余文樂走出驚恐症陰霾　因譚詠麟一句點醒捱足廿年

TVB《與天地對話》最後一位登場的嘉賓是久未亮相幕前的余文樂，今晚（12月4日）播出的一集，將帶觀眾踏足澳洲昆士蘭州，潛入大堡礁深海、參觀原始樹屋之餘，還會走入世界上最古老的熱帶雨林，體驗原住民生活，包括獨特的say hello方式、求生技能、尋找天然藥材等，並從原住民身上學會重新定義何謂生活。

初出道的余文樂，因在街上被發掘加入演藝圈，第一個工作已是拍攝台灣偶像劇《愛情白皮書》。不過對余文樂來說，反而是壓力的起源，其中一個原因是未能適應如何面對傳媒：「當時因為好細個，18歲咁上下……仲讀緊書，我諗我係比較唔能夠適應好突然地長期咁被報道、或者要面對記者。其實我係好怕一下子要同好多陌生人不斷咁溝通，同埋要搵嘢講，咁變相就會令人覺得你態度好似唔係好好喎，成日都黑面。其實係我好驚，好怕去面對呢一種環境。」

當時余文樂一度想離開娛樂圈，但最終因為譚詠麟的一句說話，一留就留在娛樂圈近二十年，余文樂憶述譚校長當年一番話：「你唔做，冇人逼你，但佢話『你係咪就咁因為過唔到自己而放棄呢？定抑或你會選擇過咗呢一關？你有咗選擇，先去選擇放棄呢？』」直到今天，余文樂仍覺得自己對演藝工作抱有熱誠：「當然你可以話呢個係工作，但都要對你嘅工作有熱誠先可以做到落去，我覺得我自己都仲有嗰個熱情喺度。」。

在演藝圈過去的20個年頭，余文樂除了要努力適應一切的不適應，還要適應與家人聚少離多的生活模式，以及瘋狂的飛行schedule。余文樂說：「基本上我一路以嚟工作嘅時間都好長，我第1個小朋友出世時，我都仲係好忙，佢一出世，我出現完陪咗佢一個禮拜，跟住就要飛，一飛就3個月，返嚟佢已經，吓？！又唔同咗樣喇？」。

余文樂試過於38天飛足38個城市，令他在飛機醒來時完全不知身在何方：「我試過瞓醒喺架飛機度問個空姐：『請問…我係飛邊度㗎？』我真係飛到唔知下一個地方係飛去邊度。因為當時電影宣傳要跑好多個城市，連續跑咗38日，一個城市一日，咪38日38個城市咯。我做到個腦已經空白，我真係唔知我做緊啲乜，我得返個殼喺度。」余文樂坦言做娛樂圈很矛盾，無論太忙或是太清閒都各有得失。他還談及與兩位好友導演劉偉強及鄭保瑞的「不敢問收工」合作模式：「尤其拍劉偉強嗰啲更加唔敢問添啦，阿瑞嗰啲就大鑊喇，拉閘放狗都唔走，佢唔走你都冇得走，冇人敢問幾點收得工，但我其實慣咗。」

熱愛潛水及曾考獲潛水牌的余文樂，為了重新探索活著的意義，更會潛入大堡礁深海。為了做好準備，余文樂於正式出發拍攝《與天地對話》前，專誠在台灣潛水熱身，豈料漆黑的海底竟再度觸發他的驚恐症。雖然如此，樂仔還是決定要在澳洲勇敢地潛一次：「其實我覺得自己未必潛到水，因為我嚟之前試過喇，可能之前驚恐症嘅問題，我就唔係好肯定。但既然今次我哋都嚟到，就試一次，如果唔得先算。」