《繩角》AK、Lokman鬥騷肌 細數「歷代」拳王張家輝地獄式節食最狠

MIRROR休團兩個月復工，ViuTV由上個月開始已經起勢催谷12子主演的新劇為他們造勢，繼Standley、Frankie的《野人老師》、姜濤、Ian的《季前賽》後，今個星期就有由AK同Lokman主演、以拳撃作主題的《繩角》，兩位隊長為新劇仲操到Fit一Fit，誓要搞到一班鏡粉在電視機前面叫破喉嚨。其實以拳撃作主題的港片多不聲數，更有不少天王巨星做過「拳王」，今次就同大家盤點一下，順便看看邊個身材最令觀眾流口水。

AK

AK今次在劇中飾演歐陽駿一角，因為一次意外走入拳館而認識到由Lokman飾演的李承東，更成為拳手代表梁祖堯的拳館企上擂台。向來都不吝嗇騷肌的AK，繼之前為內衣品牌騷身材之後，今次在劇中繼續大放送，在預告片入面見到AK打多一排六嚿的朱古力腹肌，淨看線條已經感受到有幾結實，相信一開劇好多鏡粉們都會在電視機前面流曬口水。

Lokman

已經不是第一次做主角的Lokman，今次在劇集入面做AK師兄教對方打拳，仲有一場兄弟對戰，令鏡粉興奮不已。不過最令大家期待的，當然是Lokman落力操完Fit的「成果」。對比好兄弟AK，Lokman平時就錫身得多，頂多試過在演唱會上半裸騷過肌，當時令現場的鏡粉們都為之瘋狂，今次在劇集入面Lokman都唔執輸同AK撼過，雖然未見六嚿腹肌，同胸肌就同樣結實有線條，未知之後幾集會唔會見到更驚人的好身材！

《激戰》張家輝

講到拳激港片，不得不提由張家輝和彭于晏於2013年主演《激戰》，張家輝在片中飾演曾是香港西洋拳王程輝，因為後生時打假拳而入獄，之後再踏上擂台。向來瘦削的他當年為電影操出一副MMA選手的身材日操夜操，更自爆調節飲食辛苦到爆，起初鹽、油、糖、澱粉質全冇，只吃白烚雞肉、魚，去到中段開始日吃20至30隻蛋白增加體內蛋白質，到拍攝前淨食3日白飯，菜和肉都冇，去到最後階段要脫水，飲水時只可以嘴角輕輕沾下，收出線條。雖然「飲食生活」尤如地獄一樣，但張家輝最後成功得到一副令所有男人都羨慕的身材。

《阿虎》劉德華

天王劉德華早在20年前都做過「拳王」出演經典港片《阿虎》，飾演一名香港自由搏擊拳手孟虎，為了搵錢抱著「打假拳」的心態參加泰國「亞太之王拳王大賽」，卻意外打死對手而以誤殺罪被判入獄服刑13年。雖然劉德華當時未有操出一排朱古力肌，但黑黝黝的鋼條身型同樣令觀眾眼前一亮，加上他當時留了鬍鬚，男人味大爆發。當年劉德華更憑電影提名第20屆香港電影金像獎、第7屆香港電影評論學會大獎最佳男主角，最終奪得第六屆香港電影金紫荊獎最佳男主角獎。

《浪漫風暴》郭富城

舞王城城郭富城早於1996年在港片《浪漫風暴》都有扮演過拳王，更同女神李若彤做對手戲！戲中城城所飾演的Ken在爸爸眼中是個不務正業的兒子，出身學術世界的他獨愛運動，機緣巧合下認識了Gloria（李若彤　飾）而成為自由搏擊拳手，更被過氣亞洲拳王洪金寶看出拳擊潛質成為屢戰屢勝的冷酷拳手。由出道至今都維持住好身材的城城，在戲中同樣非常誘惑，不過其美少男樣更令觀眾心動！