「我已剪短我的髮，剪斷了牽掛，剪一地不被愛的分岔……」梁詠琪唔止首成名作係〈短髮〉，亦係圈中難得一個最襯短髮最堅持短髮嘅天后級女星。其實除咗為愛情，女星轉造型剪短頭髮亦可以係為套劇，今年就特別多女星為新角色剪短頭髮。
撰文、圖片：東方新地
黃翠如剪去17年長髮
入行17年，黃翠如留足17年長髮，今年中為無綫新劇《七公主》轉個全新造型，剪一頭短髮變身大律師，為觀眾帶來新鮮感！
頭髮陳自瑤少女味番晒嚟
2011年11月11日婚禮前夕，王浩信被爆偷食𡃁模Cammi，王浩信同陳自瑤呢一對年年傳婚變，今年第九年結婚紀念亦唔見有任何慶祝活動，反而見YoYo剪去一頭長髮晒新造型。39歲、女都8歲大，少女味即時番晒嚟！
李佳芯bob頭造型有新鮮感
新劇《智能愛(AI)人》開機，Ali李佳芯都有個全新假髮造型，由於扮演嘅係機器人，所以頭髮都唔使真剪，笠個bob頭假髮假假哋效果更佳。
鄧佩儀剪短髮後零追求者
2018年為劇集《幕後玩家》角色剪短髮，鄧佩儀被大讚同陳慧琳有幾分相似，更獲封「短髮女神」！之後佢的起心肝留番長髮，皆因佢話剪短髮後一直零追求者，但留長髮後就追求者不斷。近日鄧佩儀為新劇《逆襲人生》再次剪短頭髮，睇嚟又有排冇拖拍啦！
姚子羚短髮又型又硬朗
新劇《拳王》開拍，姚子羚飾演拳壇女強人，仲要有個好 Man嘅名叫「雷堅」，當然都要配合番個角色剪番個又型又硬朗嘅短髮。
鍾嘉欣為新劇作出犧牲
出道多年，鍾嘉欣一直都 keep住女神式長髮形象（唔計《老友狗狗》笠假髮），做咗媽媽後事隔四年再次主演電視劇，久違了的 Linda為咗新劇《兒科醫生》中嘅角色，作出犧牲剪咗一頭清爽短髮。
胡定欣英氣又專業
胡定欣宣布加盟《白色強人II》飾演腫瘤科醫生葉晴，為咗配合英氣又專業全新角色，隆重其事剪埋個新髮型。
高海寧短髮麻甩貨車司機
無綫新重頭劇《 七公主 》集齊七個花旦同小花演出，大公主翠如同二公主高海寧都係為角色剪短頭髮。高 Ling 喺劇中飾演麻甩貨車司機，嘗試唔 sell 樣唔賣身材。
陳靜大膽剪去一頭長髮
08年出道時以純情面孔魔鬼身材打響名堂，經過12年歲月洗禮和磨練，DaDa陳靜更有個性更具內涵。今年大膽剪去一頭長髮，話一向為配合角色至留長髮，呢個先係真正嘅自己！
劉穎鏇健康爽朗又sporty
當選港姐後一直以長髮示人，上月劉穎鏇突然話「係時候改變」，轉新形象將頭髮剪到及肩。其實23歲女、形象一直健康爽朗又sporty，短髮仲襯佢啦！
鄭融運動型小野貓個性
鄭融今年八月突然剪去長髮，其實襯晒佢個運動型小野貓個性，對於對慣廿年長髮嘅歌迷嚟講，亦夠晒新鮮感。