上一次拍攝【鮨三川】大收旺場，好多人睇完都問我晚市好唔好食！由於我只係食左午市，所以我只係今次挑戰返佢個晚市！
試完午市，唔敢挑戰晚市嘅朋友，今次要黎睇下啦！
「窮遊達人YOUTUBE頻道」訂閱我
https://www.youtube.com/channel/UCQ3yqgcHpucwUhSfDdjNpEg
詳細文章介紹：
今次試呢個晚市，只係得一個菜單一個價錢，HK$1680。
走傳統日本正宗廚師發辦風格，黎到食OMAKASE就係食當店最新鮮食材。
食嘅野無得揀，你想揀第二個價錢都無，所以餐單都無得你揀。
晚市內容包括：
前菜一份
刺身五件
時令料理一件
壽司八件
卷物一件
湯一碗
甜品一份
簡單介紹下，鮨三川佢地店家堅持唔玩花巧，走正宗日本Omakase做法，只係以最時令嘅美味帶比客人，所以一切都係以速度為主，所有食物都要趁新鮮食，因為佢地一直以來都對最新鮮食材有一份堅持，希望食材以最佳狀態送到客人口中，而非視覺享受。
開始吧
【鹽味炸日本銀杏】
口感好結實，鹽味好提鮮，炸過好香口，作為前菜幾好食。
但前菜就真係得呢一款，如果有個沙律會更開心。
同埋佢無左午市個茶碗蒸，如果有我會開心d，因為佢個蒸蛋真係好好味。
【北海道厚岸真蠔】
調味非常簡單，只係用左日本青檸+柚子汁，無太多花巧野，先可以食得出靚蠔本身嘅鮮甜味！
好大隻，味道好濃郁，口感好爽脆，腦部位置好CREAMY，好重奶油感，好漏但好正！
【中拖羅刺身伴紫菜】
以紫菜包裹著中拖羅刺身，中間夾上日本大葉(紫蘇葉)、竹碳鹽、鮮山葵蓉，由師傅即製席遞上即食，非常新鮮脆口，中拖羅味道好濃魚油甘香，非常之正！
【石垣貝刺身】
日本三陸產的石坦貝，師傅新鮮即拍都仲係彈起，勁新鮮！
幾乎無任何調味，只有少少特調醬油，已經食到佢好鮮味，真係好好味，仲好彈牙，簡單而高級嘅食材！
【酒漬海膽醬拌牡丹蝦刺身】
以紹興酒撈勻海膽成醬，非常之極度惹味，係我第一次食嘅味覺享受，除左本身海膽嘅鮮甜之外仲多左份酒香。
至於牡丹蝦係完全無經過雪藏，直接以冰壓住新鮮日本空運直送到香港。
蝦身好粗，口感好彈牙，咬落膠質好重好黏口，好好味！不得了！
【炙燒鰹魚刺身】
鰹魚外層燒過，中間完全刺身狀態，好腍好滑，但味道偏清淡。
由於鰹魚好淡味，所以搭配上淡路島洋蔥製成醬，淡路島洋蔥係全日本最高級第一位洋蔥，一般都係用來製作最高級料理用，所以用佢做成醬真係好香甜可口。
另外表面再撒上淺蔥碎，呢個淺蔥亦都唔係簡單，原來係水種蔥苗，無泥味，但蔥辛辣香卻非常之強，係日本比三星蔥及萬能蔥更昂貴，我查過一棵淺蔥原來索價要HK$100！所以真係唔簡單！
【肝醬鮑魚刺身】
宮城縣產黑鮑，原來一隻係兩位用，所以每人份量係半隻大鮑魚。
每隻鮑魚都以味淋、鮑魚殼、清酒、鹽、昆布燉兩個小時，不停重用的鮑魚汁相當濃重嘅鮑魚鮮香，勁入味好食。
但最精彩係佢個肝醬，簡直係神來之筆，以鮑魚平時最腥的肝臟部份，加入調味做成肝醬，食落完全唔腥之餘仲非常之香！味道有少少似蟹膏，咸咸鮮鮮味，好新穎嘅食法！
食完刺身，跟住就到「旬之料理」
【天婦羅白子】
今次我中獎的「旬之料理」就係炸白子。你知啦食OMAKASE每次每個人食嘅野其實都好唔同，所以好似中獎咁我今次抽中左白子呀！好開心！我個人超鍾意食白子，係日本冬天旅行時成日都會叫黎食，有時仲會去超市買現成白子刺身黎食，我真係大愛白子。但今次有D唔同，因為師傅將佢製成天婦羅，我一見到有少少失望，點解會將佢整熟左架！都既然米已成炊，唯有一試。
由於想比觀眾睇到佢裡面長甚麼樣子，所以要求師傅幫我切開一半影比大家睇。
食落去，炸白子原來不比刺身差，雖然無左刺身果種爽勁同冰涼感，但食落更creamy，好似食緊CREAM CHEESE咁滑溜，好膩好濃重，外層加咗海鹽，咸咸地，中間夾左紫蘇葉黎炸，多左份香氣，口感真係好黏口，如果頂唔順佢太膩，可以用伴碟嘅青檸唧D汁黎食，更加清新可口呀！
【鰤魚壽司】
以鰤魚腩製作的第一款壽司，有別於純壽司的OMAKASE，因為第一件已經十分濃味甘香！鰤魚腩先風乾過，濃縮咗油份，油花甘香味美，可以媲美金槍魚腩，超肥美多油脂，配上當店特製醬油真係不得了，好食到癲！
【富山白蝦壽司】
以一大堆細隻小蝦堆砌而成的壽司，無見識如我，以為佢係一堆未發育蝦仔，用黎充當大場面，非也！
原來網上一查，富山白蝦大有來頭！而且秋冬仲係佢地盛產期！
白蝦是生長在富山灣 300 到 600 公尺水深的小型蝦，身長約六公分左右，活著的時候近乎透明但是帶著一點粉紅色光澤，所以也被稱為「富山灣的寶石」。
首先要處理白蝦殼已經非常複雜，好細隻又易整斷，所以係非常花功夫。而且要空運直送再高速新鮮處理，一間小店要處理多種食材時，處理白蝦就真係變得好唔簡單！味道方面比較清淡，有好香嘅鮮蝦味，加上以嬰兒級紫薑製成薑蓉提鮮，柚子皮提味，真係一道非常好味嘅手工料理！
【秋刀魚壽司】
以新鮮當造的秋刀魚做成刺身，真係我嘅最愛！雖然我唔知呢條秋刀魚咩來頭，點解可以擠身我呢個高級omakase之中，淨係知道佢係屬於繁殖期游回北海道地區的秋刀魚，但係佢的確非常肥美，而且好厚肉！
秋刀魚油份好重，有種獨特的腥味，但對於我來講係一種鮮味，我個人極之喜歡，真係好好食，味道好突出，可算是呢個omakase我排第三位最好味的壽司！，好肥美，彈牙，有微微魚腥，好嫩
【醬油筋子壽司】
筋子即係三文魚籽，但佢仍然黏附著筋膜所以日本人叫佢做筋子。就係由於佢仲有筋膜包裹住，所以裡面充滿勁多三文魚油，超級香甜。壽司以紫菜簡單盛載，內以柚子皮提味，加上少許當店醬油，食落真係不禁大叫好好食呀！
【赤鯥魚壽司】
赤鯥魚以炭火網燒過，並唔會用石油氣槍燒烤，非常細緻認真，味道亦唔會帶有GAS味，反而多左層炭烤香味，相當細心！赤鯥魚腩好重油份，燒焦位置略帶微苦，以柚子胡椒調味提鮮，加上青檸汁降膩，雖然超多魚油但又唔會食到油膩感，非常之好味的火炙款壽司！
【子持蝦蛄壽司】
以北海道出產的子持蝦蛄(帶卵的瀨尿蝦)製成無米飯壽司，師傅表示由於蝦蛄帶卵，加上米飯反而食唔出佢嘅鮮味。介紹返，蝦蛄醬汁係以蝦蛄拆除出來的蝦殼，加入調味煮成醬汁，簡直係將蝦蛄嘅鮮味再濃縮一次奉上。蝦蛄口感好軟滑，裡面帶有蝦子，質感較硬，口感似食橡皮糖，味道只屬一般，較為平淡。
【香箱蟹壽司】
本晚最矜貴壽司登場，香箱蟹壽司！
松葉蟹不如香箱蟹
松葉蟹還不如香箱蟹更值得品嚐，因為香箱蟹的鮮味更為突出。相比之下，松葉蟹雖則肉質纖幼，但仍不及香箱蟹的口感豐富，味道鮮甜。
松葉蟹注重吃蟹本身的肉質，而香箱蟹主要是食蟹膏和蟹子為主。香箱蟹的體型較細小，是因為香箱蟹要反覆產卵、孵卵，以致減少脫殼次數令體形有所差異。再加上在產卵及孵卵的過程中，香箱蟹都有機會因水溫的變化而死亡，所以蟹因產量少而變得珍貴。
香箱蟹
規定每年11月初至翌年1月初才可捕捉，雌性松葉蟹
特點: 鮮甜出眾，適產卵季節，蟹子飽滿，蟹膏香濃
今次呢件咁奢侈的壽司，以雌性松葉蟹的蟹肉、蟹膏、蟹子合製而成，一絲絲蟹肉，一大堆真蟹籽(坊間成日用飛魚子扮蟹籽)，一大粒橙色蟹膏，一啖食落去，有軟滑、咬口、彈牙三種唔同口感，真係好邪惡好奢侈 哈哈！勁香松葉蟹鮮味，好食到講唔到野。
【醬油金槍魚腩壽司】
香港人最愛的拖羅壽司終於登場，基本上OMAKASE鐵腳埋尾一定有拖羅同海膽，如果唔出現真係令人太失望啦！拖羅只係簡單用醬油沾過，無特別做法可言，但食落有滿滿嘅感動！米飯嘅醋味同口感都應記一功，絕對唔係大家食DONKI或者平價壽司店拖羅可以媲美，真係好好味，佢個醬油都好加分，真係有日本食到嘅感動！
【雙層海膽軍艦壽司】
最愛嘅海膽登場！以北海道馬糞海膽＋鹽水赤海瞻合拼而成，堆積如山送上，味道極度鮮甜可口，紫菜、醬油、米飯等等都配合得天衣無縫，好鮮甜美味，海膽嘅濃重香氣係我鼻孔度噴返出黎，相當強勁的壓迫感！好好味呀！
【花竹蝦太卷】
以九洲花足蝦做成太卷餡料，相當過份！一般omakase都會將花竹蝦做成主角一樣咁製作握壽司，而鮨三川只係將佢做成太卷埋尾！？太卷加入乾瓢、日本白石小青瓜、自家製甜蛋，口感好豐富，花竹蝦極度鮮甜彈牙！好味講返乾瓢，其實係葫蘆瓜乾，再以自家製醬酒糖漬方式處理，甜甜地，相當好味！
【鮮蝦麵豉湯】
鮮蝦，但湯裡面完全無蝦，何解？細問之下，原來師傅係將花竹蝦殼拆下，再以烤焗方式烘乾，濃縮蝦殼素中的香味，然後再放入麵豉湯中煮3-4小時，所以呢個麵豉湯一打開蓋已經聞到濃烈的蝦香味，非常唔錯！好好味~
最後送上甜品作結尾。
【福岡草莓】
老實講， 我係有少少呆左嘅。居然埋尾甜品只係得一粒草莓仲要一開三??????我老實講係非常之失望，因為午市甜品係一個紅豆雪糕，相當香甜，以為晚市會更加豪華，相反佢只係得一粒草莓。不過事實上食落真係非常之甜，係我從來無食過咁重香水味嘅草莓，即使我係日本買HK$30一粒的雪兔白草莓都比唔上佢嘅香甜，我唔知佢咩來頭，點解可以咁香甜，但我都係想要返杯雪糕。不如你下次就用呢個草莓做成雪糕比我食啦 :D 我會更開心
鮨三川
地址： 銅鑼灣渣甸街50號渣甸中心6樓
營業時間： 12:00–15:00, 18:00–23:00
電話： 2610 0858
➥? 訂閱頻道－ https://www.youtube.com/c/窮遊達人MrTravelGenius?sub_confirmation=1
📝 窮遊達人 - 官方網站
足本節目 ⏬
Full Version ⏬
Facebook/YouTube 搜尋Search
🔥窮遊達人 Mr. Travel Genius🔥
🎬 YouTube Channel -https://www.youtube.com/c/%E7%AA%AE%E9%81%8A%E9%81%94%E4%BA%BAMrTravelGenius/featured
🅿️ Facebook - https://www.facebook.com/mr.travelgenius/
📸 Instagram - https://www.instagram.com/mr.travelgenius/