【重拾狀態】C朗大四喜，成頂級聯賽「帽子戲法之王」！

全場比賽精華

尋晚西甲進行左多場比賽，其中皇馬以6：3大勝基羅納，而其中C朗拿度先後喺11、47、64及90分鐘取得入球，個人上演大四喜，令佢今季喺西甲嘅入球數黎到22球，排名第二位，僅落後比攻入25球嘅美斯。

如果你有留意上半季嘅C朗，如今嘅佢完全係另一個人一樣，上半季嘅C朗完全陷入低谷，前12場西甲比賽佢射門55次只係攻入1個入球，而整個上半季西甲佢亦只係交出4個入球。亦即係話，C朗喺下半季目前已經攻入18球。

下半季迎來爆發嘅C朗，直接令皇馬實力大增，雖然目前聯賽仍然落後巴塞15分，但佢地已經殺回前三，並且只係落後排名第2位嘅馬體會4分，絕對有機會從後趕上奪回第二位。歐聯佢地亦成功淘汰巴黎聖日耳門殺入賽事八強，再加上C朗喺歐聯表現特強，所以佢地絕對有機會連續第三年奪得冠軍！

再睇番C朗岩岩取得嘅大四喜，呢次亦同時係佢喺西甲第34次(今季第3次)取得帽子戲法嘅比賽。34次聯賽帽子戲法令C朗成為歐洲頂級聯賽入面做出最多帽子戲法嘅球員，而排名第二位嘅就係32次嘅德國轟炸機梅拿。另外，美斯則以28次帽子戲法排喺佢地身後。

要喺一場比賽取得帽子戲法絕對唔係一件易事，但C朗就經常好似食生菜咁食，佢亦都同時喺歐聯做出最多帽子戲法嘅球員，一共7次，與美斯同列第一位。