袁偉豪直播口快快爆黃智雯已婚：佢老公出嚟叫佢收線

38歲黃智雯同從事珠寶界的男友Anthony（詹天文）拍拖9年，雖然甚少公開放閃，但二人感情穩定，黃智雯曾表示視對方為終生伴侶，她更被指早就搬入男友位於東半山的2000萬豪宅同居，似乎好事近。

去到近日，黃智雯同一班圈中老友胡定欣、陳山聰、袁偉豪等在IG進行直播，袁偉豪就疑似口快快踢爆黃智雯已婚！事源黃智雯講到同袁偉豪在新劇《把關者們》合作趣事時突然斷線，袁偉豪見狀就爆出一句：「佢又借咗人哋wifi比人cut咗，一係佢老公出嚟叫佢收線。」事後他似乎知道自己「講多咗」，即刻補鑊「佢未結婚架嘛」及傻笑，而胡定欣亦幫口：「你唔好亂咁講」，當黃智雯重返直播時，大家都扮到冇事發生一樣，只講新劇，未有再提及黃智雯已婚一事。而黃智雯亦解釋袁偉豪只是口快快無心之失，氹大家開心，更強調有喜訊的話大家一定知道。