巴黎奧運狂熱｜香港「跳馬王子」石偉雄巴黎奧運跳馬資格賽止步，發文總結自己今屆的奧運旅程：滿意賽果、無悔無憾。獲譽為香港體操界「跳馬王子」的石偉雄在日前巴黎奧運男子跳馬資格賽中，挑戰難度高達6.0分的「李世光跳」，然而，石偉雄首跳失誤，向前仆倒只得13.666分。第二跳他決定降低難度，平穩落地取得14.533分，平均14.099分，最終無緣晉身決賽。撰文：CK@Medical Inspire 醫．思維｜圖片來源：SF&OC 港協暨奧委會、CUHK Medicine@Facebook
巴黎奧運狂熱｜巴黎奧運之路止步、石偉雄無悔無憾！為闖奧運打止痛針、冒斷腳風險參賽：滿意賽果
作為香港運動員，石偉雄的奧運之路並不平坦。在2016年里約奧運，他因右肩韌帶完全斷裂而錯失奧運資格。上屆東京奧運後，又經歷腳腕內側兩條韌帶斷裂，但他從未放棄，積極面對。儘管石偉雄屢次受傷，遭受重大打擊，他始終堅持：「冇一日係唔痛嫁，果種痛令到我懷疑人生」。
容樹恒醫生是照顧多年石偉雄的主治醫生，容教授自石仔十多歲第一次頸部嚴重受傷入威爾斯親王醫院治療開始，便與他結下不解之緣。20多年來，容教授見證石仔由職業生涯巔峰至全身傷患，但石仔彷彿是個活的不倒翁，跌倒、受傷、爬起、再戰。石仔不怕苦不怕痛的打不死精神，正正是引以為傲的「香港精神」，是值得我們香港人尊敬和自豪：
「石偉雄是一位真正的英雄。他的身體經歷了巨大的壓力和挑戰，但他從未退縮。」
容教授更進一步解釋了石偉雄的傷患情況：
「石仔其實差唔多20年前呢佢第一次頸部嚴重受傷入去威爾斯親王醫院治療，其實佢係我咁多個照顧運動員裏面身體最多傷嘅一個，亦都係最勇敢的一個。因為佢的運動項目危險性好高，一旦失手，後果可以好嚴重，甚至致命。石仔由頸、膊頭、腰、大髀、膝頭、腳踭，全部都受過大大少少的傷患。其實佢過去半年我哋團隊幫佢積極地治療，佢更加特登即日來回香港荷蘭接受治療，而近日也特別為他安排一些治療，目的是希望佢可以安全順利地完成比賽。佢身體的傷患多不勝數，所以佢今次其實好困難，特別係佢要跑得好快、要跳彈得好高，要做到咁，大髀嘅力量好緊要，但係正正呢段日子佢受着累積多年的大髀肌肉傷患困擾，我們用左好多唔同方法幫佢，佢可以跑得返跳得返，其實我地都好感恩，因為真係好唔容易。所有運動員中，石仔是我們一齊去經歷、克服困難最多的一個，他每個動作背後，都真係有血有淚。佢在2014取得亞運金牌，登上運動員生涯高峰，但正正嗰時佢就受咗好嚴重嘅傷，令到佢膊頭個肌腱完全斷晒。以一個玩跳馬膊頭要用好多力嘅運動員嚟講，其實呢個係好嚴重嘅傷，但係都咬緊牙關去克服。因為要準備2016年奧運，即係唔夠兩年，當時我地只可以嘗試非手術嘅方法，咁試過好多好多方法都唔得，你可以想像佢當時由2014最高峰到2016年巴西奧運不能出選，心情會如何？但當時石仔即刻WhatsApp我話做手術，因為佢要預備2018年亞運。我那刻只能說我會盡力幫佢，但我都唔敢擔保係咪真係可以去返巔峰狀態。佢手術後經歷咗一年康復，好積極地做復康治療，睇住佢係2018年亞運再攞一次金牌，我和整個醫療團隊都非常興奮，感覺簡直是一個magic。石仔努力挑戰自己，好想出戰東京奧運，但不幸再一次嚴重受傷，當時正值COVID，佢係我地第一個病人由奧運直接接返香港進行治療。到今次巴黎奧運，他面對多年累積的多重傷患，不斷受傷、治療再受傷，過程艱辛實不為外人道。所以他能夠出戰巴黎奧運，其實真的非常不簡單。」
雖然成績未如理想，但石偉雄表示沒有遺憾：
「已經盡力比賽，對自己今次比賽沒有期望，希望珍惜這次在奧運的機會。」
早前星期日（28日），石仔於比賽翌日和容教授二人於巴黎午膳，回顧過去20年一起克服種種困難的點點滴滴。最後，容教授向石仔表示：「你是我們心中的硬漢子真英雄！」
石偉雄將這20多年的體操生涯視為一個踏腳石，為退役做好準備，展開新的人生篇章：
「巴黎奧運呢一段經歷完結啦今次成績雖然未如理想，但係我做到自己需要做到既本分，做到享受呢個舞台，做到平常心完全冇壓力咁去比賽，我對得住自己，珍惜每一日仲可以練習同比賽既機會。由上屆東京奧運，要決定喺巴黎見大家，我做到啦，我好感恩可以第三次去奧運，好感恩呢三年陪我一齊癲嘅教練（佢而家都係總教練），裁判，治療師、醫生，屋企人，每一位幫過我既人，好感恩喺我背後默默支持我陪住我經歷高低起跌既嘅香港市民呢三年既路已經唔可以用崎嶇黎形容，要去世錦同奧運，一定要用世界盃拎積分黎拎資格，所以由22年頭開始我兩隻腳一直有傷都好都唔可以休息，特別係由上年世錦拎唔到資格後，我即刻做左個腰手術，我同醫生講唔好話比屋企人知，我自己一個人出入醫院就得嫁啦之後就要馬上轉用4站世界盃拎資格，好好彩最後我都拎到去巴黎既入場券，呢個’好彩‘並唔係真係好彩既意思由1月去荷蘭集訓到4站世界盃，係第1站同第4站之前，我好低調即日來回荷蘭香港返黎打消炎止痛針打第一枝既時候醫生話：會有斷既風險我話：明白，冇問題到打第二枝醫生話：你上次打完唔夠兩個月喎我話：係丫，隻腳頂唔順啦，又痛過醫生話：唔好打咁密，兩個月打兩枝唔得嫁我話：我唔怕丫，揀得去就冇得怕，都最後一站啦，我唔想係呢個時候跑唔到，我情願斷都唔要三五七十年後後悔自己點解當初唔行多步。到去奧運前3星期，呢個時候又黎，諗都唔諗同總教練講返香港打多枝到第三枝醫生：好，即刻幫你安排，之後佢冇再講野臨去奧運之前我再問醫生如果要再打多支你可唔可以嚟法國幫我打？醫生話：我睇吓情況啦，如果行得開可以嚟睇你比賽幫你打多支支援你。係最後比賽前幾日醫生都嚟咗法國幫我打多支，令我可以冇顧慮同安心咁比賽，呢個比賽結果我覺得最無悔無憾啦，呢個過程我好滿意。另外我去奧運之前問左兩位治療師可唔可以黎睇我比賽，佢地諗都唔諗即刻話黎，佢地即刻唔做生意即日飛過黎睇我比賽，多謝你地真係太多人要多謝同感激，多謝每一位幫過我既人，我呢一世都會記得，多謝你地飛過黎睇我又好，睇電視支持我又好，比完賽我收到每一位行過路過市民都講聲respect, proud of you,呢樣係我最想見到既，多謝你地支持我，留意香港體操呢個運動，留意香港既運動員，感恩最後我呢26年既體操生涯從來都冇多謝過我自己，多謝你26年既堅持同努力，艱難左26年都冇放棄，當我有78歲命，你堅持左1/3你既生命日復日年復年咁做，石仔多謝你」