日日玩日日碌IG，你又係咪識用哂IG入面嘅功能？普通出Story同出post你可能識，但再深入啲再隱藏啲嘅功能你又有冇用過？除咗之前講過嘅「Share With」Sticker 之外，今次一次過話你知5大你未必知嘅IG功能！
你未必知道的IG功能一：擦紙膠
唔係講緊畫錯嘢然後要用擦紙膠功能擦走嗰隻擦紙膠，而係利用擦紙膠功能整靚個story！好多時你可能見到啲朋友post啲story係好似擦返張相出嚟咁，究竟係點做到？
第一步，你要影咗／揀咗一張你想post嘅相。然後選取「畫筆」功能，再選顏色（注意：呢隻顏色就會係你張相嘅背景色），之後長按畫面，你就應該會見到成個畫面都變咗你選取嘅顏色。
之後再選取「擦紙膠」功能，擦去你想相片呈現嘅部份。最後加埋你想加嘅字、Sticker，或者想畫嘅嘢就大功告成啦！
你未必知道的IG功能二：漸變字體
其中一個成日聽到啲人唔識用嘅IG功能一定係漸變字體，但其實超簡單！首先，打好你要嘅句子／字，然後將所有字全部選取。之後長按你所需嘅字形顏色，長按之後你會發現彈出咗一個更詳盡嘅色盤。呢個時候你需要雙手並用，係慢慢逐點取消全選同時選取你想要嘅漸變色，簡單啲嚟講，即係兩隻手同步郁，一隻控制邊隻字屬於邊隻色，另一隻手控制漸變顏色嘅排序。
顏色自由選取，所以唔一定要漸變，你鍾意整到九唔搭八都得！
你未必知道的IG功能三：分享其他人嘅Story
究竟點樣可以分享朋友嘅Story呢？係唔係要cap圖再share呢？其實都好簡單，但記住唔係個個Story都share到㗎！
要share你朋友嘅Story，首先佢嘅account要係Public Account，然後佢個Story要tag咗你。當佢符合哂呢啲條件，如果佢post咗一張tag咗你嘅Story之後，你就會喺Instagram Message收到通知，之後直接㩒「Add to your story」就可以嚕！
你未必知道的IG功能四：分享歌曲
想share歌又淨係識cap圖？好老土呀！！！究竟點樣先可以share你聽緊嘅歌或者想同朋友分享嘅歌？
你只需要兩個步驟！用緊Spotify嘅朋友仔只要喺歌曲嘅右手邊輕按嗰三個點點。
然後再揀「Instagram Stories」，就可以成功share嗰首歌去IG Story啦，咁樣以後就唔洗再cap圖啦！
你未必知道的IG功能五：Gif Sticker 關鍵字
Gif Sticker好多時都可以幫張Story增添唔少趣味，有時見過啲好得意嘅Gif Sticker，但又search唔返？可能係因為你唔知打咩關鍵字，不過唔緊要依家就俾張貓紙你！
打「textbook」就會搵到小學課本的逆襲嘅Sticker，入面有「窮到只剩腹肌了」、「謝謝你的分享」同「so what?」等嘅Sticker都超好用！
打「GBLW」就會搵到隔壁老王嘅貼紙，特色人物超可愛！！！
打「chuchu」就會搵到啾啾妹同男友，情侶最啱用！
打「hijohn」就會搵到嗨小強嘅可愛小狗狗gif圖！
打「pusheen」就會搵到pusheen喵喵，懶洋洋嘅喵喵連埋超得意嘅食物Sticker超實用！
**Follow us on:
- Facebook: CosmoHK
- Instagram: @cosmopolitan_hk
- YouTube: CosmopolitanHK**
