【1+1+1】拍拖半年閃婚！梁詠琪爆老公肯來港定居的原因

梁詠琪 （Gigi）於2011年認識老公Sergio，二人一拍即合，拍拖半年就閃婚，更喺婚後3年誕下囡囡Sofia，一家三口過住幸福快樂嘅生活。近日，Gigi獲邀做《1+1+1》嘅嘉賓，喺節目上透露老公Sergio只因一個原因就願意放棄家鄉嘅一切，跟隨Gigi來港定居，主持人車婉婉聽完之後感動到流淚。

撰文：Kammy(原文刊於：Sunday kiss) | 圖片來源：節目截圖、Instagram、微博

愛情路上尋覓多年 終遇Mr. Right

梁詠琪嘅愛情路並非一凡風順，最為人熟悉嘅係同鄭伊健嘅一段情，二人因拍舞台劇拍出真感情，不過二人拍拖7年後最終都分手收場。後來相繼認識法籍男友Sly同美籍男友Matthew，但最後都無緣白頭。

直至2010年底，當時啱啱分手嘅Gigi，趁住2011年《香港G夜》演唱會後兩星期空檔到西班牙旅行，而呢個旅行亦令佢遇上Mr. Right – Sergio。

Gigi喺《1+1+1》節目中被主持人車婉婉問到二人相識經過，Gigi指係西班牙之旅中，透過當地嘅朋友認識當時35歲嘅西班牙籍男友Sergio，二人一見面就非常投緣，Gigi對Sergio更係一見鐘情，一拍即合。

當時Gigi同Sergio雖然十分投契，但由於Gigi覺得難以解釋自己嘅職業係咩，所以當時佢就呃Sergio自己係做model，但紙始終包唔住火，結果係一次約會中，由於周圍好多人認識Gigi，Sergio最終都係一個侍應口中得知Gigi其實係藝人嚟，不過Sergio並冇介意Gigi講大話，仲認真咁同佢講：「我好尊重你嘅工作，所以我唔會google你任何news或者作品，直至你俾我睇，我完全唔care你做乜嘢，我淨係鍾意你呢個人。」

相識半年即閃婚 梁詠琪：他很特別

喺個次西班牙之旅，Gigi因要回港工作而結束旅程，佢坦言結束個時對Sergio十分不捨，因為佢認為Sergio係一個好特別嘅人，最後兩人更因唔捨得對方而係機場相擁而哭。

Long distance嘅愛情，最痛苦莫過於見唔到對方。雖然Gigi同Sergio人經常唔係對方身邊，但佢哋一直心繫對方，分開期間Sergio更不斷鼓勵Gigi，仲每日都一齊倒數仲有幾耐就可以見到對方。

佢哋雖然好沉醉於搵對方嘅過程，但二人其實都有考慮到彼此實質嘅情況，認為大家都係朝住結婚呢個方向，所以Gigi同老公Sergio拍拖半年就隨即結婚。相信好多人都會問：「會唔會發展得太快？」但對於Gigi嚟講，一切都只係順感覺而行，種感覺好踏實並非「好夢幻」，所以作出結婚呢個決定。

梁詠琪：佢令我改變

Gigi一向畀人感覺高傲，本港傳媒更一直以「好勝Gigi」嚟稱呼佢，Gigi亦曾經表示曾因為傳媒嘅報導而迷失自我。不過，Gigi遇見Sergio後直言對方令自己改變，因為Sergio性格樂觀、坦誠，認為無需介意別人嘅睇法，令Gigi學識放鬆自己同活在當下。

老公Sergio：有你的地方就是我的家

Sergio同Gigi結婚後，甘願放棄家鄉嘅一切，同Gigi一齊喺香港生活，十分難得。Gigi喺節目上透露，自己外婆曾因長子移民到別國，長時間不在自己身邊而感到遺憾，Gigi當時聽到就一路諗起老公屋企人一路喊，因為Sergio為自己離開家鄉，替對方父母感到不捨。

Gigi當時亦同老公分享呢件事，但Sergio就答佢，自己願意跟隨對方到香港定居係佢個人嘅選擇，亦都冇後悔作出呢個決定，如果問佢邊個地方先係佢屋企，佢會話「有你（Gigi）嘅地方就係我屋企」。Sergio嘅答法真係超級Sweet！車婉婉聽完之後都感動到流淚。

囡囡係諧星 望生第二胎

問到囡囡Sofia，Gigi話囡囡遺傳到Sergio搞笑嘅一面，經常做啲得意動作𠱁人開心，更以諧星嚟形容Sofia。另外，Gigi亦坦言自己同老公都好鐘意小朋友，大家都有意生多個，不過就一切隨緣。