足總盃八強賽事，曼城主場對紐卡素，曼城方面今日排出3-2-4-1陣式，今日中堅出返戴亞斯(Ruben Dias)同加維度(Josko Gvardiol)，防中有高華錫，中場迪布尼因傷缺陣用上貝拿度施華。另一邊嘅紐卡素今日排出5-3-2陣式，以安東尼哥頓同伊薩克(Alexander Isak)作雙前鋒，上場有入波嘅積及梅菲(Jacob Murphy)出任右閘。
上半場曼城較多時間圍攻紐卡素，而紐卡素則集中防守反擊，然而即使紐卡素全軍回防塞住禁區，13分鐘貝拿度施華禁區內右路起腳，省中博文(Sven Botman)笠死門將入網，領先一比零。31分鐘貝拿度施華再一次禁區頂右路起腳，其間博文加一頭打算解圍，但係改變方向入網，結果貝拿度施華個人梅開二度協助曼城領先二比零。
廣告（請繼續閱讀本文）
35分鐘紐卡素都有一次機會，當時丹般恩禁區接應傳中set返中路，由伊薩克半車身窩利射門，但被門將奧迪加(Stefan Ortega)撲出，而呢一個已經係紐卡素喺上半場唯一嘅起腳。5-3-2陣式比起一貫嘅四後衛嘅陣式或許令到球員有所唔適應，不過13分鐘已經被攻入一球打亂穩守突擊部署，兩路又缺少突破點，右上安東尼哥頓健康程度成疑，結果上半場已經反映咗賽事結局。
下半場紐卡素並冇起色，去到62分鐘換入阿米朗(Miguel Almiron)、中場米利(Lewis Miley)、安達臣(Elliot Anderson)同閘位嘅賀爾(Lewis Hall)，雖然增添活力，但係曼城依舊控制節奏，並且拖慢嚟踢，最後搓下搓下到90分鐘以2比0淘汰紐卡素，晉級足總盃四強。
▼Follow 足球港場
廣告（請繼續閱讀本文）
Instagram: https://www.instagram.com/footballarena_hk/