吳業坤入行十年，入行時獨男形象深入民心，但其後漸露出真面目，緋聞對象超過一打，故有「偽毒坤」之封號，食女功力絕對毋須質疑。不過高處未見高，當對住年長四十歲的薛家燕，坤哥都仲可以口花花，仲竟然傳埋緋聞，呢啲咪就係神級、超卓、頂級囉！
撰文：東方新地 ｜圖片：吳業坤IG、新傳媒圖片庫
吳業坤 恨傳緋聞
話說坤哥吳業坤逢女都冧、魚翁撒網式媾女，合作親都傳緋聞，無堅不摧嘅坤哥再下一城，之前同年長四十歲的家燕姐去到台灣拍新年特備節目都竟然「撻得著」﹗
吳業坤為冧薛家燕，當人人叫「家燕姐」，佢叫「阿燕」，人人對前輩恭恭敬敬，坤哥竟然夠膽死當家燕姐係𡃁妹咁撩，爭住食家燕姐口水尾、食完話可以間接接吻、仲冧到爆話：「仲有餘溫」㖭！
當吳業坤遇上大自己四十歲嘅家燕姐，讚佢「真心cute」時，就知道偽毒坤又發功！
王梓軒、糖妹爆坤哥癖好
同節目嘅王梓軒、糖妹都忍唔住爆料：「坤哥專門收集家燕姐啲唇印，一見家燕姐飲完水留低唇印就第一時間影低。」
即係咁，有觀眾都睇唔過眼話坤哥對住長輩冇禮貌，不過冧女嘅嘢你哋就真係有排都未去到坤哥境界，重點係氹到佢口中嘅「家燕」、「阿燕」好開心！坤哥，你又得咗喇！
鏡頭前後都唔放過機會冧女
坤哥在鏡頭前亦擺明車馬冧前輩，仲話要食家燕姐口水尾，搞到家燕姐唔知好嬲定好笑﹗
家燕大女珊珊出手斬「緋聞」
話說好多家燕姐fans聽講偶像同吳業坤傳緋聞都嚇親，大女珊珊喺IG派定心丸，話唔會畀呢段關係繼續發展。點知後來坤哥連家燕姐大女珊珊都睇中，開到口有意追求，恨到兩母女傳緋聞﹗
吳業坤完美示範搞完阿媽再睇中埋個女，早前到新城接受家燕姐訪問，當時家燕姐曾笑稱勸坤哥唔好成日口花花，咁唔知家燕姐會唔會向坤哥介紹女仔？坤哥呢個時候竟然搶答：「珊珊 (家燕姐大女石祐珊)吖嘛，我電話都攞埋啦！」見慣大場面的家燕姐都當堂窒一窒，話感情事要慢慢來！
家燕姐咁樣回應…
家燕姐呢日出席節目《流行經典50年》錄影，被問到與吳業坤的緋聞，家燕姐笑稱根本係誤會，話坤哥只係口花花，並無實際行動。咁坤哥係咪想追其大女石祐珊呢？家燕姐就解釋係珊珊擔心兩人的緋聞，所以send訊息叫坤哥唔好亂嚟！正因為咁坤哥先會有珊珊電話。無論家燕姐又好、珊珊又好，坤哥都係收吓把口比較好，唔好亂嚟啦！