現為TVB藝人及武術顧問嘅李嘉，自細開始習武，佢喺台慶劇《大帥哥》飾演張衛健好兄弟「冬來」一角成功入屋，之不過眾所周知大台人工低藝人收入有限，為咗生活好多時都要兼職或自己開舖增加收入。李嘉都唔例外，佢除咗開店、拳館，原來仲兼職做埋保鑣，日前佢被發現喺機場為韓星崔始源護駕開路，不過李嘉直言做保鑣時非必要唔會用武力！
撰文：東方新地｜圖片：電視截圖、李嘉微博、新傳媒圖片
李嘉為崔始源做「明星保鑣」
唔講唔知，原來李嘉一直有做藝人以外的工作，包括保鑣及曾做過輔警，而佢亦曾經為荷里活巨星做保鑣。雖然功夫了得，但李嘉就表示：「盡可能不使用武力去解決問題，懂得臨場應對較為重要。」而早前崔始源來港，大會安排保鑣開路，李嘉被發現係保鑣之一！佢事後接受訪問表示早在十多年前做輔警時已跟這間保鑣公司合作，後來成為藝人也有客串做保鑣，只是大家不察覺而已。
崔始源在機場現身前後不過15分鐘，到底做保鑣薪酬有幾多？李嘉拒絕透露，但直言隨時好搵過做藝員。據知，做明星保鑣的酬勞以時薪計算，但時薪最少也有一千元，而每次出動的最底要求為4小時，即係話李嘉當日為崔始源做保鑣約賺4千元，又真係好吸引。
抵港臨上車前，崔始源同fans自拍，保鑣李嘉也被攝入鏡！
做足19年配角近年捱出頭
今年35歲嘅李嘉唔講唔知原來已經入咗TVB 19年，不過多年嚟都只係做唔起眼嘅閒角，如賓客、侍應、大隻男等角色。
直至2010年，李嘉喺《巾幗梟雄之義海豪情》飾演日本人黑木少佐，李嘉終於有屬於自己嘅角色名！由於李嘉飾演一個日本軍人，有日文對白，當時更獲網民讚佢發音標準，可惜該角色早死，未能令佢有所發揮！
而直至近年嘅《城寨英雄》，李嘉飾演一位城寨惡霸馮夏滿，成功令大家對佢嘅印象再次加深！皆因劇中佢侵犯林穎彤飾演嘅鑫鑫，將猥瑣賤格演得入木三分，網民除大讚演技了得之外，拳拳到肉嘅真功夫更係打得出色！
李嘉憑表情交到戲
在《大帥哥》除咗主角張衛健好搶鏡外，飾演冬來嘅李嘉雖然極少對白，但就有好多觀眾激讚佢單靠表情已交到戲！
身型粗獷嘅李嘉喺劇中不但扮演一個唔多出聲嘅營長，加上可能要扮一個為人內斂嘅人，所以佢喺劇集對白唔多，但勝在怕醜表情交足戲，表現出單純天真嘅性格，其演出再次令人眼前一亮！
感激張衞健一路扶持及鼓勵
最近，李嘉擔任訪談節目嘉賓時，直言自己係位忠實粉絲：「我見到佢（張衛健）第一刻係嗰種粉絲見到偶像嘅興奮，又唔敢過去，又好想過去攬住佢嘅感覺，最後我都錫咗佢個頭一啖！」，完全係個小粉絲嘅行為，非常可愛！
雖然係個小粉絲，但提到張衛健，李嘉就以前輩及大哥尊稱，非常有禮。同時，佢表示自己好欣賞對方會用心思鑽研劇本及帶動對手，亦認為對方好專業及好照顧台前幕後工作人員嘅情緒，皆因張衛健會嘗試營造一個開心嘅工作環境俾大家，例如喺廠設小食部免費供應小食及生果！
李嘉喺訪問中，亦不忙感謝張衛健喺拍劇嘅時間及於佛山時，大家互相扶持同鼓勵，令大家好似一家人！同時，李嘉更直呼有幸同張衛健合作拍劇：「我好幸福啊！」。
俄羅斯女友患腦瘤 「功夫狂人」李嘉接拍多部微電影為幫補醫藥費
「功夫狂人」李嘉早前返內地工作時，喺火車上邂逅俄羅斯女友Yana Kobza，二人好快就發展異地戀，李嘉間唔中都會飛去當地搵女友。
拍拖半年嘅李嘉最近飛到去女朋友家鄉見家長，一齊玩煮飯仔又玩射擊，睇落非常開心。
李嘉仲同女友家人自拍，相信喺TVB劇都未見過佢溫柔一面，呢張真係顯得好融洽啊！
甜蜜背後，原來都有苦澀故事。女友上個月不幸發現腦部有腫瘤，今個月就要接受手術。李嘉表示女友接受緊治療，而家唔知腫瘤係良性定惡性。好可惜係劇集《大帥哥》就快出街，宣傳期同做手術嘅日子撞晒，李嘉話一有時間就會飛過去。
除左拍劇同教功夫，原來李嘉都有經營飲食生意。不過為咗可以有多啲時間陪女友，李嘉已經辭去餐廳股東職務，再接拍幾部微電影希望可以幫補下醫藥費。