喂！上嚟識個朋友啦！
呢個世代大家番工都咁唔得閒，就唔會好似學生時代咁，閒閒地識晒一個年級咁多嘅人㗎啦！番工已經咁攰，冇精神出街認識新朋友仔點算好？網上近年就興起左好多唔同嘅交友App，為忙碌又寂寞嘅都市人量身打造。而交友App就好似現實世界，上面咩人都有㗎，好多人喺現實世界過得唔如意，就會上交友平台到尋找快樂。身為都市人嘅你，唔多唔少都會有幾個交友Apps傍身，就算冇玩，都會喺某個時刻有想download嘅衝動。今日就等DailyView講你聽，香港人十大想download交友Apps嘅moment啦！
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
10 真心想識新朋友（110筆）
大家都深知都市人有幾忙碌，日日收工咁攰都只係想快啲番屋企休息。但係每日來回屋企同公司，無咩可能會認識到新朋友㗎喎。而交喺友App上面只要你想，你可以認識任何人，係不分職業、國界同性別年齡！好多人都係抱住真心認識新朋友嘅心去玩交友App，運氣好嘅你好可能會喺上面遇到啱傾嘅新朋友㗎！
image source:[freepik](https://www.freepik.com/free-vector/refer-friend-concept-illustrated_5516434.htm#page=1&query=apps friend&position=1)
9 一心釣狗公嚟玩（120筆）
交友App上面正常人唔少，但怪人都非常多。遇到狗公嘅機率係高過現實生活好多！咁高機率遇到狗公嘅情況下，有唔少人就會生出獵奇嘅心，生活咁悶，難得遇到一個奇怪人，就同你玩吓啦！有人玩交友App就係專門想搵奇怪嘅人（俗稱狗公）嚟切磋較量一下，睇吓係你玩我，定係我玩你？
image source:YouTube:毛記電視影片截圖
8 生理寂寞需要慰藉（154筆）
所謂人有本能，正常人嘅身心靈都係需要另一個人嘅交流互動，喺交友App上面就有好多尋求呢種慰藉嘅人，大家各取所需。無論係心靈上定係身體上，自己一個生活喺都市耐咗，不免都會有點寂寞。呢個時候交友App就可以擔負一個尋求同路人嘅功能，無論妳想尋求邊方面嘅交流，都可以嘗試喺呢到搵吓！
image source:freepik
7 身邊朋友極力推薦（155筆）
交友App愈嚟愈普及，身邊一定都會有唔少朋友係使用者。好嘢梗係多人用、多人推薦。當身邊個個朋友使用交友App嘅體驗都好好，你會唔會有小小心郁想嘗試一吓呢個新穎嘅識朋友渠道？有網民講到，有朋友喺交友App上面結識左共度一生嘅伴侶，強力推薦佢試吓用呢個交友App，包保令佢對網路交友有番信心！
image source:pxhere:rawpixel.com
6 睇到廣告好吸引（157筆）
你有無留意到，交友Apps廣告喺好多地方都有？無論喺Youtube定喺Facebook都有好多交友軟件嘅身影。影片廣告入面，男女主角嗰種對關係嘅期待同埋不安，令到睇到廣告影片嘅你心有戚戚焉，有幾耐無試過呢種小鹿亂碰嘅感覺？交友軟件嘅營銷手法一日比一日吸引，好似喺到問緊你，你要等幾時先要進入呢個充滿可能性嘅世界？
image source:freepik
5 見到有成功案例（167筆）
你老死同你講佢喺交友App上面識到個新女朋友、隔離屋阿明下個月會同網上認識嘅女朋友結婚……咁多成功例子，正正就係呢個方法work嘅鐵證！你又猶豫緊啲咩？快啲行動喇！當身邊每個朋友都用緊交友App，又幾乎個個朋友都成功得到佢期望嘅一段關係，無論係友誼定愛情，你都一定想試吓呢種成功感！
image source:pixaday:cocoparisienne
4 單身耐想拍拖（184筆）
好多交友App都係為單身男女設計，對於單身太耐嘅男男女女嚟講，寂寞總係最難耐。好多人玩交友App都係渴望可以有一段穩定關係，想再嘗試一下拍拖嘅甜蜜。喺一個高壓城市入面，如果有個人可以同你分擔生活大小煩惱，實係一件好美好嘅事情，「想拍拖」呢個原因都係好多人嘗試交友App嘅一大原因。
image source:pixaday:Free-Photos
3 太平淡想搵新鮮感（246筆）
生活日日番工放工，好容易就會變得日日重複、毫無新意，呢個時候就需要小小新鮮感調劑吓身心。新鮮感邊度搵？網路就係好好嘅工具，喺網上如果認識到有趣嘅人，延伸到現實生活入面，促成一段新鮮、刺激嘅關係，好多人都係抱住呢個期望去玩交友App，渴望喺生活上擁有特別嘅體驗！
image source:freepik
2 閒時無聊搵野做（286筆）
你無聊嘅時候會想做啲咩？當網路嘅另一端有另一個人都一樣無聊，你哋遇到對方就係一個最好嘅安排。無聊時候上吓網同人傾吓偈，消磨吓時間都係好多人想玩交友App嘅一大原因。皆因日常生活大家都有大家忙，上網識吓人，可以打發到無聊嘅時間，又有可能結識到一個新朋友，何樂而不為？
image source:freepik
1 失戀想搵樹窿（301筆）
人喺脆弱嘅時候最需要安慰，歌仔都有唱「戀愛大過天」，當天塌下來嘅時候，自不然會想得到一啲安慰。但唔想麻煩到朋友屋企人？同陌生人傾訴就係呢個時候最好嘅方法，既唔使擔心阻到人，又可以喺茫茫網路世界入面得到小小安慰，好多人玩交友App其實都唔係有咩特別目的，只係需要一個樹窿！
image source:freepik
分析說明：
本研究資料由《KEYPO大數據關鍵引擎》提供，分析時間範圍為2018年10月03日至2019年10月04日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『下載交友apps』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。
![](data:image/svg+xml;charset=utf-8,<svg height="64px" width="112px" xmlns="http://www.w3.org/2000/svg" version="1.1"/>)