盤點5對TVB分手亦是朋友藝人 舊愛與現任同場都零尷尬！

過往TVB經常都有演員假戲真做，唔少都因為拍劇由鏡頭下戀到現實生活中，由熒幕情侶變成真情侶 ！不過，並非每一對都成功開花結果，但即使由戀人變回朋友，佢哋之後依然能大方合照，甚至同場都零尷尬，你又知唔知有邊幾個？

撰文：東方新地｜圖片：新傳媒圖片庫、電視截圖、ig、Facebook

盤點5對TVB分手亦是朋友藝人

｜馬國明、胡定欣

馬國明一向係圈中既筍盤之一，曾經就俾胡定欣封盤。事緣兩人喺2008年拍攝舞蹈真人Show《舞動奇跡》中跳出真愛，可惜拍拖不足一年以分手收場。分手後，定欣指同馬明因為基礎唔穩定，而且太多顧忌而分手。

至於馬明其後亦承認二人曾拍拖，而和平分手後亦維持好友關係。直至上年，馬明與定欣於分手後首次喺TVB劇集《宮心計2深宮計》中合作拍劇！

｜黃宗澤、胡杏兒

2005年，黃宗澤（Bosco）同胡杏兒拍攝古裝劇《我的野蠻奶奶》時撻着。杏兒喺劇中同Bosco飾演夫妻，與野蠻奶奶汪明荃鬧出唔少婆媳糾紛嘅趣事。喺現實生活中，Bosco同杏兒呢對姐弟戀長達八年，喺圈中公認為金童玉女。可惜，佢哋最終都冇繼續「頂住」，喺2012年分手收場。

其後，Bosco同舊愛胡杏兒罕有地因出席好友陳敏之兒子雷子樂嘅百日宴而再度同場，當時Bosco就大方表示：「等會我會過去同佢（杏兒）打個招呼。」而被問到會唔會覺得尷尬，Bosco亦指：「如果會尷尬我就唔嚟啦！」

｜鄭伊健、黎芷珊

伊健與芷珊當年因做TVB兒童節目《430穿梭機》嘅主持而撻著，拍拖3年後，最後都係分手收場。芷珊曾在訪問中透露自己當年脾氣差及佔有慾比較強，因而令兩人爭吵不休，同時亦成為呢段姊弟戀未能走到最後嘅最大原因。

分手之後，關係回歸朋友，伊健亦不時接受女方嘅訪問，更應邀出席芷珊嘅節目擔任嘉賓，彼此關係仍然相當好！今年，芷珊更現身撐伊健演唱會，除咗同伊健合照外，伊健太太蒙嘉慧更搭着芷珊膊頭、面貼面合照，相當親密！

｜洪永城、唐詩詠

一向被外界形容為「最佳女朋友」、「不能錯過的女友」嘅唐詩詠喺愛情路上屢受創傷，2013年詩詠同洪永城拍劇《載得有情人》而互生好感，其後終於成功撻著！雖然呢對係姊弟戀，但男才女貌依然受到唔少人看好！

可惜，雖然當時二人已屆適婚年齡，尤其詩詠已經36歲，心急想結婚亦無可厚非，當時就有傳兩人於婚期上仍冇共識，所以最終喺IG宣佈變回好友關係。之後即使喺TVB同場相遇，兩人都大方合照！

｜羅天宇、湯洛雯

湯洛雯與羅天宇拍拖四年，二人由合作《愛.回家》開始地下情，喺羅天宇慶祝30歲生日時，一張甜蜜咀嘴相被公開戀情才浮面。可惜，據知一心以為憑著愛可以征服浪子嘅湯洛雯因男友未定性未肯為佢放棄整個森林，最終成為分手主因。

不過，呢對情侶雖然已屬過去式，但再見亦是朋友嘅二人早前就以好朋友身份遠赴挪威拍攝TVB節目《3日2夜》，仲各自分別喺個人社交網上載於當地拍攝嘅靚相，望落啲相就連網友都話係以情侶視覺影，更因而惹起再次復合嘅傳言！