根據Fabrizio Romano嘅報導，曼聯左閘梳爾(Luke Shaw)因為肌肉受傷將會缺席大部分比賽時間，預計會係季尾時間先能夠復出，因此曼聯左閘深度將影響來季歐戰資格。
現年28歲嘅梳爾今季季初因為肌肉受傷已經缺席一段時間，球隊繼而向熱刺借用左閘球員列基郎(Sergio Reguilon)，而係缺席大概16場賽事後，梳爾係11月健康復出。基於左閘有返足夠人選、球隊比賽又唔算多，曼聯先後退還列基朗同外借第三閘位嘅艾華路費南迪斯（Álvaro Fernández)。然而好景不常，近兩場賽事梳爾踢左半場都被換出，結果顯示球員有新一輪嘅肌肉受傷，將要係季尾先復出。對於球員而言，季尾或許能趕上英格蘭代表隊參戰歐國盃，但對球隊而言，佢嘅受傷影響甚大，因為佢係陣中最夾福仔嘅左閘。此外，另一左閘馬拉斯亞(Tyrell Malacia)自上年7月就一直傷出，復出無期，所以目前曼聯左閘位置人選有限。
曼聯對此都有三個方案，其一係將連迪洛夫(Victor Lindelöf)移向左閘位置，近兩場對盧頓同阿士東維拉如是。今季坦哈格曾5次安排連迪洛夫踢左閘，其中三次就有中場入替受傷嘅梳爾。佢嘅防守能力當然有一定水準，但現代足球同目前球隊戰術體系下，閘位需要上前協助進攻，而中堅出身嘅連迪洛夫要佢做埋進攻或者太強人所難，所以用此方案時左路進攻將會打啲折扣。
其二係將右閘達洛特(Diogo Dalot)移去左閘，今季佢係左右閘都有唔少經驗，但問題在於目前右閘雲比沙卡傷出，達洛特最近踢右閘表現亮眼，若果將達洛特調去左閘位置或會影響佢嘅個人表現，所以短期內呢個未必係最佳選擇。
其三係安放借將岩拉拔(Sofyan Amrabat)去左閘位置，呢位防中球員確實可以踢左閘，而曼聯今季亦搵過佢踢三次左閘，除左係足總盃對住無心戀戰嘅水晶宮發揮正常，其餘兩次分別係聯賽對水晶宮、歐聯對加拉塔沙雷嘅比賽，表現上都係較為災難，因此搵佢踢左閘可以係最後嘅選擇。
基於以上嘅選擇，短期內搵連迪洛夫代左閘，等到雲比沙卡復出先將達洛迪移去左邊，先係最合理嘅方向。2024年嘅曼聯各項賽事6勝1和未嘗一敗，只要發揮正常，相信對富咸延續連勝紀錄問題不大。
▼Follow 足球港場
Instagram: https://www.instagram.com/footballarena_hk/