多得互聯網和社交媒體發達，一班藝人榮升人父人母後，可以盡情po相晒吓得意仔女之餘，又可藉此作為成長紀錄。睇吓爸爸媽媽、再睇吓星二代B仔B女，餅印一樣仲好有鏡頭感，呢啲咪血統純正囉！
撰文、圖片：東方新地
胡杏兒：有性格囝囝 Brendan & Ryan
15年結婚，然後三年抱兩先後誕下Brendan同 Ryan兩個寶貝仔。近日杏兒帶埋細仔 Ryan北上復工，41歲生日要同老公李乘德及大仔 Brendan遙距慶祝。3歲 Brendan(左 )似爸爸好精靈，1歲 Ryan就怕怕醜醜好嬌嗲，兩個都可愛又有性格。
陳展鵬：吸 like 能力超高小豬比
陳展鵬同單文柔嘅愛情結晶小豬比現時將近20個月大，五官似足媽媽眼仔碌碌皮膚粉嫩，可愛小豬比嘅 po 一出，吸 like 能力分分鐘仲高過爸爸媽媽。
黎諾懿：三歲半囝小春雞
一場疫情搞到黎諾懿變疫境廚神，不過一系列廚神居家大顯身手教煮短片，都被三歲半囝囝小春雞搶晒鏡，繼承父母精緻五官，又永遠帶住個又 charm 又 warm 嘅笑容，有乜理由唔討人喜愛。
林芊妤：濃眉大眼伯伯
明明個樣係 BB，不過濃眉大眼可愛表情，硬係永遠心事重重有
陣「 佬 」味，被媽媽改個乳名叫「 伯伯 」又真係有啲根據。圓頭圓腦天然呆，伯伯嘅個人 IG 其實都儲埋19萬幾 fans 㗎！
黃澤鋒：老來得囡小黃妃
黃澤鋒太太陳麗麗去年以51歲高齡成功懷孕，歷盡千辛又搵命搏才誕下囡囡小黃妃，一切來之不易，可幸小黃妃唔止健健康康，性格亦都討人歡喜，尤其係招牌燦爛笑容最令人融化。
鄭嘉穎×陳凱琳：高顏值囝囝Rafael
細仔Yannick剛過百日，外官尚未定形，歲半大嘅Rafael就已經睇到愈大愈靚仔，繼承爸爸鄭嘉穎同媽媽陳凱琳嘅高顏值，眼仔大大、鼻仔高高、笑容陽光好上鏡！
岑麗香：大眼睛B Jacob
香香公主去年生完B，今年頭已經話咁快出山拍劇賺奶粉錢。一邊工作一邊亦都盡力親力親為湊囝囝Jacob。一歲七個月嘅Jacob肥肥白白，亦繼承咗媽媽嘅大眼睛，又一個精靈可愛嘅星二代。
楊茜堯×羅子溢：靚靚小珍珠
爸爸媽媽都係靚人，今年四月出世，家陣半歲嘅小珍珠亦都愈大愈靚女，最招牌就係繼承爸爸羅子溢( 原名羅仲謙 ) 同媽楊茜堯( 原名楊怡 )，一雙又圓又大嘅眼睛。
王祖藍×李亞男：手長腳長B女Gabrielle
今年六月李亞男宣布再度懷孕，亦都再度係陀 B 女。李亞男同王祖藍嘅大女 Gabielle 就快兩歲大，五官愈大愈似爸爸，不過身高就繼承媽媽手長腳長，迷你祖藍一樣愛笑十分討人喜歡。
孫慧雪：口水囝Riley
眨吓眼雪雪個寶貝仔Riley 都三歲大，成長點滴一直被媽媽記錄在個人社交網站。唔止古靈精怪仲正值學講嘢期間，經常被媽咪取笑正宗口水佬。
安志杰×Jessica C.：愈大愈靚囡 Tessa
今年因為疫情困擾，同樣擁有美國籍嘅安志杰同 Jessica C. 就索性帶埋一對仔女返美國長住。四歲囡囡Tessa愈大愈靚女，手長腳長繼承媽媽model身形，而兩歲細仔Elvis人仔細細卻性格十足， 留足兩年長髮最近才肯剪短。