幾時都話,嫁到個好老公真係等同中六合彩,同型男安志杰結婚年半的名模Jessica C.(JC),婚後時刻有老公愛錫,又生咗一 對寶貝仔女,真係幸福滿瀉。最緊要係婚後將屋企話事權交晒畀老婆的安志杰,當老婆女皇一樣服侍,安志杰唔覺被管仲甜入心,堪稱老公極品!
撰文:申娛樂|圖片:新傳媒、ig
安志杰闊卓買名牌頸鏈冧老婆
31歲、33C警鐘胸的 JC,就曾公開大讚老公是她生命中最重要的人:「 入行最大收穫,就係可以識到咁好嘅老公,諗番之前隻身嚟香港發展,都試過好徬徨,最幸運就係可以嫁到咁錫自己嘅老公,係錢都買唔到。」事事將老婆及家庭放第一位的安志杰,又的確抵讚,平日同老婆出街一定負責攞嘢埋單照顧周到,返到屋企又會幫手湊仔,係最佳神隊友。
日前,安志杰雖然單拖出動去超市入貨,卻全程由安在家中的老婆遙控話事,好明顯係唔想老婆頻撲操勞,寧願自己出動搞掂。當日下午二時許,安志杰在中環ifc超市上糧,只見他在放滿BB食品的冰櫃左揀右揀,之後更用手機同家中老婆JC視像,揀營養飲品、有機食物都細心研究包裝,然後再問老婆意見先買。
超市入完貨,安志杰未有即時返歸而是到名店買飾物,見佢在飾櫃睇咗一輪,細心挑選咗一個心形吊墜同一條頸鏈,好明顯又係為冧老婆 JC 準備。
當老婆女皇服侍的安志杰,還會花心思買禮物氹對方,當日 在超市上完糧,便去咗名店買飾物,細心揀咗個心形吊墜及 頸鏈,相信是給老婆送驚喜。揀到心頭愛,安志杰即時以信用卡簽帳購買,之後急急趕返屋企。
Jessica C.好快就戴咗老公送嘅頸 鏈,明顯冧爆愛不釋手!安志杰出手濶卓,吊墜同頸鏈加埋近3萬元。
據知情人說:「Andy(安志杰)唔想老婆咁辛苦,成日都會叫JC留喺屋企做少奶奶,搵錢嘅嘢就等佢做男人嘅負責,雖然係咁,返到屋企Andy都唔會翹埋手,會幫JC分擔家務同湊仔女,特別係夜晚,佢怕老婆太攰,會叫老婆瞓覺先,佢就講古仔揞個女瞓覺!真係冇得彈好老公!」
老公係型佬仲係暖男,身材一向火辣的 JC,生完一樣 keep 住索,原來 JC 有意搞網上健身節目,雖然成日畀人讚索,不過 JC 就未滿意現時身形,認為腰間肌肉唔夠結實,計劃搵私人教練操肌,再將過程在網上節目和大家分享。同樣愛家庭愛操fit,Jessica C.同安志杰果然天生一對。