星期六《美女廚房》請嚟網民公認嘅完美女神張曦雯、人妻湯盈盈，仲有連詩雅。節目一開始時，主持介紹張曦雯時，關楚耀已經急不及待想同張曦雯打招呼，被主持笑佢「唔好咁心急」！
每個主持/嘉賓試食之前，Kelly都會嗌一嗌佢哋嘅名，佢哋聽完都好冧～
嘉賓關楚耀同張曦雯喺節目入面公然調情，激到班主持話：「個節目你哋自己兩個拍啦～」輪到湯盈盈嘅試食環節，湯盈盈搞笑扮Kelly，點知畀一眾評判嫌棄，場面搞笑！
第二道菜以鯰魚做主題，張曦雯煮到攰攰哋，蕭正楠就叫關楚耀上台幫Kelly按摩！Kelly就隨便畀咗隻手指尾佢，關楚耀一面冧樣幫Kelly按摩。按完之後，仲甜絲絲話自己都好舒服！一眾評判嘉賓都畀佢哋嘅互動笑死！
到咗第二輪試食環節，大家對Kelly嘅「鯰魚菠蘿咪」都讚不絕口，狼吞虎嚥食晒，連專業廚師「秋生哥Jacques」都讚好好食，舔埋痴喺手指上面嘅汁，仲話：「你話自己好少煮嘢食都煮到咁嘅水準，真係令到我自閉（卑）！」最後全部嘉賓主持都一致畀咗10分滿分！係新一集《美女廚房》第一次見到爆分！
總結成晚分數時，張曦雯獲得破紀錄高分，成為新一集美女廚神！
唔單止煮嘢食叻，佢拍劇都唔輸蝕！《跳躍生命線》繼《律政強人》後，再次係TVB劇集見到佢，飾演超索車房技工，網民都大讚佢做得夠自然，完全演繹到男仔頭性格，有時又好有女人味。
之前佢做有份做主持嘅3日2夜，都獲大家好評，仲唔吝嗇姣好身材，著Bikini出場，引死一班觀眾！
除咗拍劇、主持，佢仲好鍾意打機，成為一眾男士嘅打機女神！2017年，她開始以「kellycheung」名義喺Twitch 直播電腦遊戲如《生化危機7 惡靈古堡》、《榮耀戰魂》等。雖然直播打機嘅時候，偶然會講1、2句粗口，但觀眾們又點會介意啊？仲話佢夠貼地，夠真啊！
Kelly真係入得廚房，出得廳堂啊！打機又勁、煮嘢食又叻，唔係美女廚神咁簡單，簡直係完美女神啊！
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）