其情侶之間嘅更可以當成一種情趣。以下介紹幾款熱調酒，全部都可以喺屋企整到，睇完即刻整返杯都得！

撰文: K.P.｜圖片來源：IG、網上圖片｜資料來源：YouTube｜編輯：海月

【調酒推薦】暖胃又冧豬！5款冬天必備熱調酒

1. 西班牙熱調水果酒Sangria

講到最經典嘅家庭式調酒，非Sangria莫屬。佢係西班牙同葡萄牙傳統餐飲，主要係以紅酒為基底，加入少量白蘭地及梳打水，再混合切片或切粒嘅生果（橙、青檸、檸檬同蘋果為主，但亦可以加蜜桃、哈密瓜、蔓越莓、提子等等）、橙汁以及蜂蜜／糖漿。

最特別係，Sangria有冷飲同熱飲兩個版本，冬天作為熱調酒會先將紅酒及生果，用鍋子煮熱釋出香味嘅同時，又可以揮發部份酒精，部份食譜更會加入肉桂和丁香。Sangria簡單啲講就係一杯加咗生果嘅熱紅酒，有果香之餘亦易入口，絕對係暖胃首選！

Sangria熱調酒詳細教學：

2.熱紅茶＋Baileys奶油利口酒

Sangria雖然經典，但又要切生果又要煮，可能會嫌麻煩。得！紅茶茶包你有冇？先沖一杯紅茶，再以個人喜好加入適量嘅Baileys奶油利口酒，一杯有奶茶版嘅熱調酒就大功告成，因為Baileys本身有一定甜度，所以連糖都可以慳返。基本上兩個步驟，沖茶再加酒就搞掂，但如果想味道更明顯，建議可以先用煲煮茶，茶味會更出！

Baileys「熱奶茶」詳細教學：

3. 熱牛奶＋Gin酒

除咗Baileys版嘅「熱奶茶」，仲有一款屬於奶類嘅熱調酒。首先要準備嘅係普通盒裝牛奶，配以有驅寒功效嘅辛香料八角、肉荳蔻喺煲內煮至溫熱（注意：牛奶加熱會好易滾瀉，建議畀啲耐性用細火加熱），並加入適量Gin酒，濃郁嘅奶香同Gin酒清爽嘅風味，估唔到會咁夾，尤其睡前一小杯，保證超好瞓！

4. 熱朱古力＋威士忌

將熱朱古力飲品加入Whisky，其實即係另類版嘅酒心朱古力，冬天沖完杯「熱朱」不妨加入少量Whisky，絕對係另一個層次，一入口先會有Whisky香氣，再嚟就係濃濃嘅可可風味！至於用咩Whisky最夾？雖然冇乜限制，但建議選擇蘇格蘭以外產地嘅Whisky，因為大部份蘇格蘭Whisky都帶有「泥煤風味」（如有錯歡迎提出），用冇泥煤風味嘅Whisky，會更加順口。

威士忌「熱朱」詳細教學：

5.熱蘋果酒

最後一款係喺英美地區頗為常見嘅熱調酒，尤其節日如感恩節、聖誕節嘅出場率甚高。做法方面亦唔難，首先係煲倒入便利店有售嘅Apple Cider，加入橙皮、青檸皮及生薑片，再嚟又係肉桂同丁香，一煲過用細火慢煮10分鐘左右，然後過篩後即可飲用！

熱蘋果酒詳細教學：