有驚無險，又到Happy Friday！早前因為疫情關係，大家對落酒吧飲嘢都有啲卻步，雖然飲酒在家都可以，但係想飲調酒師特別調製嘅雞尾酒就冇咁容易，最近就有品牌乘機推出全新「homeshake DIY Cocktail」，仲話手殘都整到。另一邊廂，香港又有新手工啤酒登陸，擁有220年歷史、英國最大釀酒品牌GREENE KING，帶來傳統釀酒工藝嘅精釀啤酒。睇嚟大家即使要留在家中relax，都有唔同酒品選擇。唔講咁多，等CONY為大家逐一介紹！
輕鬆自製打卡雞尾酒
全新網店homeshake推出嘅DIY Cocktail步驟簡單，將材料按次序倒入杯中，再以果乾、乾花裝飾，就能製作出又好飲又IGable嘅雞尾酒。客人無須購買任何專業調酒工具及各種酒款或具備調酒專業知識，只需要預備冰塊，手殘人士（好似CONY咁）都能迅速完成，而且品牌更設計出具漸變效果嘅雞尾酒，切合現代人打卡嘅需要。
暫時網店推出咗4款口味，而每盒可以調出兩杯雞尾酒，基本上有齊晒所需嘅酒、裝飾果乾、乾花、混合用的汽水及紙飲管，盛惠$180，6月8日前預訂可享早鳥價每盒$168。如果屋企冇酒杯，大家亦可以額外加購雞尾酒酒杯及專業用調酒棒，調出嘅雞尾酒睇起來更加專業，打卡亦更呃like。
即睇4款DIY Cocktail：
homeshack DIY Cocktail
網址：https://bit.ly/2XfrJl6
英倫老字號精釀啤飲工藝
精釀啤酒喺香港愈來愈盛行，而誠哥（李嘉誠）早前更大手筆地收購咗英國老字號酒廠GREENE KING，仲帶埋番香港。品牌最廣為人知嘅係佢傳統英倫嘅精釀技術，皇牌產品「GREENE KING IPA」以「Real Ale」方法釀製，即係啤酒喺釀造後唔會把酵母過濾就直接裝進酒桶，再運到酒吧，不加入氮氣和二氧化碳，再以人手泵酒，帶出酒花嘅清新香氣。
雖然品牌「年紀」有返咁上下，但佢地推出嘅BELHAVEN系列手工啤酒就糅合了傳統與創新技術，如「BELHAVEN橡木桶精釀金啤酒」，將有如威士忌之雲呢拿香甜與橡木香氣透過自然釀造過程融入啤酒裡。無論你鍾意傳統、地道英倫風味，還是創新之選都有得揀。
▲（左至右）
OLD SPECKLED HEN英式淡色精釀啤酒：入口順滑，同時帶香濃麥芽及拖肥香氣，而且佢嘅酒體較醇厚，帶果香回甘滋味；
GREENE KING IPA印度淡色精釀啤酒：以精選啤酒花Pilgrim、Challenger及First Gold等精釀而成，香氣帶酒花的清新淡雅，入口舒爽略帶清甜，屬入門之選；
GREENE KING Ice Breaker淡色精釀啤酒：保留Citra及Simcoe啤酒花之微甜果香，入口層次分明帶獨特微甘，清爽氣息最適合夏日品嚐。
▼（左至右）
BELHAVEN 蘇格蘭黑啤酒：獨特三重麥芽風味，滿溢咖啡及黑朱古力味之烤麥芳香；BELHAVEN 蘇格蘭薊花精釀啤酒：入口甜香回甘，甘甜並重；
BELHAVEN 橡木桶精釀金啤酒：用上斯佩河畔威士忌橡木桶釀製、富雲呢拿香甜及橡木香
BELHAVEN 蘇格蘭精釀啤酒：以蘇格蘭大麥及經典發酵程序釀造，花香滿溢。
銷售點：Taste、Fusion及百佳超級市場
