30歲林作唔做大狀頻頻轉工 富貴老母撐腰日日玩膠

林作自認頭腦轉數快兼口才了得，深信自己做邊行都會有出頭，最近仲刻意執正啲扮專業，依然被指周身刀無張掂，近期新搞作係轉行sell保險，不過林作有嘅係無限自信同七呎厚的面皮，啱晒做保險，祝佢好運！

撰文、圖片：東方新地

林作百足咁多爪 唔做大狀做保險才俊

現年30歲的林作身兼多職，擁有大律師牌的他，是大狀清洪徒弟，曾任兩年執業大律師，又曾半隻腳踩入娛樂圈，客串過網絡電影，演過舞台劇。近年加入遵理做補習老師，又是夢想沙龍娛樂文化有限公司旗下藝人，亦是主板上市公司汛和(1591)的執行董事，處理上市公司法規同埋做策略顧問，就連KOL與移民專家都做埋，現在多個保險經紀身份，真是分身不暇。

疫境當前，各行各業都大受影響，曾經是大律師的林作，繼前度女友、「十優港姐」麥明詩放棄演藝工作，轉行做OL後，他亦有新搞作，在補習社停業期間，宣布加入保險行業。轉行絕對唔係講玩，做保險要考牌要對客人負責任，而林作宣布加入保險界後，有不少人問他是否受刺激？他日前拍片解釋竟說：「其實有兩單嘢，近年我女神余香凝同咗保險才俊一齊，令陳家樂十分傷心，令我意識到原來保險才俊係咁犀利。另一單係我小學女神梁靖琪，嫁咗畀細佢7年嘅保險才俊，令我意識到原來保險才俊係咁威，竟然係咁，我都好想好似佢哋咁。」

富貴老母撐腰 唔怕開唔成單

貫徹無厘正經冇句真嘅作風，林作近日穿上西裝扮專業拍照放社交網，仲未學行先學走，公開招聘下屬，組織自己的保險團隊，據知情者透露：「林作係食腦之人，佢把口𠺘過油，真係氹到吓人，而sell保險絕對要有口才，呢方面佢有凸，不過專業同說服力就欠奉囉！唔緊要，佢有個富媽媽喺背後撐腰，再叫啲親友幫襯，開單一定唔成問題，不過要成功同長久發展就要靠佢自己努力去經營喇！」