TVB最近熱播的電視劇《好日子》以圍村作背景的故事，由陳煒（煒哥）、黃智賢及張達倫等主演。51歲黃智賢（Ben）捱足30年電視台，由兒童節目組主持《閃電傳真機》做起，多年來喺戲劇組都係徘徊喺二、三線之間，浮浮沉沉，近年總算叫做捱出頭來，愈嚟愈多劇有得擔正，《好日子》中再擔大旗做第一男主角。事業穩打穩紮，愛情亦都一樣細水長流，黃智賢同太太相愛29年，兩公婆一早有共識唔生B，全心全意錫晒老婆一個，絕對係個好老公！
編輯：Sunday Kiss｜原文：東方新地｜圖片來源：新傳媒圖片庫，黃智賢微博，黃智賢Instagram
《好日子》黃智賢 捱30年升呢做男一
入行30年的黃智賢，由兒童節目主持人做起，近年開始升呢做男主角，喺新劇《好日子》佢飾演的齊萬基性格吊兒郎當，被齊家村的村民排斥，不過現實生活中黃智賢是個用情專一、錫老婆的住家好男人！
陳煒爆黃智賢供女友讀書
在《好日子》同黃智賢有很多對手戲的陳煒，早前出席宣傳活動大爆Ben有段時間玩股票蝕了20幾萬，雖然如此，但他當時仍堅持借拍緊拖的女朋友(現在的太太)到外國讀書，完全係出於「愛」。黃智賢表示現在的財政大權全交由老婆管，同埋佢已轉買藍籌股，好穩陣喎！
《褔爾摩師奶》都孭重飛
黃智賢喺較早前嘅無綫懸疑查案劇《褔爾摩師奶》中戲份好重，飾演祖迪得力管家關一夫，二人展開緝拿油麻地妓女連環殺手之路，同樣被讚好戲！
黃智賢係癡心情長劍
平日黃智賢入廠趕劇冇乜時間陪家人，但劇集一煞科就自由得多，黃智賢仲會化身住家男買餸煮飯，佢早前被本刊拍得去咗將軍澳買定餸仲買埋花，然後親自揸車接老婆大人返屋企玩煮飯仔！29年嚟兩公婆恩愛如惜，全因呢位愛妻號肯花心思氹老婆囉！
拎到一袋二袋原來仲未買夠，行完藥房又見黃智賢折返街市去咗幫襯花店，二人世界果然夠晒情趣。
買齊嘢時間啱啱好，黃智賢驅車去附近上落車位，果然見到黃太已經企定定等候。
黃智賢固然食咗防腐劑一樣仲同當年《真情》阿海一個樣，四十多歲黃太亦都keep得好，身材好fit仲有一雙長腿㖭。
與太太拍拖14年 結婚15年
黃智賢同任職OL嘅太太結婚多年依然好恩愛，黃智賢話過最鍾意每日朝早送太太返工，因為車程中就係二人可以傾計的時間，而他平日夜晚拍廠景時，回家太太已睡，而再奢侈一點就是二人一齊食lunch，他唔使開工時都愛揸車接太太放工！
黃智賢透露和太太的愛情故事是由廚房開始，很久以前他在餐廳做廚房partime，負責送菜出窗口，而太太當時是waitress，二人透過小窗口對望生情愫！直至有一天，黃太見Ben的鑰匙扣殘舊，便送上新的，二人就這樣開始了情緣，直到2004年他們去紐西蘭旅行期間註冊結婚，這是由於二人都愛簡單不愛舖張！
有共識唔生B
拍拖14年、結婚15年，黃智賢一直都好保護老婆，太太早年被傳媒追訪時，佢曾經表示：「佢係圈外人，冇心理準備，我老婆好細膽又怕醜，過往好少同佢出席首映同飯局。我作為老公要保護老婆，佢係OL唔想引起太多話題，要搞就搞我！（點𠱁番老婆？）將佢嘅相影得靚啲，唔影都影咗，可以點？」黃智賢話同老婆結婚三年後已經傾過，諗好咗唔會生BB：「大家都知對方性格唔啱做爸爸媽媽，覺得責任好大，我哋冇呢個耐性，而且香港嘅教育制度或者社會，都令我冇安全感，唔覺得適合有小朋友，我視太太為『唯一』就夠。當然意外有咗又係另一樣嘢，個天畀你又唔同。我哋決定咗之後都冇再諗小朋友嘅嘢，反而會諗冇小朋友嘅好處，我覺得『無憾』就係唔好反反覆覆去後悔。」
養狗代B
黃智賢家中養咗兩隻可愛狗仔，分別係摩天使女Cream Cream同T-cup貴婦女Pepper，依家已經六歲，冇生B計劃嘅黃智賢夫婦都當正佢哋係自己仔女咁錫到燶，不過原來黃智賢當初想養嘅係大狗，會養細狗全因遷就太太：「太太驚大狗，而且細狗易啲打理，就算唔得閒放狗，佢哋都可以自己喺屋企玩。至於揀狗女亦都係太太嘅意思，因為狗女嗲啲，又得意！」
鄭嘉穎教識打網球
黃智賢熱愛運動，接觸網球已有十年，不時相約鄭嘉穎、郭晉安等波友一齊打網球，佢話：「之前係打羽毛球嘅，但一直好想學打網球，都係識咗嘉穎之後佢教我打，最初我用咗好多打羽毛球嘅習慣打網球， 同埋好唔慣網球飛嚟飛去，估唔到個速度，依家我淨係打網球，鍾意網球夠powerful，減壓發洩好好！打波出一身汗，有傾有講， 同水準接近嘅對手打，來回板數多，好開心！」
第一代《閃電傳真機》主持
黃智賢初出道係兒童節目《閃電傳真機》嘅第一代主持，當年同佢同期嘅主持除咗有譚玉瑛姐姐，仲有「麥包」麥長青同黎芷珊，依家四人都有不同成就，各自捱出頭。
《真情》彈起
黃智賢自1995年開始演出長壽處境劇《真情》「阿海」一角，與張慧儀飾演嘅兩個角色「彩瑤」同「阿貴」都有感情線，開始為觀眾所熟悉。
《翻生武林》 演狡詐東廠
早年的電視劇《翻生武林》中，黃智賢飾演東廠仇不群，將參加新晉英雄大賽嘅玉雲龍（蕭正楠飾）收入監牢，嬌鳳（簡慕華飾）救弟心切，暗中放風指客棧有隱世寶物，不群不單立即釋放雲龍，更派出左右手仇在心（陳凱琳飾）跟隨玉雲龍到客棧收取情報，此事亦引來各路隱世英雄一一湧現，各施奇謀，期間令一直尋找殺害雙親嘅仇在心發現真相，倒戈相向對付仇不群，更與玉雲龍產生感情，決心一同改革武林，令本已奄奄一息的武林再現生氣，但二人卻陷入本是慈悲老人嘅任我飛（姜大衞飾）籌謀已久嘅復仇大計中⋯⋯