47人案求情．新東｜范國威友通宵排隊：一定會等埋佢哋出嚟　何桂藍前囚友旁聽

47 名民主派被控「串謀顛覆國家政權」罪，最後一批、參選新界東的 9 名罪成被告，周一（2 日）展開求情。歌手黃耀明指，情況「真係好艱難其實」，希望各人無論佢哋作出甚麼決定，「都好堅強地繼續落去，同埋希望佢哋平安」。
范國威的友人凌晨起到西九龍法院外排隊，指范仍有意志，又哽咽稱盼在最艱難的時期，「陪住佢哋行落去…我一定會等埋佢哋出嚟先」。有人攜吳靄儀新作《雨中的香港》排隊，引述當中〈遙遠的看見〉一文，「我諗還有人在、彼此看見，係一個好重要、繼續落去嘅動力」。
另外，有在獄中認識何桂藍的朋友亦到場旁聽，「想畀佢知道，即使我放咗學都好，我冇忘記佢同埋好想畀啲支持佢」。曾為楊岳橋助選的吳小姐，形容楊是個「好斯文，對工作好有理想、有抱負、好認真、對人好好」的人，到來旁聽希望讓楊知道「我哋好多人都記掛佢」，亦冀「雖然個世界咁壞，但係都要企喺真嗰邊」。

約 70 人排隊　黃耀明、林卓廷母亦旁聽

周一處理求情的新東 9 人，均被指為初選參加者，包括受審後被裁定罪成的何桂藍、陳志全、鄒家成及林卓廷 4 人；以及選擇認罪的劉頴匡、楊岳橋、范國威、呂智恆、林景楠 5 人，周一起展開求情，預料需時 4 天。

截至早上 8 時，有約 70 人排隊旁聽，包括早前獲判無罪的李予信，表示「呢個（旁聽）成為咗我哋日常，關心法庭發生嘅事⋯好多案件都值得大家身體力行去關注」。

另外，林卓廷母親、劉頴匡女友黃于喬 Emilia、歌手黃耀明、社民連主席陳寶瑩、前立法會議員邵家臻及旅遊作家 Pazu 薯伯伯亦到庭旁聽。

黃耀明：希望佢哋好堅強地繼續落去、平安

歌手黃耀明中午離開法院時，被記者問及看到被告的心情，他說「我諗係知道我哋仲喺度支持緊佢哋…呢件衫係阿藍嗰啲同學送畀我…因為佢喺呢度讀過書，佢喺荷蘭讀過書，咁所以今日專登嚟，其實我唔係淨係支持阿藍，個個、每一個人都支持……仲有慢必呀，都係好好朋友嚟」。

他又稱，何桂藍不作求情陳詞是她的決定，「我覺得佢一路都係好堅持佢自己…佢自己嘅立場，我諗，我希望佢可以繼續好…好 stay strong」。

被問及有沒有說話想對被告們說，黃指「…我都唔知點講，因為其實真係好艱難其實，我希望佢哋…無論佢哋作出咩決定，佢哋都好堅強地繼續落去，同埋希望佢哋平安」。

范國威友憶范「搞笑、有意志」

凌晨約 12 時抵達排隊的蘇太指，曾是新西尹兆堅的義工，而各區民主派會跨區交流，與范國威亦認識近 10 年。她稱，通宵排隊並不辛苦，「對於我哋嚟講，可能我哋熱嘅係一日，但係佢哋（已還押）3 年，佢哋比我哋辛苦好多」。

蘇太指，范為人搞笑，「你唔好見佢文質彬彬咁樣，但其實佢係一個著套西裝搞爛 gag 嗰啲人」，他還押後亦不時探望對方。蘇太指，在范不開心時會盡量安撫他，「我哋去講笑、盡量係好開心嘅 15 分鐘（探訪）」，「吸走」其負面心情，又形容他有意志，「我知佢頂得住」。

同關注何桂藍及鄒家成　「一定會等埋佢哋出嚟先」

她另稱，特別留意何桂藍及鄒家成，因支持記者及覺得鄒「敢言」，希望旁聽支持他們，「想話畀佢哋聽，我哋冇抌低過佢哋，無論佢哋身處何方，身處一個好艱難嘅時期，或者好艱難、好困境、好困局嘅地方，但我哋冇放棄過佢」。

她哽咽稱，替被告感到辛苦，「佢哋為我哋去背負咗我哋嘅責任…我覺得係一份愧疚喺度，所以喺依家最艱難嘅時期，好多嘢做唔到嘅時候，我會選擇喺安全、平安之下，我會繼續行落去，陪住佢哋行落去。其實可以走，我有能力走，但我一定會等埋佢哋出嚟先…一個都不能少」。

引吳靄儀新作指「還有人在、彼此看見」很重要

不願上鏡的 Amy（化名）帶同吳靄儀新作《雨中的香港》排隊，指自案件於 2021 年提堂起已來旁聽，她特別關注何桂藍、鄒家成，「佢哋可以將自己嘅理念好清晰去表達」。Amy 指，書中其中一篇文章名為〈遙遠的看見〉，「遙遠的看見，亦都係每一次讓彼此看見，無論律師、無論被告、無論家人」。

她指，每次來到法庭，「見到熟悉嘅面孔，甚至唔識但你知道嗰啲係支持嘅人，你都覺得還有人在」。她續指，「我諗還有人在、彼此看見，係一個好重要、繼續落去嘅動力…我成日都記住呢篇文，係一個提醒係一個動力」。

何桂藍前囚友：「放學」後沒忘記她

在獄中認識何桂藍的陳小姐則指，「因為良知我先嚟，想畀佢知道，即使我放咗學都好，我冇忘記佢同埋好想畀啲支持佢」。陳稱，何在獄中常看書及報紙，至她出獄後，仍不時探望何桂藍，形容她「心臟非常強大嘅一個人、好正面」。

何桂藍、陳志全、劉頴匡友：不如重閱抗辯

與何桂藍、陳志全、劉頴匡相識多年的 Louis ，今晨 7 時許到場輪候。他形容心情平坦，對結果已心中有數，只希望見證整個過程，亦會一直等候各人刑滿。

Louis 又指，近日探望各被告均狀態不錯，但希望外界與其聚焦情緒上的表達，關心被告「係咪好慘、好勁」，不如重閱何桂藍的文字、各被告庭上的抗辯，「認真諗下呢個時代仲可以做咩，除咗旁聽可以做到咩」。

楊岳橋友：望讓楊知「我哋好多人都記掛佢」

曾為楊岳橋助選的吳小姐約 8 時前來排隊，她表示因為楊岳橋不是經常出庭，已很久沒見過他，昨晚心情忐忑，睡了兩小時就趕來法庭。

她形容一向認識的楊是個「好斯文，對工作好有理想、有抱負、好認真、對人好好」的人，希望讓楊知道「我哋好多人都記掛佢」，亦冀「雖然個世界咁壞，但係都要企喺真嗰邊」。

新東選民首次旁聽　盼支持、見證

新東選民 Janice（化名）、阿森亦到場旁聽。Janice 指，對范國威、楊岳橋比較熟悉，之前一直想來支持，惟長時間不在港，今次是首次往法庭旁聽支持被告。63 歲的阿森則指，覺得何桂藍「好勇」，「支持又好、見證又好，年紀大啦，都希望係香港見到曙光、陽光司法嘅一日」。

李先生今晨 7 時許到場輪候，希望支持何桂藍，他稱一直很尊敬何，上星期在延伸庭見到她，觀察對方狀態比想像中好，「成個人好 active」。他又指，早前有留意何桂藍出庭抗辯，感慨何說出「好多人都唔講得」的話，希望對她說「辛苦晒」。

HCCC69/2022、HCCC70/2022
《法庭線》報道全部免費開放，有賴讀者訂閱支持營運：
https://bit.ly/3LJeOzX
追蹤《法庭線》網站及各平台：
https://linktr.ee/thewitnesshk