上世紀70至80年代轟動一時的「佳寧案」被改編成電影《金手指》，戲中御用莊家的原型，曾任16年立法會議員、並被稱為「潮州怒漢」的詹培忠，正是佳寧集團借殼上市背後的主要推手，因此被譽為「金牌莊家」。
欲知當年事發經過，由詹培忠解答肯定當之無愧！《金手指》上映至今近一個月，詹培忠現身接受傳媒訪問，以下為其中訪問撮要。
6. 金門大廈收購經過？
詹：「我無參與，但我知過程，呢個世界生意嘅手法，同埋從商嘅手法，就所謂『各施各法』，就當依家國內從事地產…地產就有幾個成本，第一個就地價成本，有啲叻嘅就搵業主合作，佢出地，地產商乜都唔洗出，淨係出建築費；第二就建築費，地產商叻嘅就唔洗自己出建築費，搵建築商墊資；第三，如果無涉及土地交易同建築費，政府想抽稅都無得抽，到你真係賺錢，先抽你利得稅。」
詹：「倒頭來，如果整體策劃過咗關，佢就成功囉，『成者就為王』囉，賺錢兼得到社會掌聲…不幸失敗，或者策劃得唔好呢，輸咗之後未俾社會話係『金手指』。」
7. 點睇佳寧世紀詐騙案？
詹：「所謂詐騙就係信任嘅另一解釋，如果人地信你，你做得好咪成功…你向朋友或者對手作出一世嘅承諾呢，能夠完成呢，你就唔係形成詐騙囉…」
詹：「所以呢個就係歷史，或者當其時嘅過程，世事嘅嘢發生喺幾廿年前，甚至一百年前，唔係依家唔會發生，甚至以後都唔會發生，真係當其嘅時候作出判決嘅，事後孔明，個個都識嫁啦，但當時你能夠作出正確嘅判斷，人生嘅手法同手段，咁幫陳松青先生幾十年前，當然佢有自己嘅手法啦。我正話所講，呢個世界呢，橋唔怕舊，最緊要有人肯受。」
詹：「你有對手願意接受你嘅策劃，你就成功，所以你唔能夠一概而論。當時，佳寧集團就話金門大廈確實買咗9億幾10億啦，怡和集團確實亦都買7億，佢咪賺2億都落咗袋啦，咁佢就賣16億賺7億啦，賺7億而係無兌現，咪係叫做欺詐囉。」
詹：「與此同時…依家仲喺尖沙嘴嘅星光行，有某上市公司見佳寧用咁嘅手法，即刻就買咗過嚟，分層分房去賣，卒之俾佢賣成咗，咪仲賺得多。」
詹：「所以成者，你咪又賺錢，又賺聲譽，甚麼都係合法；你一失敗，咪話係假嫁囉。」
8. 佳寧有機會成為巨型企業？
詹：「佢當其時已經用特殊手法，我曾經好理智咁提醒陳松青先生，『你個大廈似乎建立喺沙堆上面喎，你嘅成功都係喺沙堆，最緊要係諗打樁，唔好俾大廈有機會傾斜』，但當時澳洲利息最高係百分之21，根本喺高利息下，任何生意都好難做，甚至（無）生存嘅機會。」
詹：「喺當時嘅政治環境下，戴卓爾夫人…達成一個交返香港俾中國，社會已經形成重大嘅壓力，兼且英國政府已經決定撤出香港期間，好多問題就造成無形嘅經濟壓力。所以無辦法啦，佢為一個錯呢，亦都錯得無可補救呢，佢應該當時啲股票可以『套戥』。你既然睇得唔好，可以去賣空股票…俾其他嘅金融機構去分擔你嘅失敗。但佢無，佢走去借錢喺股市托住自己嘅股票，以為令到自己嘅股票企穩價錢，係令投資界、股民以為你重整旗鼓，呢個就錯誤嫁啦。」
詹：「要吸收佳寧當時嘅經驗，依家去避免自己不可收拾嘅失敗，你亦都知依家股市，有幾間公司面對咁嘅情形啦，但佢地是否能夠自救呢，或者利用社會經驗去修正，呢個就睇佢地能與不能啦。」
9. 陳松青如何學習財技？
陳松青財技了得，記者問：「係咪你教佢架？」
詹：「唔係，運作嗰啲，我仲有叻過佢嘅，例如當時港澳發展，我可以一股供股…每股供20，每股送一股認股權證，等如一股變40股，供股每股2毫子，一復牌個日，最高每股3蚊，等於一股百二蚊，我仲犀利，兩毫子變百二蚊嫁！當然，後來慢慢跌返。所以，仍然都係各施各法，股市唔係絕對無，係仲有嘅。」
詹：「佢（陳松青）有兩樣嘢叻，佢有氣勢，特別當時同佢有來往嘅鬼佬就置地啦，置地有個總經理叫鮑富達（Trevor John Bedford），有關俾佢叫去朝早6點開會，個個就要頭耷耷去文華，佢最喜歡去文華食早餐開會…啲鬼佬俾佢一叫到，個個俾佢點到好相信風水，呢個係佢有說服力。當然，有時銀紙就係另類嘅說服力啦。」
資料來源：https://www.youtube.com/watch?v=Xu8YTidGFXk