JACE陳凱詠新歌《間歇性休眠》 　繁囂中給自己一點喘息空間

繼前作《百妖夜行的修行》令人驚艷後，Jace聽到樂迷呼喚，出返首抒情歌，仲要好有驚喜，提醒大家要喺繁囂中比自己一點喘息空間。

「開不開心 不知道 等不等於傷心 不知道 發覺我對世界 過於羨慕」

身處依個城市，每個人彷彿都要努力上進，生怕落後於別人。生活到處有掣肘，各種煩惱不斷湧現，心底一直渴望可以逃離依個大囚牢，但又因為擔憂未知嘅未來，而無奈選擇繼續留喺如此痛苦之循環。

即使身心俱疲，每日輾轉難眠，對前路迷茫，望唔到終點，但仍然一直盲目向前衝，急促得無一刻可以停下腳步。完全無機會關心自己感受，逐漸失去靈魂，成為大都市下一部營營役役嘅機器。

「沮喪可以跳一場舞 起碼可以刮一場塵土 似有若無」

其實人生唔一定要時時有目標，秒秒去追尋。休息並無問題，覺得攰就比自己放空一下，世界唔會因此而停頓，你亦會好端端地生存，逃避並不可恥。反正人生尚有漫漫長路，心理要健康先可以走得更遠，做人最終無非都係想過得開心自在。

如果你依刻對未來有所疑惑，不彷花點時間傾聽內心，佢往往能夠交出最真實答案。

「解答不了手足無措 所以當我想瘋狂時 別要 勸告」

《間歇性休眠》嘅曲風配合相當特別嘅唱腔同咬字，營造出一種緊繃感覺，聽完難免浮現負面情緒，但沉重中會有份力量注進內心，深深地觸碰心靈。Jace以前甚少演繹依類作品，估唔到咁合適，為大家唱出共鳴，第一次聽已經眼濕濕。

自從Jace以獨立身份重新出發後，開始作出不同新嘗試，展示出佢嘅才華同特色。嚟緊同Edan嘅合唱歌《漸漸我們》再次涉足另一風格，感覺將會係一首爆紅作品。我敢講，陳凱詠好快會成為樂壇炙手可熱嘅歌手！

「但求 裂在內裡的空隙 可以補 如何避過心中那過雲雨 我翻開了我床鋪」

最後，聽完依首作品，大家不如問下內心，你真正想追求嘅究竟係咩？係名成利就，定幸福快樂？

嘗試對自己多份寬容，見攰就唞，或者會望見一片從未見過嘅廣闊天空。

《間歇性休眠》 JACE 陳凱詠
作曲：謝芊彤
作詞：陳詠謙
編曲：蘇道哲
監製：蘇道哲

「面前 無止境的疲勞 無方針的藍圖 行不通的每段路
沮喪可以跳一場舞 起碼可以刮一場塵土 似有若無

隨風飄的沿途 如火燒的熔爐 人生的所有問號
解答不了手足無措 所以當我想瘋狂時 別要 勸告

幾多主觀的感覺 可探討
但求 裂在內裡的空隙 可以補
如何避過心中那過雲雨 我翻開了我床鋪」

▼Follow hkpopculturelover
Instagram: https://www.instagram.com/hkpopculturelover/