香港人熱愛米線嘅程度絕對唔可以睇少！大家經常食譚仔食到佢上市，但其實香港各區仲有好多好食嘅米線小店～ 一碗高質嘅酸辣米線，最緊要就係「酸」、「辣」恰到好處，如果生招牌係麻酸辣，更要講求三種味道平衡！太酸太辣，或者唔酸唔辣，麻味過重都通通唔合格。米線味道往往會隨住配料、湯底變化，雖然製作過程看似簡單，但想要突圍而出就唔係咁易啦！今次小編就為大家比較如荃灣唯一雲貴川風味、尖沙咀星林居、葵涌雲南小鍋米線等小店嘅酸辣米線。想知全港到底邊5間店最好食，而家即刻睇睇食後評分啦～
圖片來源：Openrice｜撰文：Candice
香港5大酸辣米線Top1. 觀塘 – 臻味豬扒酸辣米線
作為一個日日都要係觀塘食lunch嘅打工人，小編覺得小店「臻味」嘅招牌豬扒酸辣米線絕對係NO.1，愛辣人士必食！
米線有得揀酸辣湯或麻酸辣撈米線2種食法，前者已經十分惹味，酸辣程度岩岩好唔會遮蓋左配料嘅味道。如果平常係好食得辣的話，絕對唔可以錯過呢間嘅麻酸辣撈米線！麻味唔會太喧賓奪主之餘，仲起到吊味嘅作用，配搭蠔仔一類配料超級惹味～絕對會越食越上癮！
除左湯底，小店嘅配料份量亦超級足料，就連配送嘅花生同酸菜都毫不吝嗇！最正係仲有多款餸菜選擇，例如係豬耳、肥牛、餃子、雞絲等等，米線粗幼、軟硬度適中，價錢親民只係$38碗，CP值超高，各位觀塘友一定要試～
總評分：4.8/5
價錢親民：5/5
酸辣味道：4.5/5
配料選擇：4.5/5
餐廳環境：4/5 （等候需時，人流較多）
【INFO】
臻味豬扒酸辣米線
分店1：觀塘聯安街9-15號永毅大樓地下C舖
分店2：觀塘創業街15號萬泰利廣場地下B號舖
分店3：觀塘敬業街55號皇庭廣場地下3號舖
分店4：九龍灣常悅道13號瑞興中心地下A號舖
香港10大酸辣米線Top2. 尖沙咀 – 星林居酸辣米線餐廳
出街食野除左講求味道，地方闊落坐得舒服其實都同樣重要！香港地少人多一般米線小店位置都會比較逼狹，位於尖沙咀嘅星林居係餐廳環境方面就攞足滿分～
米線店舖闊落舒適，更設有梳化卡位，大家黎到可以慢慢品嘗心愛嘅酸辣米線，就算係大夏天都唔洗食到身水身汗！
至於米線味道亦好有水準，餐廳老闆大有來頭，曾獲法國國家領事授予法國藍帶美食勳章，更憑住一道「酸辣雙輝過橋米線」橫掃多個烹飪比賽獎項。
星林居嘅酸辣湯底以雲南醬料熬製，淨係辣度都分8級，酸度就有4級。選料款式亦有5、60款可以自由配搭，湯底好夠味，小編揀中辣已經覺得勁辣勁酸，大家初次嘗試記得唔好太貪心！另外米線口感亦好有彈性，條條爽滑。如果你係比較注重餐廳環境嘅朋友，星林居就岩曬你啦～
總評分：4.5/5
價錢親民：4.5/5
酸辣味道：4.5/5
配料選擇：5/5
餐廳環境：4.5/5
【INFO】
星林居酸辣米線餐廳
地址：尖沙咀金馬倫道14號金輝大樓3樓
電話：2424 1686
營業時間：星期一至日 11am-12am
香港10大酸辣米線Top3. 石蔭 – 雲南小鍋米線
想試d特別d嘅口味，小編特別推介呢間係係石蔭嘅25年老店——「雲南小鍋米線」！佢哋嘅招牌雪花雞絲超級幼細，食嘅時候吸盡湯汁，絕對係必叫之選！
店舖嘅米線堅持人手逐碗煮，酸辣湯底濃郁，小鍋米線湯底本身有微辣炸醬，加上麻辣腩肉就更加惹味！
不過小心呢度嘅老闆娘落辣超重手，就算點小小辣都會變成中辣，平時唔太食得辣嘅記得要多多留意！另外餐廳只有酸辣湯底，喜歡麻辣嘅朋友可能要失望了，不過店舖配料選擇多有31款，最近亦翻新過可以比大家坐得更舒服。未試過嘅朋友可以於假日到此嚐嚐鮮～
總評分：4.5/5
價錢親民：4.5/5
酸辣味道：4.5/5
配料選擇：4.5/5
餐廳環境：4.5/5
【INFO】
石蔭雲南小鍋米線
地址：葵涌梨木道112號葵寶大廈地下5號舖
電話：2424 2510
營業時間：11:00－20:00
香港10大酸辣米線Top4. 銅鑼灣 – 金西南米線
如果同小編一樣鍾意清爽口感，銅鑼灣呢間金西南米線絕對值得一試！
餐廳嘅酸辣湯底質地較稀，每碗都有滿滿嘅肉碎，辣味唔會過份嗆喉，反而突出左米線同湯底嘅酸甜。夏天唔想食得太油膩但又想過下口癮，呢度嘅酸辣湯就可以滿足到你啦！
金西南米線嘅配料亦比較特別，牛肝菌、松茸都比較少見，大家黎到一定要試試！米線硬度偏硬，辣味因為比較易入口，如果嗜辣嘅朋友想惹味d可以嘗試叫辣小小～另外餐廳上菜速度超級快，就算平日lunch食個快飯都無問題！
總評分：4/5
價錢親民：4.5/5
酸辣味道：4/5
配料選擇：4.5/5
餐廳環境：4/5
【INFO】
金西南米線
地址：銅鑼灣登龍街41－51號金龍大廈地下D舖
電話：2682 5668
營業時間：11:30－22:30
香港10大酸辣米線Top5. 屯門 – 雲貴風
講到最多人鍾意嘅小店點少得屯門嘅雲貴風！雖然店舖細小狹逼，但卻依然深受屯門街坊力捧～
米線款式有小鍋、酸辣、麻辣，豬骨湯底，配料有三十多款可選，豬類頗多，豬雜、豬頭肉、豬肚絲、豬脷等都有，湯底辣度有五級可供選擇。
雲貴風酸辣湯底十分濃郁，口感濃稠，食落辣味瞬間就充斥整個口腔，酸味後來才慢慢湧出，過後仲會有微微甜味！小編自己唔太鍾意重口味，所以儘管米線味道勁頭很足，食完卻會感到很口渴。不過試完相信喜愛重口的人絕對會喜歡，湯底配料豐富，亦有滿滿肉碎同辣椒碎，唯獨米線有點過腍。餐廳開店多年經常滿座，有興趣去試食的朋友記得要預留時間排隊入座，做好心裡準備～
總評分：3.5/5
價錢親民：4.5/5
酸辣味道：4/5
配料選擇：4.5/5
餐廳環境：3.5/5
【INFO】
雲貴風正宗雲南米線
地址：屯門井財街15號金銘大廈地下
電話：2430 2918
營業時間：星期一至日 12pm-12am
介紹左咁多，各位愛米線之人都快D搵日去試試啦～
