香港人嘅話題總係離不開食乜好去邊好，由其係去一啲多人嘅商場，更加揀唔到！有見及此，小編決定由九龍灣開始嚴選8間餐廳！喺淘大、徳福同埋Megabox搵一啲CP值高嘅餐廳，等大家出街食飯嘅時候多幾個Plan嘅Option，再講吓有啲咩必食menu同位置等實用評價。唔想錯過一啲嘅好餐廳就碌落去睇吓喇！
圖片來源︰Openrice、餐廳官方Facebook｜撰文︰Debbie
九龍灣美食推薦（1）- 豚丼のぶたはげ（ButahageHK）
餐廳以丼飯料理為主，招牌菜除咗有「帶廣名物稀有豚丼」、仲有「月替海鮮丼」。前者選用咗最優質嘅豚肉 －「かみこみ豚」，肉質幼嫩軟滑，高溫烘烤鎖住肉汁，再配搭超過80年歷史嘅秘製祖傳醬汁，令人一試難忘！而後者就係餐廳每個月都會提供時令嘅限定海鮮丼，有鰻魚、特上天丼等，為食客呈現滋味丼飯！喜歡食飯嘅朋友記得去試吓呀。
《豚丼のぶたはげ》
地址：九龍灣偉業街33號德福廣場1期地下G54A2號舖
電話：27170988
營業時間：11:30 – 22:00 (因應新冠疫情營業時間可能有變)
九龍灣美食推薦（2）- 荳子（Beans）
相信大家對Beans呢間咖啡店都唔陌生㗎喇，皆因除咗九龍灣仲有7間分店遍佈港九新界！生意越做越大除咗係因為CP值高之外仲因為入面嘅食物好啱香港人口味啊。Beans主打西式Fusion料理，有輕食有意粉、特飲同甜品，就連散水餅同茶餐廳都做埋，業務可以話非常多元！雖然Beans好多嘢食都高水平，但最得小編心都係呢兩道菜！
左邊係「黃金蟹肉意大利粉」，意粉非常掛汁，雖然蟹蓋唔食得但賣相已經贏晒！唔好睇佢好似好細碟，其實好飽肚㗎。而右邊係非常邪惡嘅「Oreo麻糬流心吐司」！切開個包，Oreo饀會慢慢流出，吐司口感鬆脆麻糬煙韌，配Oreo啱啱好！仲要一啲都唔貴，甜品嚟講真係超水準。
《荳子 Beans》
地址：九龍灣偉業街33號德福廣場1期P39A號舖
電話：25580230
營業時間：8:00 – 22:00 (因應新冠疫情營業時間可能有變)
九龍灣美食推薦（3）- 洪瑞珍
台灣過江龍「洪瑞珍」自從上年開咗第一間分店之後就陸續喺唔同地方都有佢哋嘅據點，徳福就係其中一處啦！依家已經新增至有9款口味，其中滿漢同柑桔柳橙起司仲係店入面嘅人氣之選添！洪瑞珍三明治點解咁特別，因為佢哋用咗秘製沙律醬同忌廉，以甜味作基礎再進行變化，令到口感同味道更加豐富！
《洪瑞珍》
地址：九龍灣偉業街33號德福廣場一期地下G96-97號舖
營業時間：11:00 – 21:15 (因應新冠疫情營業時間可能有變)
九龍灣美食推薦（4）- 釜之魂釜飯專門店
呢間走平民路綫嘅日式釜飯專門店，主打汁燒及鹽燒鰻魚釜飯，店主自設鰻魚養殖場，鰻魚自給自足所以特別肥大肉厚！白飯選用愛知縣越光米去煲，所以食落香甜仲好有彈性添。午餐時段仲大大份，連前菜、湯及飲品，非常抵食！
圖左係「汁燒牛肉釜飯」，未食已經聞到牛肉很香，食落口感好軟熟！咁厚嘅牛肉竟然咬落去完全唔韌易仲要無筋，真心高質！圖右係餐廳招牌「金魂蒲燒釜飯」，鰻魚肥大兼厚肉，油脂會多啲亦比較滑身，燒汁處理得好好，唔會俾得太多搶走鰻魚鮮味～望住個Mon都feel到好香好想食呀！
《釜之魂釜飯專門店 》
地址：九龍灣牛頭角道77號淘大商場三期地下G286-288號舖
電話：23666028
營業時間：12:00 – 21:00 (因應新冠疫情營業時間可能有變)
九龍灣美食推薦（5）- 日日香鵝肉飯店
同樣地，呢間餐廳同Beans一樣分店遍佈全港，亦係少有以滷水鵝肉為特色嘅連鎖餐廳。餐廳創始人為滷鵝世家，所以特別鍾情呢款料理，加上先前係自家街坊店已經賣到出哂名所以經重新包裝之後就有咗「日日香鵝肉飯店」呢個名啦！小編住九龍灣都時不時見到呢間店鋪排隊買鵝肉，想同屋企人食一啲打冷菜都可以試吓買返去加餸呀。
鵝肉肉質都幾新鮮，咬落去淋身仲啖啖肉添！唔會太韌又唔會有白色肥膏，滷汁味道剛剛好，用作撈飯認真唔錯！其他招牌小食仲有豬手鵝腎，同樣出色仲好入味㗎！
《日日香鵝肉飯店》
地址：九龍灣牛頭角道77號淘大商場二期地下G254號舖
電話：66881344
營業時間：11:00 – 22:00 (因應新冠疫情營業時間可能有變)
九龍灣美食推薦（6）- 竹虎京堂
「竹虎京堂」係香港首間以竹為概念嘅餐廳。主打竹筒飯、丼飯、蕎麥麵、天婦羅、等多樣日式套餐，唔同時段亦有多款套餐供應㗎！當然竹筒飯先算得上佢哋嘅招牌菜啦！餐廳深受客人歡迎除咗係竹筒飯喺香港唔太普及外，仲因為用料講究，白米飯都係沿用日本北海道「星丸米」。米粒飽滿之餘，軟硬度同黏度平衝都同竹筒嘅化學作用相輔相成，繼而就變成一道道香氣逼人嘅美食喇！
圖左係「三文魚籽貝柱竹筒飯定食」。一個套餐大約有5款小菜，貝柱同三文魚籽嘅鮮味加上暖暖嘅米飯，食落個口感真係好豐富呀！打卡嚟講呢個份量亦都足夠，貝柱同三文魚籽佈滿咗係竹筒飯面，令人食慾大增添。右邊係「火炙穴子竹筒」。穴子係即叫即燒，成條鋪滿係個竹筒飯面，唔單止視覺效果一流連味道都好出色㗎！
《竹虎京堂》
地址：九龍灣宏照道38號Megabox 10樓4號舖
電話：21772108
營業時間：11:30 – 23:00 (因應新冠疫情營業時間可能有變)
九龍灣美食推薦（7）- 時計珈琲工房 TOKEI CAFE
「時計珈琲工房」係啱啱年中新開嘅咖啡店，主打手調特式珈啡同西日料理以及港女至愛嘅打卡聖物-甜品！門面採用咗TiffanyBlue擊中少女心嘅顏色非常吸睛，再加上開放式嘅甜品櫃，試問有邊個女仔忍到手唔入去幫襯呢？
唔好以為佢係一間普通Cafe咁簡單！佢地會利用有機原材料，推出嘅產品都會以公平貿易、本地生產以及新鮮無添加為原則去經營呢間可持續發展嘅社企。女士們亦都唔洗擔心甜品太重負擔唔健康，因為店家賣嘅係自家烘焙麵包同低糖蛋糕，保證健康兼誠意十足㗎！
《時計珈琲工房TOKEI CAFE》
地址：九龍灣宏照道38號Megabox10樓8號舖
電話：2716 2326
營業時間：11:00 – 21:00
九龍灣美食推薦（8）- The Point Pizza & Pasta
The Point Pizza & Pasta為大型連鎖意大利餐廳，最為人所知當然係最出名嘅即叫即製手工Pizza啦！Megabox 分店比起其他用餐環境，空間更加廣闊同舒適，無論係情侶撐枱腳或大型聚餐都係一個幾好嘅選擇！餐廳亦都有各式各樣嘅菜單同套餐，而當中最招牌就係龍蝦Pizza喇！
圖左係「原隻焗釀龍蝦Pizza 」，每一片pizza上面都有厚肉嘅龍蝦肉，加上有龍蝦頭放pizza面，氣勢十足！右邊就係「石板美國牛肩扒配炸薯條」。熱辣辣嘅石板上牛肩扒，睇住佢由生變熟，食落肉質柔嫩多汁，牛味濃郁。無論配黑椒汁，或者就咁放粗鹽，都非常好食！
《The Point Pizza & Pasta》
地址：九龍灣宏照道38號企業廣場5期Megabox11樓10號舖
電話：3168 6006
營業時間：12:00 – 21:00
介紹咗咁多餐廳，下次嚟九龍灣就唔怕搵唔到好西食啦！
相關文章：【10種減肥不能吃的高熱量食物 XX居然都唔食得】
——————————————————
Follow 我地睇更多最新情報！
Facebook – SAUCE – 為生活加一點味道
Instagram – sauce.media.hk
MEWE – SAUCE – 為生活加一點味道
Website – https://saucemedia.net/