邊爐都可以外賣，仲有理由出街？
香港人其實真係好鍾意打邊爐㗎！但唔係講笑，依個時勢出去打邊爐真係同玩命冇咩分別，一個唔小心，唔使報名就即刻加入「邊爐家族」，咁就真係唔抵喇！驚傳染但又想烚吓烚吓？有咩計邊防疫邊shabu shabu？根據《KEYPO大數據關鍵引擎》分析，最近無論因為抗疫定因為要Home Office多咗好多人想叫外賣，但又唔想淨係食飯盒咁Dry，而依家好多嘢都可以喺屋企食得到，例如酒店外賣、茶樓嘅點心，甚至連邊爐都可以畀埋你返屋企打。好多人都喺網上整理咗外賣嘅懶人包。嗱！今次就等DailyView同你介紹八大送上門嘅邊爐，等大家可以將邊爐帶入家門，可以安安心心同屋企人開住個冷氣，開開心心咁打邊爐囉！
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
8. 鍋心粥底火鍋（159筆）
好多為食之人好鍾意食粥底火鍋，淥完嘢食仲有充滿精華嘅靚粥埋尾，真係唔係講笑。其實想咁嘆唔一定要冒住疫情嚴重走去堂食嘅，「鍋心粥底火鍋」外賣自取帶返屋企食啦！一家人安安心心咁喺飯枱享受2款精選時令海鮮，再自選5款海鮮同8款配料，揀多3款菜，每位都係200蚊咋！打邊爐唔使搵命搏嘅，提早一日打電話去「鍋心粥底火鍋」自取分店訂購就得啦！
網民：「唔多粥底火鍋有外賣，鍋心真係贏晒」
7. 酒鍋（222筆）
依家疫情咁嚴重，唔喺銅鑼灣「酒鍋」到望住維港打邊爐，喺屋企到食住一樣嘅嘢食其實都唔錯，人身安全梗係緊要過個靚景啦！其實「酒鍋」一路都有做外賣嘅邊爐，依家為咗方便各大食客，訂餐自取又得，送上門又得，仲不時有折同免運費啊！㩒幾個掣就可以等「酒鍋」三層火鍋「野餐籃」送到，用附餐嘅8款調味配料較個靚醬，唔使出門都可以嘆個正邊爐啊！
網民：「打邊爐最緊要就係個醬！酒鍋連外賣都滿足到我對醬嘅需求！」
6. 香香宮煮（351筆）
喺疫情爆發之前，「香香宮煮」真係好Hit！以宮延劇嘅包裝，店入面有晒龍椅之類嘅裝飾同宮延服裝，卡位仲用晒宮殿名，唔少人入到去即刻變晒王爺同公主。除咗個場夠有特色之外，嘢食嘅質素都好得，啲料又靚又足，真係打個邊爐都十足個公主咁。依家疫情嚴重，鍾意打邊爐嘅公主就先移駕到家中， 小心萬金之驅，想食就派人去外賣自取，或者叫foodpanda啦！
網民：「公主好掛住啲花膠啊！」
5. 616牛肉火鍋專門店（525筆）
對班深愛打邊爐嘅食肉獸嚟講，碟牛肉分分鐘係可以左右成個邊爐嘅正負評，係決定場邊爐好唔好食嘅重要關鍵。喺依個廣大對牛的需求嚟講，「 616牛肉火鍋專門店」依間好「香港」，好「本土」嘅鋪頭真係滿足到好多人嘅慾望，一次過畀成20幾款牛你揀，實行真係「食晒成隻牛」！依家因為疫情關係，有外賣自取8折啊！仲可以打電話去餐廳，或者透過Facebook、OpenRice買到佢哋嘅牛肉、湯底同配料。
網民：「識食梗係食616啦！有良心唔會食到背脊骨落啊嘛！」
4. 牛摩 （1029筆）
大家聽「牛摩」評價聽得最多嘅，就梗係佢嘅抵食啦！好多人晏就想輕輕打個邊爐，就平平地叫碟肉，再拎少少熟食咁；想食多啲就畀貴少少食個放題，百幾蚊一位就可以熟食任夾，邊爐任淥，真係抵到爛！依家好多人避免去啲人多嘅地方，冇得落去「牛摩」喪食點算啊？唔驚啊！「牛摩」聽到大家嘅訴求就即刻做嘢，喺原本外賣自取套餐上再增加好多抵食配料，價錢低至178蚊咋！買滿400蚊仲有其他優惠添！
網民：「牛摩都係放題最抵，外賣都抵嘅，不過差咁啲囉。」
3. 火鍋撚（2952筆）
相信好多巴絲都有聽過「火鍋撚」！好多人大讚佢喺香港有咩事都會出心出力，係一間值得香港人力撐嘅良心食店。除咗個名之外，嘢食都當然好得，受到唔少食客激讚。本身因為疫情導致嘅營運問題，「火鍋撚」決定咗要暫時總店停業半個月，分店停業直至另行通知。好多食客都好唔捨得，諗住出唔到街食都要想可以叫返屋企食，幾經追問同查詢，「火鍋撚」決定重開外賣服務！各位巴絲快手出盡力懲罰佢哋啦！
網民：「撐住啊！佢哋咁為香港人，大家仲唔出盡力懲罰佢哋？」
2. 海底撈 （6915筆）
嚟自中國嘅火鍋店「海底撈」真係唔食都知個名啊！佢一直出晒名係皇帝級嘅服務，打個邊爐竟然有Show睇、有甲修，連店員上個麵都上到好似耍雜耍咁，真係畀足五星級嘅服務招待客人。防疫時期，「海底撈」都有外賣自取同外賣送上門嘅服務，一樣主打係令客人安心又放心。除咗老樣子嘅鍋爐具同祛味禮盒之外，仲講到明所有食品嘅製作同包裝過程係全程受到監控，餐具亦都全部消毒過。聽落都好似幾好啊！
網民：「而家梗係最緊要安全啦，消晒毒又有監控，係放心啲嘅。」
1. 鼎王麻辣鍋（9656筆）
麻辣，可能係邊爐界最多人鍾意嘅湯底； 而「鼎王麻辣鍋」，就係最近香港網民討論「外賣邊爐」嘅熱門第一名。「鼎王麻辣鍋」有咩咁勁？佢係嚟自台灣嘅過江龍，主打「麻辣」同「酸菜白肉」兩個湯底，唔少香港人話勁有台灣味。食住啖啖鴨血，烚埋塊麻辣肥牛，真係好似身處台灣咁啊！依家唔去堂食，可以外賣自取返屋企食，直頭係令屋企瞬間變台灣，機票都慳返啊。仲諗？冇得去台灣住就落住單先啦！
網民：「鴨血真係無得頂，喺台灣食完真係返唔到轉頭。」
【香港網路溫度計調查結果之圖文，未經授權請勿轉載、改寫】
分析說明：
本研究資料由《KEYPO大數據關鍵引擎》提供，分析時間範圍為2019年03月28日至2020年03月26日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『外賣火鍋』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。