回憶當初最純真嘅自己
好多人係喺某一瞬間發覺自己大個咗，意識到自己原來已經出社會做咗幾年嘢，一早脫離咗嘻嘻哈哈又一日嘅青春時光。以前放學可以即刻衝返屋企打機，打到啊媽嗌食飯都唔肯停，顧住升lv搞到第二日欠功課又畀Miss罰留堂，但係依然可以日日如是，好似咩煩惱都無咁。依家日日都要返工，又攰又大壓力嘅生活，仲邊有時間升lv打裝，淨係可以間唔時玩吓手機Game咁。而依幾年，好多童年回憶嘅Online Game出咗Mobile版，但好多玩法唔晒，淨係可以用嚟勾起吓童年回憶。不過亦都仲有好多童年回憶嘅Online Game無出到手機版，但都仲係好多人討論、懷念。今日DailyView就同大家一齊，細數十大香港8、90後念念不忘嘅Online Game啦！
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
10 希望online（134筆）
——網公網婆
唔知大家仲記唔記嗰隻拿住刀仔嘅哈比兔呢？對好多人嚟講，呢隻兔仔可能係八十、九十年代玩家對《希望Online》嘅共同回憶。呢隻早期嘅Online Game，走可愛風格，吸引咗好多唔打機嘅女仔都入咗去玩。最緊要嘅，係《希望Online》好快推出咗當時獨創嘅「情侶系統」。好多人第一任嘅網公、網婆，都係喺《希望Online》互結良緣，嗰種第一次接觸戀愛嘅心跳，真係難以忘懷。而且總會有由網公網婆走到現實結埋婚嘅故仔，呢種童真嘅浪漫回憶同期盼，一直深埋喺我哋心中。
image source:
9 Heat Project（149筆）
——好玩過PUBG
Heat Project，喺2005年正式喺香港營運，佢嘅出現，即時吸引咗好多後生仔沉迷落呢隻game。大家放咗學，一齊著住校服落網吧，以前只會聽到大家玩緊CS開槍嘅聲音，但而家再睇真少少，原來唔止CS，Heat Project都好多人玩！Heat Project最有特色嘅係佢令玩家相當有親切感，喺旺角街頭之中混戰，台北故宮開火箭炮，真係大大超越咗其他射擊game。可惜呢隻game後期出現大量嘅外掛，改槍改圖加速器又多bug，令到隻game無咩人再玩，到最後執埋，真係相當令人可惜！
image source:
8 百變恰吉（288筆）
——反上Jump狗
香港2008年開game，2013年結束營運嘅《百變恰吉》，有玩過嘅各位朋友，真係見證咗一代格鬥game經典嘅消逝。《百變恰吉》有幾紅？喺2007、08、09年，佢都舉辦咗百變恰吉世界大會，有唔同國家嘅玩家參賽，認真把炮。除咗個人格鬥，《百變恰吉》仲有公會系統，召集咗各派人馬大戰，多人圍毆，拳拳到肉，刺激到不得了。《百變恰吉》係好講技術嘅遊戲，同今時今日只要課金鬥錢多就贏嘅世代，真係相去極遠。好多人都由小學玩到中學，真係集體回憶嚟。
image source:
7 勁舞團（465筆）
——溝女必玩
2006年，香港嘅《勁舞團》正式登場，唔係一般嘅Online Game，佢唔係玩槍，唔係玩打怪升呢，又唔係玩打交。《勁舞團》突破先河，玩嘅係兩個字，跳舞。只要入去網吧，望吓邊個人只係快速咁敲擊緊鍵盤，快到好似要㩒爆部機咁，就知佢哋係到玩緊《勁舞團》。點解咁受歡迎？因為跳舞呢種活動，係男女通吃嘅。好多中學男仔，為咗識多幾位女仔朋友，都會玩吓《勁舞團》，隨時識返個網婆，威畀身邊嘅朋友仔睇！諗返起當時情景，真係要講句，錢我就大把，我要初戀呀！
image source:
6 童話（697筆）
——唔係講緊光良
《童話Online》，可以講係網路界嘅長青樹，生存咗好耐不特止，2019年又宣布重新啟動，證明一直以嚟都有唔少人玩緊呢隻game。《童話》嘅可愛風格吸引咗男女老幼一齊玩，又以捉寵物為主，回合制嘅玩法，加上輕鬆嘅音樂，相比起其他競技類型嘅遊戲，更加啱細水長流慢慢玩。唔知有幾多人，為咗捉一隻靚數據靚屬性嘅寵物，浪費咗幾粒鐘先成功。而且呢隻game嘅以童話故事做主線，特別得嚟又有親切感。又可以一齊組隊打boss過任，同朋友約唔使出街，一齊打機捉寵仲開心！
image source:
5 彩虹冒險（709筆）
──最想要把頂降禁防風劍9
《彩虹冒險》可以話係第一代嘅格鬥Game，畫風卡通，但打起上嚟都可以好型好刺激！《彩虹》有好多元嘅玩法，想玩技術嘅有得車輪戰，想玩開心有得踢波，想掛機吹水又有練習模式，仲有得同一班friend做任務打火龍啊。唔怪得依家每逢討論到最想玩返嘅Online Game，好多人都會提到《彩虹冒險》啦！個個都話好掛住當年同一班friend，為咗升裝升屬性日日洗卡嘅日子，同埋對自己未擁有過一把頂降禁防嘅風劍9而遺憾。當年，「999」對好多香港細路嚟講，唔係報案電話，而係一個憧憬。
image source:
4 CS1.6（1013筆）
──Fire in the Hole!
世界級熱門槍Game《CS1.6》，係唔少香港男仔嘅童年，亦係令佢哋到依家仲係念念不忘。唔講其他槍game，淨係CS都出多咗好幾代，但係好多人都一直想玩返《CS1.6》，因為《CS1.6》代表住佢哋嘅童年。想當年，有幾多人當年為咗練好槍法而不眠不休咁苦練？又有幾多人不停咁喺「duct 2」到奮戰？相信好多人都唔會忘記T嘅b42同CT嘅b43，亦都唔會忘記大家裝過同拆過嘅c4。今日，再次睇返《CS1.6》高手大發神威嘅片段，係咪回想起自己第一次甩狙成功嘅嗰種熱血、興奮？
image source:
3 墨香（1034筆）
──曾經相聚於蘭州
2006年《墨香Online》一出，一個完整嘅東方武俠世界令到唔少香港青少年入晒迷，齊齊進入咗依個江湖。13年過去喇，好多人都好掛住當年玩《墨香》嘅日子，於是坊間私服不斷，但好多人都話始終都搵唔返細個嗰種感動。《墨香》吸引人嘅位，唔係佢有獨特嘅「SOS」、「包袱商人」等等嘅設定，而係一班朋友一齊成長、奮鬥嘅經歷。記唔記得當年40lv升輕功嗰陣瞬間長大嘅感覺？記唔記得一齊喺黃河開紅、一齊守城攻城？今日長大成人嘅你，聽返《墨香》嘅bgm，想唔想返蘭州？
image source:
2 跑Online（3990筆）
──跑原來可以咁好玩
《跑Online》2006年開始營運到依家都仲繼續緊，但好多人就話佢童年入面嘅《跑》早已經唔喺到喇。當年《跑》一出，輕鬆新穎嘅玩法吸引唔少學生，好多小學雞、中學雞，日日放學返屋企唔係做功課，而係開《跑》玩幾場。依家十幾年過咗去，《跑》嘅主題曲都由鄧麗欣變張敬軒，再變野仔、糖兄妹、王梓軒、曾翠如，去到依家嘅樂瞳。一首首被替換嘅歌曲，意味住一班又一班人長大，同時亦代表佢哋青春嘅流逝。當年奔跑過嘅你哋。依家都還好嗎？好想再同你哋跑返場。
image source:
1 魔獸世界（4282筆）
──為了魔獸
龐大嘅世界觀，完整、合理嘅故事背景，多元豐富嘅玩法，令到《魔獸世界》由2004年發行到依家，依然受到全世界機迷愛載，其中當然包括香港人啦。由2004年開始，香港人就卷入咗一場世界級嘅戰爭，進入聯盟同部落勢不兩立嘅世界，為咗自己嘅陣營不停地戰鬥。《魔獸》同好多Game一樣，咁多年不斷更新，早已經唔改係一開始出嘅咁樣，但《魔獸》嘅玩家好幸運，唔似其他Game嘅人睇住自己錯經深愛嘅Game變得陌生。今年出返最初代嘅《魔獸》經典版，可以重溫當年感動。
image source:
分析說明：
本研究資料分析時間範圍為2018年10月02日至2019年10月03日，共一年。
網路大數據系統觀測港澳地區上萬個網站頻道，包括新聞頻道、Facebook、Instagram、Twitter及各大討論區、部落格等，針對討論『念念不忘嘅Online Game 』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。