徐錦江扮雷神大家就見得多，今次唔止佢，仲有其他隊友都齊齊現身，化身成「神一般の隊友」！
PlayStation召集咗7位藝人、網紅，化身成10位玩家爭住合作嘅「神Teammate」。當中大家cosplay成唔同人物，網民大讚超神似！
7位藝人分別係徐錦江、秦煌、鄭子誠、戴耀明、達哥林慧韡、簡幗儀Lilian以及同馬雲撞樣嘅四川網紅柯全壽。最搞笑嘅係佢哋嘅裝扮超低成本，但按照自己特質成功神還原角色。
徐錦江
徐錦江同雷神不嬲都俾人話撞樣，今次做返「自己」完全無難度啦！連網民都話係雷神本尊，唔算cosplay！
秦煌
秦煌就cosplay《奇異博士》嘅王，不過就有網友表示秦煌更加似卡比獸，大家又覺得似唔似？
鄭子誠
成日凝住會有陰謀嘅鄭子誠嘅造型相對比較簡單，不過就唔係好睇得出係casplay緊邊個，有網民就認為係扮緊大雄個老師。
戴耀明
綠葉王戴耀明今次認真豁咗出去，佢嘅造型完全神還原一拳超人，網民更加認為係100%還原！戴耀明嘅一拳超人造型樸素，以薯片包裝袋、洗碗手套等打造，但仍然達到神還原效果，小編覺得可以媲美泰國低成本cosplay達人Lowcostcosplay。
除咗一拳超人之外，戴耀明仲有cosplay埋《芝麻街》嘅畢特（Bert），同樣超神似！仲有網民話似《延禧攻略》嘅袁春望添啊！
達哥
達哥都唔弱，佢拎住把掃把cosplay《星球大戰》嘅Kylo Ren，唔少網友都大讚達哥嘅掃把男神造型好型啊！仲有網民話似《哈利波特》嘅石內卜教授，小編都覺得有啲似～
簡幗儀Lilian
簡幗儀Lilian就以火辣身材扮演《海賊王》娜美，不過網民就話p得重手咗，認唔出係邊個，有人話似羅敏莊，都有人話p咗做劉心悠，仲有人話似謝金燕添！你又覺得似邊個？
四川網紅柯全壽
神似馬雲嘅四川網紅柯全壽，佢以叢林披肩以及阿拉丁造型現身，佢嘅出現令網民留下唔少搞笑留言，例如話佢係課金戰士，而阿拉丁造型令人諗起馬雲間公司阿里巴巴。
全員
最後仲有佢哋7個大集合嘅海報，同《復仇者聯盟》嘅還原度好高！個個人表情認真，好似真係去拯救世界咁，超搞笑！
小編覺得個個都cosplay得好似，不過最似絕對係神還原一拳超人琦玉嘅戴耀明，你又覺得邊個最似？
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）