今時唔同往日啦！
農曆新年係中式最傳統嘅節慶，亦都係華人必過嘅節日，喺呢段日子大家都會參加好多傳統活動去傳承呢個農曆新年嘅文化，例如以前大家都會燒炮仗，放煙花，又會自己寫春聯等等。不過隨住科技嘅日新月異時間嘅變遷，現代人已經唔再係跟足古時嘅一套做法嚟做節啦！今次就等DailyView帶大家睇睇宜家嘅香港人喺新年最鍾意做嘅十樣嘢喺咩啦！
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
10. 香港式賭博-六合彩/賭馬
華人會認為「新年會行大運」，嚟到新一年，大家都會覺得黑仔運會離開自己～喺呢個時候就當然要試試手氣啦XD對於香港人嚟講，買返場六合彩同馬仔都係必做嘅，唔試又點知自己好唔好運喎～加上農曆新年期間六合彩會有新年金多寶，賽馬會亦都準備咗好多節慶活動同禮品畀大家，例如入場人士會派禮物，今年賽馬當日仲會發放1億2千萬巨賞！簡直見到都心動呀！
image source:hkjc
9. 轉轉轉轉走衰運-轉風車
香港人深信轉風車可以「轉出好運」，不過轉風車都有少少技巧，覺得上年運氣唔好嘅朋友，轉嗰陣記得順時針咁轉，祈求今年順風順水；相反覺得上一年都好好運嘅朋友仔，就要將風車逆時針咁轉啦！咁樣先至可以將好運保留落嚟㗎！至於求籤，香港人相信一支籤可以解答到心中嘅疑惑或者知道今年會過成點，好多人都去求個安心㗎！就連政府每年都會派代表去求籤！
image source:flickr
8. 夏蕙bb見面會-搶頭炷香
講到搶頭柱香，又點會少得香港人都識嘅夏蕙BB黃夏蕙喎！香港有好多善信同夏蕙bb一樣，每年嘅年三十晚都會去黃大仙祠到搶頭柱香㗎！善信們會認為頭柱香可以表示到佢哋對神明嘅虔誠，神明亦會因此而更聽善信嘅祈福～呢項活動持續咗咁多年都好旺盛，每年都會有各畀嘅媒體過嚟拍攝，就算係外地嚟嘅遊客，都會特登前往去感受一下現場嘅氣氛𠻹！
image source:youtube/蘋果動新聞 HK Apple Daily
7. 合家歡時段-睇賀歲片
難得新年大家都會放假，當然會做返啲開心嘢嚟團年㗎啦！呢個時候睇賀歲片就係一家老幼合家歡嘅活動時間啦！每年新年戲院緊有兩三套賀歲片上映，個個都會喺戲院睇到笑唔停！嫌出門麻煩？唔緊要！就連電視都會喺新年期間播返以前嘅賀歲片畀大家睇！基本上每年都會必播《家有囍事》、《行運一條龍》、《嚦咕嚦咕新年財》等等。年年都會播㗎！真係睇到識背啲對白呀！
image source:Facebook/AMC
6. 煲劇煲到不知時日過-煲劇
基本上個個新年都長假放，特別係學生一族呀！對於一班鍾意宅喺家中嘅後生仔嚟講，煲劇簡直係一流嘅過年活動！唔使浪費時間打扮出街，又唔使裝假狗笑笑口咁應對一班唔熟嘅親戚～加上宜家追劇嘅平台咁發達，你想睇邊個國家嘅戲、你想睇邊個演員嘅戲、又或者你想睇咩題材嘅戲，只要上網打幾隻字搜尋就任君選擇！肚餓就邊食嘢邊煲劇，食飽就瞓喺床繼續煲。爽！
image source:viutv
5. 新衫新鞋扮靚靚-買新衫新鞋
對於農曆新年，華人嘅傳統思想就係「去舊迎新」。呢個時候除咗年廿八要洗邋遢之外，棄置咗嘅當然就要添置新嘅返嚟啦！香港人新年點都會買返件新衫新鞋過嚟，香港人相信個人望落去精神啲之餘，仲可以增加自己嘅旺氣！所以呢個時候你都會見到衫鋪鞋鋪都特別多人行多人shopping。雖然要洗錢，但商鋪亦通常會搞返個新年大減價活動，又點會忍到手唔買嘢喎！
image source:unsplash
4. 新年一定要碰槓食-打麻雀
雖然有好多人平時都會打麻雀，但小編啱啱都講過，咁多位賭仔都會覺得新年特別旺要一試手氣～特別喺新年大家都放假，點都會約返朋友或者親戚打返幾圈！大家都賭幾大就幾大，加上打牌有咁多款，打跑馬仔又得、三番起糊又得、台灣牌又得、仲可以玩自摸獎馬，真係打幾都唔厭㗎！何況打牌有助防止老人癡呆症，大家都快啲新年陪長輩打返鋪牌啦！輸咗錢咪當孝順吓佢哋囉XD
image source:Youtube/笑到你仆街
3. 年花開開燦爛-行年宵
講到新年必做嘅嘢又點會少得行年宵！香港人新年都會約朋友一齊行街湊熱鬧，屋企人都會買啲年花擺喺屋企裝飾。甚至好多情侶都會將行年宵呢項活動列入新年拍拖活動！點解？因為年宵市場除咗有多款色彩繽紛嘅年花，仲有好多檔新年創意商品，行到肚餓仲有大把小食可以買！小編新年行年宵一定會買返串冰糖葫蘆嚟食㗎！仲有，年三十晚好多檔都有大減價𠻹！
image source:flickr
2. 行完大運大運到-行大運
成日都話「新年行大運」，究竟咩叫做要「行大運」呢？其實簡單啲嚟講，姐係每年農曆新年對於每個生肖都會有屬於佢地好運嘅方位，就好似要揾吉位擺風水陣，人都一樣，打個例子例如屬豬蛇牛可能今年東南方比較旺，咁佢地就可以新年去嗰到行返幾轉沾沾旺氣！至於今年2020年，你哋應該去邊到兜兩轉，就自己去搜尋下啦～XD
image source:Facebook/頭條娛樂
1. 向世界出發-去旅行
對於香港人嚟講，平日返工做嘢做到成隻狗咁，新年有得拎假就緊係去旅行啦！去邊都唔係問題，最緊要係可以遠離家鄉放鬆放鬆姐～其實旅行照樣可以去行大運㗎！好似今年2020年咁，網上就有建議屬鼠嘅可以去東北方例如日本同韓國，而屬羊就啱去澳洲同紐西蘭嘅南方地區，而北方就啱屬牛嘅朋友啦！不過去邊都好，最重要注意安全同玩得開心，咁就可以有個happy lunar year 啦！
image source:unsplash
【香港網路溫度計調查結果之圖文，未經授權請勿轉載、改寫】
分析說明：
本研究資料由《KEYPO大數據關鍵引擎》提供，分析時間範圍為2019年01月15日至2020年01月14日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『新年唔做會手痕嘅事』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。