香港最有特色就係街頭小食，其中雞蛋仔真係老少咸宜～依家啲口味仲愈來愈多，而香港咁多間雞蛋仔專門店真係花多眼亂，小編今次就搜羅咗8間小店比大家～避開咗啲連鎖品牌之外都仲有云云小店，所以今次抽出嘅小店都係比較受歡迎同有食客好評嘅小店～排名不分先後！
第一間係北角嘅利強記，要留意係北角店～經常會見到有人龍買熱辣辣新鮮整起嘅雞蛋仔！識食嘅都會知北角店係獨特啲好食好多，其他分店唔知點解質素有啲參差⋯店面有啲懷舊，飽經風霜嘅感覺就知佢有咁上下歷史～
利強記北角雞蛋仔
地址: 北角英皇道492號
營業時間：星期一至日 7am - 10pm
第2間係有紫薯味、香芋味等特別口味嘅恆發雞蛋仔，係IG一search見到粒粒飽滿嘅雞蛋仔真係流晒口水啊～講足料佢地真係滿分！
抹上滿滿嘅紫薯蓉一定可以滿足到紫薯控啦～
恆發雞蛋仔
地址: 觀塘協和街177號／九龍城衙前圍道64號曉逸軒地下1號舖
第3間係大澳嘅炭燒雞蛋仔，至香港打擊街邊嘅小販開始，香港搵到炭燒雞蛋仔嘅機會係微乎其微～買少見少啊！唯有出個遠門去大澳覓食啦！20蚊一底，小編當日去4點幾就賣晒，好彩買到最後一底～想食就真係要早啲入大澳啦！口感真係同平時遇到嘅雞蛋仔唔一樣架，蛋香係100分～
大澳華記香脆雞旦仔
地址: 大澳石仔埗街121號地下
第4間係人情味爆分去到紅磡必食嘅雞蛋仔～老闆人超好超級nice，成日都會同食客講笑傾計～香港地仲有幾多呢啲人情味呢？
必食係佢地嘅朱古力味雞蛋仔，仲有唔同口味嘅班戟～芒果同肉鬆都超級好食！
老闆密密手整，計時器嘅提醒聲此起彼落，對雞蛋仔呢樣簡單嘅小食卻有一絲不苟嘅精神，就係想為食客帶嚟最好嘅口感～有報導提到老闆嘅侄仔開始學師同幫老闆手，傳承呢個小食文化落去～身為食客嘅我地真幸福，可以一直食落去啦吃貨們！
紅磡雞蛋仔
地址: 紅磡大沽街寶利閣2號舖
營業時間：12:00 - 20:00，星期四休息
第5間係筲箕灣出晒名嘅低調高手，霆鋒Chef Lemon係十二道鋒味都推介過！早排仲破格出左咸蛋黃口味～有無人去試左呢？
另外西灣河太安樓有間叫蛋記嘅雞蛋仔都有好多支持者。
低調高手大街小食
地址：筲箕灣筲箕灣東大街76A號B3號舖地下
營業時間：星期一至五 12:00 - 22:00
星期六至日及公眾假期 11:00 - 22:00
第6間都係位於港島區嘅蛋香烘焙，即叫即焗仲會係風機吹夠15秒先比客人～YouTuber屎萊姆拍片介紹時大讚好味，仲留意到佢地有飲品叫做宅男解毒，好有趣啊！而最玩味地方係收據上店員名稱叫周杰倫，令食客有暇想呢～
蛋香烘焙
地址: 北角電氣道254-280號華凱大廈地下A4號舖
營業時間：星期一至日 11:30 - 22:30
第7間係尖沙咀嘅豐記雞蛋仔～尖沙咀鬧市中小食店係偏少，呢間雞蛋仔仲有紫色嘅香芋味，確係會吸引到唔少食客光顧！
好多食客都表示雞蛋仔唔係熱辣辣奉上，香芋味又唔出～可能可取之處就係迷人嘅紫色同埋扎實嘅口感～過下口癮係爽嘅！
唔少得經典原味啦！
豐記雞蛋仔美食
地址: 尖沙咀加連威老道41C-D號嘉威大廈地下
最後第8間係最新登場係深水埗嘅雞蛋仔界新寵，早排係IG都好火㗎！最特別有黃金午餐肉同肉鬆配搭嘅口味～好少見嘅配搭仲十分邪惡添～
仲有香蕉黑朱古力口味添～
士叻哥
地址: 深水埗長沙灣道262號地下A4號舖
營業時間：星期一至日 7am - 10pm
除左以上嘅雞蛋仔專門店，一定有好多人都係媽咪雞蛋仔、摩芽雞蛋仔呢啲連鎖式嘅粉絲，佢地嘅雞蛋仔口味係好多嘅，不過連鎖化後真係會傾向去小店幫襯多啲～呢個週末不如支持下啲小店，買番底雞蛋仔懷念一下童年嘅時光～
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
*本文章的圖片均經其本人或其公司授權，其他媒體不得轉載