相信最近大家一上網或打開電視，睇得最多嘅必定係有關颱風嘅資訊！除咗最強颱風「山竹」逐漸迫近香港，美國亦同樣受颶風「佛羅倫斯」影響，需緊急疏散過百民居民，真係咪話唔擔心啊！不過當中最恐怖嘅係，原來近日全球出現咗足足9個熱帶氣旋，真係嚇死人啦！
香港繼「百里嘉」掀起3號風球後，最強颱風「山竹」又準備吹埋嚟啦！而近日Jamaica Weather仲發現，有9個熱帶氣旋正分布喺太平洋及大西洋熱帶地區，圖中仲發現9個熱帶氣旋要可以連成一線，現象極唔尋常！
9個熱帶氣旋當中除咗包括大家最近都非常關心嘅「百里嘉」、「山竹」同「佛羅倫斯」外，仲有尾隨「山竹」嘅「Invest 91W」、喺北太平洋並正吹襲夏威夷嘅「奧利維婭」、正逼近墨西哥嘅「保羅」、潛在墨西哥灣嘅「Invest 95L」、隨「佛羅倫斯」後嘅「艾薩克斯」以及「海倫」，淨係睇圖都嚇一嚇！
喱個奇怪現象除惹嚟一班天文愛好者嘅討論外，科羅拉多州立大學研究科學家克洛茨巴赫亦都話，太平洋以及大西洋同時出現多個活躍氣旋嘅現象並唔尋常，而且自今年風季以來，大西洋已出現9個獲命名嘅颶風，較往年平均多！
近日香港開始做防預措施、澳門出現搶購潮外，美國東南沿岸當局亦已命令百萬人疏散，仲有泰碧島居民加緊做準備、颶風海倫令夏威夷住宅遭洪水破壞等等，颱風幾乎令多個地方都緊張起嚟！所以除咗關心星期一洗唔洗準時返工之外，都要留意受影響嘅居民，以及真係要好好多謝颱風下仲要返工嘅人啊！
雖然9個颱風唔會全部都吹嚟香港，但值得關心嘅係喱種奇怪現象嘅出現，證明大家都要開始留意地球氣候變化為大家帶嚟嘅啟示，多啲為地球出一分力，好好愛護環境啦！
圖片來源：Twitter@Jamaica Weather、FB@NOAA、Shutterstock、FB@香港天文台 HKO
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）