電影《孤注一擲》提到，人之所以經常被騙或投資失利，往往是因為「貪心」及「不甘心」。有年逾40歲的中年銀行職員，疑不甘心冇發達，沉迷短炒獲利致在股場損失慘重，其後更失業。惟他失業後未有全力找尋工作，反而想花掉珍貴的10萬元積蓄去讀書進修，為的竟是想有更多空閒時間可以繼續天天炒股，夢想可輕易追回損失，甚至想在失業情況下仍冒險買樓花。投資書籍作者兼股評人龔成認為，該讀者投資路上一直「行錯路」，失業下還想買樓更是不可思議。他建議事主先做好人生規劃，最重要是盡快找一份穩定的工作，確保財政不會入不敷支，然後才決定是否投資股票、進修或買樓。但假如為了要每天短炒而不去工作，可說是完全錯誤的人生選擇。
【理財個案：失業兼炒輸股票，應該花10萬元讀書？】
龔成老師：
龔sir , 我43歲，follow 咗你接近兩年，未有機會上你嘅堂。因為我剛讀完高級文憑（工商管理），想報degree，但諗緊讀唔讀，因為要成10萬，希望你比啲意見。
有睇你嘅書同每日睇你嘅post，你每日嘅post 真係好觸動到我，有一個話要爭取時間，最近嗰個要相信己…，你知唔知，就好似心靈雞湯咁！但今日都係忍唔住想表達下自己嘅心情同希望你指教！
其實我最近好唔開心，我已經43歲，沒有大學畢業就出嚟工作，一直都係做銀行（同你以前一樣，所以有種親切感），入職時只有6千5（contract），挨咗20年，最後份工都係得2萬7，但現在失業！
我幾年前開始學人投資，當時亂咁買其他嘢，主要買入左1825，一夜間冇晒本同利共20萬，另一隻致命傷係0136，蝕左好多。好彩幾年前有跟你1211（比亞迪），但之後都忍唔住$230放咗，多得佢幫我賺返10萬。
另一件事係上年6月我抽到居屋，因為某D原因，我冇要到。最近有新樓入埸價只係300萬，如果我而家買，揀建期，趕供樓前搵工，係咪好癲？
因為自己衰唔夠你慳儉，又其實呢兩年大部份時間冇工作，而家身家得90萬左右，我真係唔知應該點做？如果讀書，好快要比第一期學費。
我明白現時啲錢只會有出冇入，咁我應該盡快搵嘢做，但其實我係唔想搵，唔係因為懶，係我驚返咗工，跟唔貼個股市。我呢排一直短炒，我唔貪心，我只係想搵返（輸咗的）幾十萬先，追翻過往輸的數。龔sir 可否指教點樣重新入手，入邊啲股票？
我呢個情況，係咪應該搵工，儲返D財富先？我呢個年齡，仲應該讀上去嗎？吖，如果你睇哂全文，真係多謝你！
讀者敬上
龔成老師分析：
你有幾個核心問題，如果你不處理，你只會一直行錯路。
第一，我發覺你做人較短視，沒有長遠的規劃，我相信你之前讀高級文憑，這刻未知是否讀degree，其實都無一個具體的計劃，記住，為讀而讀是無意思的，你要有明確的目的先好去讀。
另外，你話「有新樓入埸價只係300萬，如果我而家買，揀建期，趕供樓前搵工。」
這當然是高風險行為，同時睇得出你習慣短視，無長遠規劃。因為你表示近兩年都無乜工作（可能你要花時間讀書），現時又不知是否應該再花$10萬讀書，但就想買樓，並利用新樓發展商計劃去先簽約再找工作。這當然是高風險，因為無人能保證你能找到工作，以及無人能保證你的薪金。
因此，買樓的事情，當然不建議進行，同時，也反映出你無長遠規劃的情況。你一定要改善這方面的情況，無論是工作、讀書、投資、買樓、做人，也要有長遠的規劃。
第二個核心問題，就是投資上。
你過往投資的股票，都是無質素或高風險的股票，好彩你有一隻比亞迪（1211）幫你賺錢，不過你最後都賣左。
建議你重新學習投資，要明白真正投資不是炒賣，是選優質股長線。同時，你表示因為要睇住個市，而不想工作，這當然是錯誤！真正投資者是分析企業，不是每天睇住個市，所以，你根本是行錯方向，你就算有正職都可以投資。
我先總結給你的意見，之後再延伸講多少少。
第一，你不要為讀而讀，所以建議你未有明確想讀書之前，不要讀，除非你確定花$10萬去讀對你當時工作或前途好有幫助，否則不要讀。
第二，你暫時不要買樓。
第三，你不要再花時間睇住個市，要盡快找工作！
第四，要好好學投資，是正確的投資方法。
我以下再分析你的投資情況。其實你現時最重要的是調整心態，不要因為過往的損失，而製造更多的損失。「每一分錢」都是你的血汗錢，都得來不易，你應該謹慎，珍惜才是，你現時要做的事吸取教訓並從新出發。
在你過往經驗中，你應該明白投資，「知識」是十分重要。短炒好難賺到錢，投資股票其中著重點，是要懂得分析企業的前景以及賺錢能力，好的股票不應該賣出。
雖然你想心急追翻過往輸的數，但財不入急門，你反而要學正確的投資方法，不要心急投資，同時，要找工作，處理好這刻的理財，一步步做好，才能真正做到財富累積。
美臻集團（1825）主要從事服裝製造業務，包括男裝、女裝及童裝產品，過往業務一般，之前有炒作，令股價偏高，不過以業務發展來分析，這股的投資價值不高，不宜投資。
中國儒意（0136）有危有機類。現時企業盈利不多，現金流不强，之前市值極高，市場對「前景」有無限幻想，有時炒作會升好多，但跌都可以好勁。這類股票如果要長線投資要很小心，要明白高風險。佢唔係不值投資，但風險高，故只能小小注。
最後，你這刻最重要是「找工作」，有左大方向先，之後就知是否要讀書，是否有能力買樓。同時，你有工作先可以有資金投資，否則你的本金只會不斷減少。
==================================
龔成老師簡介
‧ 暢銷書《股票勝經》、《選股勝經》、《年報勝經》、《50優質潛力股》、《50穩健收息股》、《50值博倍升股》、《大富翁致富藍圖》、《80後百萬富翁》、《80後2百萬富翁》、《80後3百萬富翁》、《財務自由行》作者
‧ 理財真人Show 節目擔任致富教練
‧ 曾接受港澳多個傳媒訪問
‧ 過往於銀行從事投資相關工作多年
‧ 曾在萬多元月薪狀態下，憑股票累積數百萬財富
‧ 現為全職投資者，擁過千萬財富
‧ 於網上分享投資心得，瀏覽量過百萬，為人氣博客，解答網友理財問題逾20,000條
‧ 專欄作家
‧ 擁財務學學士學位
‧ 股票課程導師，香港及澳門學生人數逾4,000人
‧ 過往10年投資成績，過半能獲利超過1倍以上
Facebook 專頁「龔成」粉絲人數超過200,000人
（https://www.facebook.com/80shing）
==================================
Text by BusinessFocus Editorial
免責聲明：本網頁一切言論並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關言論招致損失，概與本公司無涉。投資涉及風險，證券價格可升可跌。