TVB劇集《奪命提示》本周有三大新角色登場，分別是女神級小花葉蒨文（Sophie）飾演的子瑜（鍾嘉佑飾）親生媽咪劉惠芳、張彥博飾演的「頭盔男殺手」凌烈、及莊易羚飾演的「狙擊殺手女」韓楓。韓楓這個角色不但樣子亮麗，而且身手不凡、型格有氣勢。在薩卡比亞長大的韓楓，曾一度沉淪毒海兼淪為性奴，後幸獲俊朗（張俊朗飾）相救，不過最終因為生活及毒癮等問題，韓楓成為凌烈手下，擅長狙擊的她，經常孖住凌烈四出殺人，可惜仍然得不到凌烈尊重、甚至不時遭受凌辱……
由於韓楓這個角色不但夠靚夠型，而且悲劇式故事背景亦甚有記憶點，甫出場即吸獲大量關注，網民除紛紛搜尋誰是韓楓外，又指飾演韓楓的莊易羚（Axity）是江若琳、周秀娜及林其欣混合體。現年29歲、前韓國女團CLC成員莊錠欣的家姐Axity向傳媒表示，由於角色吸毒、露背、被虐待及打戲樣樣齊，令她感到一定壓力。零功夫底子的Axity透露，事前臨急抱佛腳學「特技班」訓練身手。她笑言看完自己的打戲演出後，也大為驚艷：「現實我真係好渣，感激動作指導，辛苦佢哋又要做替身，又要教識我點去打。」
為演活毒癮發作狀態，Axity事前專誠研究張靜初在《門徒》中的演出，並感激監製Jazz及對手張振朗在拍攝過程中的指導及照顧：「Jazz畀咗好大空間我自己創作，然後去到現場，佢一見到有啲咩問題，會即刻好具體細緻咁提示我，等我可以即時tune番。振朗就喺戲劇同動作上幫咗我好多，好似就算拍緊我大頭，佢都會喺鏡頭後面陪我一齊演，另外因為我自己唔係運動健將，有時有啲動作場面未必可以即時理解到動作指導嘅意思，佢都會幫一幫我。」
Axity特別感激劉穎鏇的貼心，透露與對方拍攝動作戲期間獲得不少鼓勵：「佢超級好，因為動作戲對我嚟講真係好難，我一做唔到就會好自責，但每次佢都會叫我去飲啖水休息吓先，好照顧我。張彥博雖然喺劇入面對我咁差，但現實中佢係一個非常照顧我嘅大哥哥，佢知道我新，所以都會提點我好多。」
前韓國女團CLC成員莊錠欣的家姐Axity，三歲開始學唱歌，入行前是教流行曲的歌唱老師（註：並非坊間所指的聲樂教師），並曾報名參加《聲夢傳奇》，可惜因為超齡未能入選。本身熱愛唱歌跳舞的她，於理工大學攻讀會計學工商管理學士課程時，已是Dance Society主席，閒時會與妹妹拍「孖妹跳舞片」。Axity於2021年曾參加國際小姐，並獲得香港區亞軍。她已考獲B1級德語，能應付日常德語文法基礎，並且聽說讀寫都達到能應付自如的地步。Axity最近開始學畫畫，希望能解決情緒問題：「曾經有段時間情緒比較低落、迷失，想搵一個方法去釋放內在嘅壓力，朋友建議我試吓畫畫，當時冇諗太多，但意想不到嘅係，當我一拎起畫筆，竟然可以畫幾個鐘。每完成一幅作品，都係一次自我療癒，所以我依家對藝術治療都好有興趣。」
