【摩天輪開騷唔賣飛】應承要回饋香港 陳奕迅採實名制 邀基層青年欣賞

陳奕迅（Eason）噚晚去咗商台，同DJ細So主持《1872陳奕迅》，喺節目度佢哋會接聽聽眾電話，又會邊彈結他Jam歌，同時Eason仲宣佈喺下個月27號，聯同the duo band喺中環摩天輪舉行一場慈善音樂會，所有門票不會公開發售，只會預留小量門票俾聽眾。

Eason話：「因為我應承咗要回饋番香港，所以呢個騷係唔會賣飛，不過喺程序同技術上有好多好煩嘢，本來真係諗過捐錢就算，點知突然間場地嗰邊又話得喎，真係皇天不負有心人，到時會邀請慈善機構嘅受惠者，一齊喺摩天輪下面睇騷。」Eason仲搞笑話：「今次我係喺核心內圍開騷，不過內圍同外圍呢啲嘢，要問吓明福俠先得，多謝佢啲月餅，好正，從來未試過收到明福俠嘅月餅。」

講到個騷獲邀嘅對象，Eason話：「全部都係年青人，其實個場地只係容納千幾人，香港可能有啲人係冇時間，又或者冇能力睇騷，所以想俾佢哋一啲正面嘅選擇，呢件事係好過癮，我哋今次啲歌又好正面，所以邀請係好過賣飛！」佢仲話：「到時入場係要對名，電台觀眾可能有少量門票，曾經有諗過不如SET啲門票係賣出去，之後將錢捐番出去，但係最後決定全部唔賣飛，唔想講錢。」

唔知到時佢又會唔會唱大聲啲？Eason話：「呢個要睇吓點樣控制音量同分貝，到時要互相協調。本來諗住喺暑假搞，但係又怕打風，又怕熱到暈。」佢仲笑笑口話：「你當今次做啲實驗性質嘅嘢，遲啲會做番啲好商業演唱會，當係平衡吓收支，搵番餐晏仔都冇問題。」

資源方面，Eason話：「只要我哋用心做好啲好細微嘅嘢，心存好事，正能量就會散播開去，總之成件事唔想講錢，做得開心就冇問題，唔使擔心我。」之前Eason曾經講過，希望可以關注患情緒病嘅人，但係今次考慮到聲音可能會刺激到佢哋，所以留番下次再做。至於今次做限定主持，Eason話：「係，不嬲冇界線，但唔係打電話上嚟就有飛攞，要睇吓佢係咪有愛嘅人。」

精選娛聞，喺晒《娛果》
http://fb.com/appledailyent