獨家｜張繼聰周秀娜「隔離」中感受愛 兩顆寂寞的心相逢在澳門

從「?模」成功轉型為演技派的周秀娜，早年憑電影《29+1》入圍第37屆香港電影金像獎角逐「最佳女主角」。周秀娜（娜姐）與張繼聰於電影《馬達．蓮娜》再度結戲緣，上演一段在澳門發生的愛情故事。再有機會問鼎影后寶座，拍檔張繼聰早已視娜姐為一線女星，嚇得她神色尷尬說：「乜一線呀！好驚呀！」娜姐揚言拍一部戲會睇自己對個角色有無感覺，亦不會諗「攞硬獎」，不過張繼聰睇好娜姐，熱捧她為心中「最佳女主角」。
張繼聰與周秀娜（娜姐）主演電影《馬達．蓮娜》中，講述張繼聰飾演失婚的士司機「馬達」與周秀娜飾演努力賺錢的單親勞工「蓮娜」，兩人在澳門相遇的愛情故事。經常演搞笑角色的張繼聰，今次一改戲路，戲中的他半點搞笑成份都沒有。張繼聰坦言加入新公司後，希望一改戲路，他認為演員隨着年紀不同亦可嘗試不同角色，以前曾演過搞笑、好癲的角色，但自覺現在的年紀已過，而現今有好多新演員能夠演搞笑角色做得好，所以想體會飾演成熟的角色。他說：「我以前讀演藝學院主要演戲，在TVB時會演喜劇，我都想試認真的戲路，古天樂就話有新戲搵我做，就係跟周秀娜演繹在澳門發生的愛情故事。我睇到個劇本咁認真，即刻?飯應！呢部戲我覺得好好的磨練，無出人意表劇情，其實好平淡愛情故事，望去街上好多都係馬達同蓮娜，但在於演員身上先係挑戰大，因為要變成普通人，前期要做好多功夫，今次同娜姐並唔係演，而係變成個角色，希望觀眾一睇落去就係馬達同蓮娜，想睇呢兩個人，今次花好多時間跟導演傾咗成兩個月。」
由日頭坐到黃昏
由於該片在澳門取景拍攝，張繼聰與周秀娜開拍前在當地接受二十一日隔離，兩人趁着隔離期的時間每日都傾談劇本。張繼聰笑言這段隔離期間每日都專心諗角色，好似請童上身變到角色出來，音樂上對他來講都有所幫助，當中會聽一些古典音樂幫助投入角色，就會不停勁聽。他說：「個角色係好寂寞的人，我會想像寂寞係點呢？我坐響度唔郁由日頭坐到黃昏，當諗到就會寫響劇本上，會創造好多馬達同蓮娜的回憶，好似寫小說一樣。」戲中飾演的士司機的張繼聰，一身麻甩打扮亮相，跟現實中的他喜歡潮服打扮示人，簡直般若兩人。張繼聰笑言造型上對角色十分大幫助，試過在澳門有不少民工出現的地方拍攝時，走到一班民工旁邊拍照，就連周秀娜睇完也認不出相中有他。他說：「我企響度戴住口罩唔郁，都係扮緊睇周秀娜拍戲。我又試過響條街坐響的士度，有澳門居民行過話：「你真係好似的士司機喎！」其實澳門啲路駕駛到熟晒！」在旁的娜姐笑指不明白張繼聰的服裝與民工同樣穿着同一色系服裝。
難明白做母親心情
戲中的周秀娜演繹努力賺錢的單親勞工，她坦言生活當中可能好多這類人，但最大難度是現實中自己未成為人母，好難明白做母親的心情，不過她也試過移民及寄人籬下，而在澳門開拍前接受二十一日隔離，覺得過每一日對角色有好大感受。她說：「今次角色初期係為一個男人而嚟到澳門，完全為愛情，我接受隔離時就會諗去到呢個陌生地方，得自己一個人、無得出街、乜人都唔識又無錢！只得一個男人，我覺得自己響酒店就係等緊嚟幫我探體溫的人。哈哈！」本身籍貫潮州的娜姐，在戲中有講潮州話戲份，但她笑言毋須練習，但拍戲時並非有人以潮州話跟她對話，亦無人知她講潮州話對與錯。她說：「拍攝時副導演響側邊用廣東話對白跟我對戲，雖然自己講緊家鄉話，但感覺怪怪地。」
車震都幾舒服
張繼聰與周秀娜在戲中上演一場的車震戲份，張繼聰強調並非賣弄色情，只是講述所演的角色曾被欺騙，當遇到蓮娜這個女人，令他重新有希望，亦感受到還有人愛他。不過拍攝時天氣寒冷又鄰近海邊，他跟娜姐在車廂內拍親熱戲，車廂內地方細，大家既要屈住對腳又要親熱，不過辛苦未及攝影師，因為攝影師躲在車廂後坐的罅隙拍攝。他說：「香港當時已經好凍，但澳門仲凍！大家睇到我着住對涼鞋，每次着對涼鞋着落街幾隻腳趾好似冰條，拍呢場戲其實幾舒服，唔roll機就開暖氣，但一班工作人員係着緊羽絨褸成個雪人咁㗎！」
張繼聰過往跟周秀娜過往有不少合作，兩人更曾合演喜劇題材電影《女皇撞到正》。今次兩人再度結戲緣，演繹愛情題材電影，娜姐大讚張繼聰不嬲好演技，但發覺對方改變好大，因為之前合作的戲路大多喜感為主，雖然大家有合作，但好少同場演出，今次則合作主要圍繞馬達同蓮娜的愛情故事，故好多戲份與張繼聰做對手戲。她說：「其實第一次試造型見到張繼聰，唔會令我聯想到我以前同佢合作搞笑的感覺，佢不嬲拍戲準備功夫做得好足，除了戲外得閒搞下笑。今次大家的角色都好壓抑，在適當時候張繼聰都會調節個氣氛。」張繼聰則認為女人在不同年紀的階段有不同的美麗，而現在的周秀娜進入擁有女人味的階段，但並非打扮出來，反而經過人生閱歷滲透出來，更認為娜姐在戲中的表現，相信觀眾會睇到娜姐好多新的可能性。
我唔會諗攞硬獎嘛！
被稱為「?模」始祖的周秀娜，為了擺脫「?模」形象收起性感，多年來轉戰影視界，以演技成功轉型，更憑電影《29+1》入圍第37屆香港電影金像獎角逐「最佳女主角」獎。由周秀娜與張繼聰主演的電影《馬達．蓮娜》繼早前獲邀成為第23屆意大利烏甸尼《遠東電影節》競賽電影後，亦成為《香港亞洲電影節2021》的開幕電影，繼而再被邀請參加日本《日出國際映畫祭競賽單元》，可見備受關注。近年專注電影事業的周秀娜，談到可有信心憑電影《馬達．蓮娜》勇奪影后殊榮？她說：「我接部戲睇劇本時，當然無諗獎呢樣野，成日覺得拍一部戲都係睇自己對個角色有無感覺，睇到時個腦海呈現幾多畫面，鍾唔鍾意或吸唔吸引到自己！我收到好蓮娜角色係覺得有好多不同嘢畀觀眾睇，我好少拿到劇本發覺個女仔角色咁詳盡描寫，之前某些角色都唔會着重講段關係！你問我有無諗得獎？我唔會諗攞硬獎嘛！」張繼聰笑指拍檔周秀娜現在貴為一線女星，娜姐聞言說：「乜一線呀！好驚呀！」問到對拍檔娜姐可有信心憑該片得獎？張繼聰力捧娜姐做影后，便說：「梗係有信心啦！」
撰文∣鄺芷瑩 攝影：譚志光
原文刊於《星島日報》名人雜誌（逢周日見報）