張立基被女友呃200萬吞100粒藥自殺 重生後返家照顧老人痴呆母：反而最開心

今年60歲的張立基在1986年參加亞視第一屆《未來偶像爭霸戰》奪冠加入歌壇，90年代曾經出過多張唱片；可惜後來為情所困，被騙去200萬後曾經自殺。最近張立基接受「香港演藝人協會」訪問，重提入行多年的經歷外，更特別提到當年嘗試輕生一事，他寄語年輕人：「唔好放棄自己，人生係一段好精彩嘅路程，同埋最緊要放得低。」

【點擊睇張立基重提輕生經歷】：

踏入歌壇36年的張立基，其實早在1979年中學畢業時，身為disco常客的他因「舞功」了得，已獲安排入讀麗的舞蹈訓練班，並為歌手伴舞。當時他曾獲黎小田提議他參加新秀大賽，不過他在1986年參加亞視比賽入行，簽約亞視。4年後轉投無綫，憑《Electric Girl》一曲走紅，創事業高峰。不過張立基之後為情所困：「始終係年輕人，對感情睇得太重。我對未來冇諗法，成日都係隨遇而安，因為感情睇唔開，都試過自殺，最後走唔到，可能係個天唔想我走。」張立基坦言當時決心想離開：「嗰時我食咗成100粒藥，50粒係安眠藥，昏迷咗3日3夜，醒返已經係3日後。」

太執着泥足深陷

張立基當時不想留在香港而到內地：「因為喺香港太多傷心事，唔係唱歌方面，係感情上，同埋好多朋友喺身邊，會好多壓力，我受唔到啲人成日都嘈我。屋企人又唔理我，喺我最唔開心嘅時間全部搬走晒，我好hurt。我係獨仔，但一直得唔到屋企溫暖，可能因為咁，想喺愛情方面有啲寄託；其實我好想一個人愛我，令我感受到家庭溫暖，可能因為太執着而泥足深陷。」當時香港100萬已經買到一層樓，而張立基卻被當時女友騙了200萬：「我覺得好受傷，我覺得我冇錯，只係遇人不淑，識咗個壞人。我到而家諗返起，失去好多嘢，失去事業、家庭、金錢，但我唔介意付出代價。」

患抑鬱症十多年

張立基更表示被抑鬱症糾纏了十多年：「我返大陸，再返嚟香港，先至睇開咗件事。」當時返港是因為媽媽抱恙：「2008年尾返屋企，開始陪佢睇醫生，同媽咪住，佢有啲老人痴呆，照顧咗7、8年，反而呢段時間好開心，係好無形，但好滿足。」張立基同時寄語時下年輕人：「我希望年輕人唔好放棄自己，人生係一段好精彩嘅路程，睇下你點行、點睇，同埋放唔放得低。我成日同人講，最緊要係放下，係好難做到，但做到就樣樣嘢都海闊天空。」

提到與MIRROR成員Anson Lo撞樣成為熱話，張立基說：「最早期有人掟過相畀我話我哋兩個好似，我睇咗唔敢講話好似，冇理到，跟住就有一股熱潮出現。」後來蕭定一找張立基扮Anson Lo拍廣告，他笑說：「純粹機緣巧合，好老實講，我唔係為錢，我係鍾意玩呢樣嘢，拍下戲，搞下笑。」

【其他閱讀】：

陳曼娜71歲生日大頭合照皮膚光滑 網民驚訝幾乎零皺紋：貴氣！

陳山聰罕談「失豪門女婿」後有人落井下石 形容陳敏之曾「當見我唔到」

香港小姐再競選丨何沛珈棄護士好工選港姐 成《愛回家》最強姣精獲關注

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ