返工遇著這4種好同事，再大的workload都好易捱得過，令你不捨得辭職；相反，如果身邊出現以下難頂同事，分分鐘令你的工作量培增，影響工作效率甚至工作心情，真係好想辭職唔撈！
1. 最討厭同事遲到、早退、扮OT
遇上同事遲到早退，都已經見慣不怪，最新招式係有同事臨收工出去整gel甲、剪頭髮，到晚上8點再返公司扮加班，次次覆親啲email都係夜晚send出嚟，令老細覺得佢好勤力，但同事要第二日先可以follow up，咁唔公平嘅工作情況，盡責同事一定好想辭職！
2. 同事常請病假博同情
同事生病，要請病假無可厚非，但有種同事少少病都射波，仲上傳藥物照、口罩相上Facebook、Instagram博同情。有些良心公司福利好，半日病假毋須提交醫生紙，呢種同事都會睇準呢個政策請半日sick leave射波，工作效率下降，影響其他人！
3. 自侍高人一等，命令下屬做埋自己嗰份
有種同事明明唔係最大粒，侍住下面有幾位勤力下屬，將自己負責的工作交俾佢哋，但就由自己向老細匯報工作進度，絕口不提同事的幫忙，令老細以為佢做嘢妥當，功勞全歸佢！
4. 明明係PIC，但遲開波兼卸責
已assign了某位同事做PIC（項目負責人），但遲遲唔開波，搞到其他部門唔能夠kick start。臨近project deadline，老細問責，他反說其他部門手腳慢，引致project 未能如期完成，引起公憤！
5. 擦鞋精最為討厭！
身邊總有一兩個同事好識擦鞋，記得老細邊日生日，會主動訂蛋糕、買生日禮物、book餐廳食飯，自己搞場大龍鳳，仲要同事配合一齊俾驚喜！以上都係小兒科，更誇張的是有同事知道老細另一半鍾意黃子華，專登請假幫手買飛，然後要求同事夾錢請佢哋睇棟篤笑，要擦鞋又要同事配合，實在無理！
6. 同事放假無交帶，不負責任！
有種同事，放假等同消失於世界，WhatsApp、電話、電郵完全搵佢唔到。最慘係佢無交低手上工作，甚至連file都無擺落share drive或send出嚟，無人知進度，想幫手跟都跟唔到，危急關頭其他同事唯有重頭再做，浪費人手兼影響同事workload。
7. 偷懶同事專趁公司有大project而請假
每逢公司年報、業績發佈會、準備報稅等大project，公司要分配人手時，同事開口話早已請假去旅行，唔能夠出席或擔任重要角色，最慘係老細批假時未察覺人手不足，令其他同事要兼任更多task。大家人工、title差唔多，但總有人可以將大project置身事外，令同事大感不滿。
8. 同事偷橋最可恥！
有過來人分享，曾經遇著有種同事最愛偷橋！每週開會匯報工作進度和sell橋時，聽到某某話想做「創業專訪」，就忽然踴躍指自己手上有幾個potential故事可以做訪問，但又不願透露聯絡方式，自己接手這個題目，變相偷橋，惹同事非議。上司又不理會實況，只問結果，試問怎能不想辭職？
9. 「老屎忽」咩都話唔識！
身邊的同事年資多過你，喺公司耐過你，面對新工作就話自己未學過，推俾後生一輩如你去跟進，自己則大安旨意繼續hea做。明知你哋喺背後對佢指指點點，但人只要夠厚面皮就不怕被說三道四，每日如常上下班，輕輕鬆鬆又過一日！
**Follow us on:
- Facebook: CosmoHK
- Instagram: @cosmopolitan_hk
- YouTube: CosmopolitanHK**