唔買都埋嚟睇啦！香港本土啊！
image source：Flickr/worldaroundtrip
香港書店數嚟數去好似都係得兩三間大型書店咁，唔通香港人真係無咩選擇？其實只要有心去搵，留意吓香港嘅文化圈，原來我哋都仲有好多選擇嘅。香港唔止唔係文化沙漠，呢個小小嘅彈丸之地，仍然有好多對書本有理想嘅志士，願意承擔風險去開書店，為我哋買書睇書提供更多可能同選擇。咁大家都知，喺香港呢個租金貴到爆，又少人睇書嘅社會，書店做得好唔會賺到好多錢，做得唔好隨時半年收檔。一座城市窮得只剩下錢，仲有咩意義呢？我哋唔想活喺一個無書店嘅地方，支持本土書店，絕對係我哋香港人嘅責任。今日就等Dailyview用網路大數據同你介紹，香港最值得支持嘅十間本土獨立書店，等我哋得閒就去買書睇書喇！
DV小教室：香港網路大數據觀測咗近萬個網站頻道(而且不斷增加ing)，包括港澳地區的新聞頻道、FB、IG同埋各大討論區、Blog……透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
10 二十三年歷史，榆林書店
書店特色：書愈老，愈有書香
人生有幾多個二十三年？能夠喺物慾橫流，金錢至上嘅資本主義城市，一間獨立書店營運咗二十三年仍然屹立不倒，單憑呢樣紀錄已經足以驚嘆我哋。榆林書店以流行、通俗書籍為主，包括文學史哲、文化社會、經濟商業等，文學頪較多香港、日本文學，宗教類則以基督教書籍為主。榆林書店亦都歡迎預訂書籍，做會員仲會打折。
書店地址：九龍旺角西洋菜街38號2樓
營業時間：11:00-22:00
image source:Facebook:榆林書店
9 大隱隱於市，解憂舊書店
書店特色：店中有貓，名曰「尤里西斯」
「一定要有人推廣這件事（書店），不可能看著它萎縮、息微就算。」店主Phyllis如是說。我哋成日聽到獨立書店，都會覺得係市區嘅樓上書店，又點估到連大埔寶湖街市都有書店噃！點解喺街市開？原因無他，一個字，租金抵。香港物價昂貴，但香港文化人最識執生，迫出咗呢朵文化奇花。呢間書店咩書都收，仲要訂價大多十至二十蚊，正爆！
書店地址：新界大埔寶湖道街市F021
營業時間：11:30-20:00
image source:IG:gobeyondthemall
8 最早引入台版書，樂文書店
書店特色：要買台版書必去
1984年成立，非常歷史悠久。樂文書店係最早引入台版書嘅香港書店，直到今時今日，佢嘅台版書都特別豐富。呢間書店主打人文氣息濃厚，引入好多唔同領域嘅學術書，其他較小眾嘅文史哲、社會科學、教育、 心理輔導等書籍，都成日入貨。開獨立書店開到有分店，就知道佢地經營有道，選出高質書籍，令唔少愛書人一再流連忘返。
書店地址： 旺角西洋菜街62號三樓
營業時間： 11:00 - 21:30（旺角總店）
image source:Facebook: 樂文書店（旺角總店）
7 富德精神，艺鵠書店
書店特色：有咖啡有嘢食有好書有靚貓
艺鵠之名，係從英文Art and Culture Outreach（ACO）音譯而嚟，故意用「艺」而非「藝」，突顯咗呢間書店嘅與別不同。艺鵠喺2003年為達微慈善基金把富德樓嘅部份單位轉為藝文空間，好似六樓策劃唔同展覽，書店由本身位處一樓，轉遷至十四樓，連埋天台菜園，唔止推廣文化閱讀，仲提倡埋緣色生活。出版更多書籍，就係艺鵠深信且身體力行嘅富德精神。
書店地址：香港灣仔軒尼詩道365-367號富德樓
營業時間：12:00 - 19:00 （二至日）
image source:IG: chanmaydoy
6 五臟俱全，博雅小書店
書店特色：買本繪本送比細蚊仔
「博雅」一名，本係嚟自於希臘哲學家柏拉圖嘅「自由七藝」（Liberal arts），強調生活經驗嘅實踐，而將專業知識放係次位。小書店雖自名為小，但係其實入面包羅萬有，唔止平日我哋會見到嘅文史哲等書籍，最特別嘅係書店收有特殊教育、心理諮商、社會工作、幼兒教育同繪本，絕對係其他書店少見嘅。做唔做會員都有折，但緊係做會員最抵。
書店地址：香港旺角彌敦道608號總統商業大廈6樓601A室
營業時間：13:00 - 21:00 （一至五）14:30 - 21:00 （六）
image source:Facebook: 博雅小書店
5 專售英文，清明堂書店
書店特色：有專講香港嘅英文書
咁多間獨立書店，清明堂書店最唔同嘅地方就係，佢係專門賣英文書嘅！書店嘅英文名Bleak House，取自狄更斯嘅《荒涼山莊》（Bleak House），實在文藝到爆。美國回流港人Albert覺得香港閱讀風氣唔好，原因正係欠缺好嘅貼地嘅英文書店，於是身體力行喺新蒲崗開一間，真係好值得敬佩。社經藝文、繪本漫畫都有，仲有講香港故仔嘅專題書。
書店地址：新蒲崗八達街9號2705
營業時間：12:00 - 18:00 （一、三至五）11:00 - 13:00 / 14:00 - 19:00（六）
image source:IG: bleakhousebookshk
4 港味十足，田園書屋
書店特色：禁書，禁唔到香港
香港目前最老牌嘅獨立書店，正係田園書屋，已經四十三年喇！田園書屋陪伴香港咁耐，相信好多人都會記得喺旺角街頭，見到田園書屋綠色嘅招牌閃閃發亮，係鬧市之中更顯難得，好似文化沙漠中嘅清泉一樣，或者係叫做田園嘅原因。田園書店專營文史哲學術，較多藝術設計類嘅書，最廣受關注嘅佢專門賣有關中國政治嘅禁書。
書店地址：旺角西洋菜南街56號2樓
營業時間：10:30 - 22:00
image source:IG: moon_lui
3 見山不是山，見山書店
書店特色：精挑細選文學好書
「是見山不是山，人們來到，所看到的不單是一間書店，而是背後無盡的閱讀世界。」店主Sharon解釋書店名字嘅由來。兩層高嘅見山書店，位處上環，繁華市區中難得有一處悠閒嘅所在。入面既有新書，又有二手書，店主把關選書品質，集中係文學類書籍，而無咩實用工具書。除咗可以同店主談文論學，店仲引入西營盤文具店Blank嘅型仔文具。
書店地址：上環太平山街6號C鋪
營業時間：11:00 - 18:00
image source:IG: mountzerobooks
2 無人能及，序言書室
書店特色：勁多活動值得參加
周保松話，序言書室有一項其他書店比唔上嘅成就，就係用有限嘅空間不斷咁舉辦各種類型嘅活動、講座。如果話旺角最出名嘅二樓書店，一定非序言莫屬。書店負責人都哲學出身，特別關注經典哲學書籍、當代嘅作品，同時係文學類方面，相對其他書店特別多港台詩集。如果想尋寶，都有二手書區，以文史哲為主。入面仲有隻獨眼貓店主「未未」，好鬼得意。
書店地址：旺角西洋菜南街68號7字樓
營業時間：13:00 - 23:00 （星期三休息）
image source:IG:onze_12
1 社會實驗，生活書社
書店特色：好多唔同又特別嘅日常用品
元朗大橋街市入面嘅一間書店，非常貼地，「生活就是社運」，係生活書社經營嘅原則。兩位店主希望唔走社會設定嘅道路，想為生命活出更多唔同嘅可能，認為學問唔可以得個講字，係要從生活中做出嚟嘅。生活書社，唔單止只係賣書咁簡單，入面會有唔同嘅用品、雜貨，好似環保月經杯（Mooncup）咁。走入呢個空間，脫離傳統價值觀，相信你會大開眼界！
書店地址：元朗鳳攸北街5-7號順豐大廈39號地鋪
營業時間：11:00 - 20:00（一、二、四）11:00 - 18:00（三）11:00 - 21:00（五至日）
image source:IG: bobobo_b獨立書店，香港多元文化嘅捍衛者
周保松說：「書，會為我們燃起一路的燈。」梁文道話：「香港的書店就如同一小片一小片綠洲，只有住慣沙漠的人才會敏感地知道綠洲的數量、方位與大小，並且以它們為每趟行程的重要目的地。」香港一直以嚟都被話係文化沙漠，但偏偏好少人會正面咁評價、支持，其實呢一片沙漠，都仲有好多緣州、清泉嘅。我哋千其唔好等到一切變成海市蜃樓，先至追悔莫及。香港獨立書店，代表嘅係本土文化人多元嘅呈現，眾聲之喧嘩，咁先會有獨立嘅思考，先會磨擦出精彩嘅火花。如果我哋熱愛香港，喜愛香港嘅文化，去支持獨立書店，唔單止合情合理，更係一種公民嘅責任。
分析說明：
本研究資料分析時間範圍為2018年3月31日至2019年4月1日，共一年。
網路大數據系統觀測港澳地區上萬個網站頻道，包括新聞頻道、Facebook、Instagram、Twitter及各大討論區、部落格等，針對討論『香港獨立書店 』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
